Read Kok Borok 2 BOSONG 13 Bible Online

2 BOSONG 13 - Kok Borok bible

2 BOSONG 13

¹Israilo Jeroboam habugra chámani nokha bisi 18 phuru Abia Juda-o habugra chánani cheng kha.

²Bo Jerusalemo nokha bisik tham jora bugra chá kha. Bini buma wng kha Gibea-o tongnai Urielni bwsajwk Mikaia. Abia bai Jeroboam choba nang lai kha.

³Abia khorok 400,000 phankrak sengkrakrokno tẃiwi choba nang laina nongkhorwi tháng kha tei Jeroboam khorok 800,00 phan gwnang sengkrakrok bai bono kebeng kha.

⁴Hakhe hathái kami Ephraimni Semaraim hachugo bachaui hai hwnwi sa kha, “O Jeroboam tei bebak Israil, ani kók khna di;

⁵Subraiyung Israilni Kaitor, Israilni saka-o mol brúm brúmni bagwi Daud tei bini bosongno bugra chánani bagwi sómni swmai tangjak hwnwi norok saui man ya de?

⁶Hai phano, Nebatni bwsla Jeroboam, Daudni bwsla Solomonni seleng bini bugrano kebengwi bacha kha.

⁷Kisa borok hamyarok bini thani kuthumui Solomonni bwsla Rehoboamno mwkhang sók lai kha, Rehoboam belai chwrai kho, mungsabo si ya, bórokno kasu-ui man li ya.

⁸“Tabuk norok Daudni bosongno Kaitor yapharmani hano kebengna chong lai-o; tamni hwn ba norok belai borok kwbáng tei Jeroboam norokni bagwi snammani rangchakni musuk bwsa mwtai norokni thani tongo.

⁹Norok Subraiyungni ochairok, Aronni bwsarok bai Lebirokno rwkhlaiwi rohorwi kubun hani bororok hai khe norok sakni bagwi ochairok chong lai kha; khoroksa swk beres masa tei mera maksnini tubu-ui sakno kwthar khlainai bo mwtairokni ochai wngnai.

¹⁰Tamo khe chwng le Subraiyung chini Kaitorno monwi tong khu tei bono yabo yakar ya. Aronni bosongni ochairok bórokni barja rwjakmano khlai-o tei Lebirok khe bórokno chubaui tongo.

¹¹Bórok sal brúm phungo tei sanja-o sógwi yapharmung tei satrai motom yapharo; rangchakni songphango auan yapharo, sanja brúm rangchakni thopna-o chati mwchẃngo, tamni hwn ba chwng Subraiyung chini Kaitor dagimano tẃiwi tongo, phiya ba norok khe bono yakar kha.

¹²Nai di, Kaitor bokhorok wngwi chwng bai pal tongo tei bini ochairok norok bai choba nang laina bagwi totrorok sup laijak. O Israilsarok, Subraiyung norokni chuchusongni Kaitor bai choba ta nang lai di, tamni hwn ba norok pái glak.”

¹³Jeroboam bini baksa sengkrakrokno uklok tẃi kasunani rohor kha teirok khe bwskang dak-dak khe nahar laijak.

¹⁴Judarok nai ba, bórok chorsa kitingjak bai kha, bórok Subraiyungni thani kap lai kha; hakhe ochairok totro sub lai kha.

¹⁵Hakhe Judani bororok khorang kotor khe chirik lai kha, bórok chirik lai khe, Kaitor Jeroboam tei bebak Israilrokno Abia bai Judarokni bwskango mechen kha.

¹⁶Israil bororok Judani bwskangni ma khár bai kha, Kaitor bórokno Judairokni yago yaphar kha.

¹⁷Abia bai bini bororok bórokno tanthar-súthar khlai bai kha. Israilni sengkrak kahamrok khorok 500,000 buthar bai kha.

¹⁸Abo hai khe Israilrok aphuru mechenjak kha, Judia khe kwplai wng kha, tamni hwn ba bórok Subraiyung bórokni chuchusongni Kaitorni thani khá beraui tongo.

¹⁹Abia Jeroboamno riphrigwi baksa kamiyung Bethel, Jesana, Ephron tei aboni ganani kamirokno segwi na kha.

²⁰Jeroboam Abia tong lang sak tei bokhorok bachaui man li ya, Subraiyung Jeroboamno swprak khe hakhe bo thwi kha.

²¹Abia khe phan gwnang wngwi bacha kha. Bo khorok chibrwi bwrwirok bai káijak kha tei bo khorok 16 sajwk, khorok 22 sajlarokni bupha wng kha.

²²Tei páithakni Abiani samungrok, bo samarok diyari Iddoni bijabo swijak tongo.