Read Kok Borok 2 BOSONG 12 Bible Online

2 BOSONG 12 - Kok Borok bible

2 BOSONG 12

¹Rehoboam bugra cháui bini phan wngwi phai khe bo tei baksa Israil bororok Subraiyungni raidano yakar lai kha.

²Rehoboam habugra chámani nokha bisi kaiba phuru, bórok Kaitor bai sói khe tong yani bagwi Ijipni habugra Sisak Jerusalemno choprok phai kha.

³Aboni logi khung 12,000 korai malkhungrok tei khorok 60,000 korai kasaui choba nang lainairok tei lekha bai man li ya khe sengkrakrok—Libyani, Sukkitni tei Ithiopiani phai bai kha.

⁴Bo Judani kamiyung kwrakmarokno segwi na baiwi Jerusalem jora sók phai kha.

⁵Hakhe diyari Semaia Sisakni bagwi Jerusalemo kuthum bainai Rehoboam tei Judani tẃiphangrokni thani phaiwi hai hwnwi sa phai kha, “Subraiyung hai hwnwi sa-o, ‘Norok ano yakarmani bagwi angbo norokno Sisakni yago yaphar kha.’ ”

⁶Hakhe habugra tei Israilni tẃiphangrok koinene wng laiwi hai hwnwi sa kha, “Subraiyung khe sóino khlaiwi tongo.”

⁷Subraiyung bórokno koinene wngma nuk khe, Subraiyung Semaiano hai hwnwi sa phi kha, “Bórok sakno koinene wng kha; ang bórokno sokomor glak, phiya ba ang baksano phiyók anw tei ani jolima Sisakni yak tẃi khe Jerusalemo klai glak.

⁸Hai phano bórok bini seleng ma wng bainai, hakhe bórok ano monmani bai o ha sakani bugrarokno monmani phér laimano kaham khe saui man anw.”

⁹Hakhe Ijipni habugra Sisak Jerusalemo phaiwi, bo Subraiyungni nok bisingni tei habugrani noyungni rangkhókrok naui bebak tlang bai kha. Bo teibo Solomon snammani rangchakni phuirok tlang kha.

¹⁰Habugra Rehoboam tei uáisa pitolni phuirok snam phirwi bini noyung duglam mwrwknai tangkrarokni yago yaphar kha.

¹¹Subraiyungni nok bisingo habugra tháng brúm brúmno duglam mwrwknai phuino tubu-ui haino hai mwrwknairok tongmani nok bisingo kiphilwi ton phai-o.

¹²Bo sakno koinene wngmani bai Subraiyungni jolima bini aroni kiphil kha, hakhe bono sokomor súk li ya teibo Judia-o kaham kwrwng se wng si-o.

¹³Hakhe habugra Rehoboam sakno songchaui Jerusalemo bugra chá kha. Rehoboam nokha bisi 41 phuru habugra chána chengwi Jerusalemo nokha bisi 17 jora bugra chá lang kha, bini mung aro tongnani bagwi bebak Israilni amchoirokni bisingo Subraiyung a kamiyungno chong kha. Rehoboamni buma wng kha Ammonjwk, mung khe Nama.

¹⁴Bo samung hamya tang kha, tamni hwn ba bo Subraiyungno khá rwui naituk li ya.

¹⁵Rehoboamni aswk samungrok yaphangni simi páichúk jora diyari Semaia tei diyari Iddoni bosong bijaprogo swijak tongo. Rehoboam bai Jeroboam thak phlai ya khe choba nang lai máng tong lai-o.

¹⁶Rehoboam thwi khe, Daudni kamiyungo phobjak kha tei bini bwsla Abia bini yakchu-o habugra chá kha.