Read Kok Borok 2 BOSONG 11 Bible Online

2 BOSONG 11 - Kok Borok bible

2 BOSONG 11

¹Rehoboam Jerusalemo sók phai khe bo Juda bai Benjaminni khorok 180,000 chongjak sengkrakrokno Israil bai choba nang lainani tei Rehoboamni hano songchanani bagwi thum kha.

²Phiya ba Subraiyung diyari Semaiano sa kha:

³Judani habugra Solomonni bwsla Rehoboamno tei Juda bai Benjaminni bebak Israilrokno sa di,

⁴Subraiyung hai hwnwi sa-o, “Nwng nini takhukrok bai choba ta nang lai di, jotono kiphilwi tháng di, tamni hwn ba abo ani muchungmani se.” Hakhe bórok Subraiyungni kók khnaui kiphil kha, Jeroboam bai choba nang laina tháng li ya.

⁵Rehoboam Jerusalemo tongwi, Judano kasunani bagwi kamiyungrok krakma khe tang kha.

⁶Bo Juda bai Benjamin bisingo kamiyung krakmarok Betlehem, Etam, Tekoa,

⁷Betjur, Soko, Adulam,

⁸Gat, Maresa, Jip,

⁹Adoraim, Lakhis, Ajeka,

¹⁰Jora, Aijalon tei Hebronno tang kha.

¹¹Bo nokrok kwrakma khe tangwi aro sengkrak bokhorokrokno ton kha, chámung, thok tei arakrok rúngwi ton kha.

¹²Bo phuirok tei olongarok bebak kamiyungrogo ton kha, hakhe bo Juda bai Benjaminno kwrak khe snamwi tong kha.

¹³Bebak Israil bisingni ochairok tei Lebirok bórok tongma jidoloni bini thani phai bai kha.

¹⁴Lebirok bórokni harok tei bórok tongmarokno yakarwi Judia tei Jerusalemo phai lai kha, tamni hwn ba Jeroboam tei bini bwsarok bórokno Subraiyungni ochai narwk li ya.

¹⁵Jeroboam háyáni bagwi, punni bagwi tei bo snammani musuk bwsarokni bagwi bini sakni ochairok chong kha.

¹⁶Bebak Israil bosong bisingni Israilni Subraiyung Kaitorno hamjaknairok bórok Lebirok bai bórokni chuchusongni Kaitor Subraiyungno yapharnani bagwi Jerusalemo phai kha.

¹⁷Bórok Judani hano rak rw kha; bisik tham jora bórok Solomonni bwsla Rehoboamno chuba lai kha, tamni hwn ba bórok Daud bai Solomonni thani tongmani hai khe bisik tham tong lai kha.

¹⁸Rehoboam Daudni bwsla Jerimotni bwsajwk Mahalatno hik na kha, bini buma Jisaini bwsla Eliabni bwsajwk.

¹⁹Bo bwsa khoroktham man kha, Jeus, Semaria tei Jaham.

²⁰Aboni ulo bo Absalomni bwsajwk Makano bwrwi na kha, bo bai bwsa khorokbrwi—Abia, Atai, Sija tei Selomitno man kha.

²¹Rehoboam bini bebak hik tei hik kotoirokni bisingo Absalomni bwsajwk Makano hamjak kugo, bo khorok 18 hik tei khorok 60 hik kotoi na kha tei bórok khorok 60 sajwk khorok 28 sajla man kha.

²²Rehoboam Makani bwsla Abiano bini takhukrokni bisingo bokhorok chong kha, tamni hwn ba bo bono habugra chá rwna nai-o.

²³Bo hus khe samung tang kha, bo baksa bini bwsarokno bebak Juda tei Benjaminni amchoirogo ton kha tei bórokno chámung kwbángma rw kha tei bórokni bagwi hik kwbángma rw kha.