Read Kok Borok 2 BOSONG 10 Bible Online

2 BOSONG 10 - Kok Borok bible

2 BOSONG 10

¹Rehoboam Sekemo tháng kha, aro bebak Israilrok bono habugra cha rwnani bagwi phai lai kha.

²Nebatni bwsla Jeroboam abono khna khe, bo aphuru habugra Solomonno kiriui Ijibo khárwi tongo; hakhe Jeroboam, Ijipni kiphilwi phai kha.

³Bebak Israil bororok bono ringwi na rwhorwi, Jeroboam bai pal khe bórok Rehoboamni thani thángwi bono hai hwnwi sa lai kha,

⁴“Nini nwpha chwngno poja hilikma bok kha. Nwng chini poja hilikmano heleng rw khe, chwng nono monnai.”

⁵Rehoboam bórokno hai hwnwi sa kha, “Salthamni salo ani thani phai bai di,” hakhe bórok tháng bai kha.

⁶Habugra Rehoboam, bini bupha Solomon kwthang tong phuru bwskango bachanai okra chakrarokno hai hwnwi sẃng kha, “O bororokno tamo kók samani cha kuknai?”

⁷Bórok bono hai hwnwi sa kha, “Nwng bórokni bugra wngna khe, bórokno khá ham rw di tei bórokno kók kaham sa di, aswk khe bórok nini seleng máng wng bainai.”

⁸Phiya ba bo okra chakrarok samani kókno khna li ya, tabuk tor bainai chwrairok tei bini bwskango bachanairokno sẃng kha.

⁹Bo bórokno hai hwnwi sa kha, “Nini nwpha poja bokmano heleng rw di, hwnnairokno tamo samani chano hwnwi norok chong?”

¹⁰Bo bai khe tornai a siklasa bono hai hwnwi sa kha, “Nwpha chini horbakno hilik rw kha, tamo khe nwng abono chini bagwi ma heleng rwnai, bórokno sa di, ani yasi kotoi se aphani bwchangni slái toro.

¹¹Tabuk, ani apha norokni saka-o poja hilikma boksa kha, ang abono tei bo hilik rwnai. Ani apha norokno chemuksa bai swprago, ang khe busu bai se norokno swpraknai.”

¹²Hakhe Jeroboam tei bebak bororok salthamni salo phai di hwnwi habugra samani hai khe Rehoboamni thani phai lai kha.

¹³Habugra okra chakrarokni kókno khna yaui bórokno khorang hamya ma khe kul kha.

¹⁴Habugra Rehoboam siklarok samani hai khe bórokno hai hwnwi sa kha, “Ani apha norokno poja hilikma bók kha, phiya ang aro tei bo boksin anw; ani apha norokno buduk bai swprago, phiya ba ang khe norokno busu bai se swpraknai.”

¹⁵Hakhe habugra bórokni kók khna li ya, abo Subraiyung Kaitorni kók Silo-o tongnai Ahiani khúk tẃi Nebatni bwsla Jeroboamni bagwi samani nangmani se.

¹⁶Bebak Israil bororok habugrano bórokni kók khna li ya khe nuk khe, bororok habugrano hai hwnwi sa kha, “Daudni thani chini tamo banta tong? Jisaini bwslani thani chini mungsa manthai kwrwi. Israil bororok, jotono sakni nogo tháng bai di. Daud tabuk nini núkhungno nwng’-no nai di.” Hakhe bebak Israilrok bórokni nogo kiphilwi tháng bai kha.

¹⁷Phiya ba Rehoboam Judia amchoi-o tong bainai Israilrokni simi bugra wng kha.

¹⁸Hakhe habugra Rehoboam samung tang rwnai bokhorok Hadoramno Israilrokni thani rohor kha, tamo khe Israil bororok bono holong bai khitarwi buthar lai kha. Abo bai habugra Rehoboam dakti khe bini korai malkhung naui Jerusalemo khárwi tháng kha.

¹⁹Hakhe Israilrok Daudni núkhungno tini jora kebeng lai-o.