Read Kok Borok 2 BOSONG 14 Bible Online

2 BOSONG 14 - Kok Borok bible

2 BOSONG 14

¹Habugra Abia thwi khe bórok bono Daudni kamiyungo phob kha. Bini yakchu-o Asa habugra chá kha. Bini jora-o nokha bisi chi jora ha-o kwchang kwchang wng kha.

²Asa samung kaham tei Subraiyung bini Kaitorni mokolo chajakmani tẃi khlai kha.

³Bo buini hani háyárok tei ha kuchukrokno nor baiwi, holongrok tei Asera mwtaijwkni mangtangrokno swbai kha.

⁴Bo Judani bororokno Subraiyung bórokni chuchusongni Kaitorni muchungma tẃi khlainani tei bini raida bai phrwngmarokno tẃinani dagi kha.

⁵Bo Judani bebak kamiyungrokni ha kuchukrok tei satrai sókmani háyárokno nor bai kha. Bini jora-o ha-o tong kwchang wng kha.

⁶Bini ha-o tong kwchang wngmani bagwi Judia-o nok krakmarok tang kha. Bisi kwbángma choba wng li ya, tamni hwn ba Subraiyung bono tong kwchang tong rw kha.

⁷Bo Judani bororokno hai hwnwi sa kha, “Phai di, kamiyungrok tang lai anw, abórokno kitingwi chokdeualrok, nok kuchukrok, duglamrok, kasujaknairok, tang lai anw, o ha khe chini mángno, tamni hwn ba chwng Subraiyung chini Kaitorni muchungmani tẃi tong kha, bo chwngno bebak phaising tong kwchang ton rw kha.” Hakhe bórok tang lai kha tei hamcha kha.

⁸Asani sengkrakrok khorok 300,000 Judia hani tongo, bórok phuirok tei olongarok tẃijak, khorok 280,000 borok Benjamin hani tongo, bórok phuirok, chakhlarok tẃijak, bórok bebak phan gwnang mángno.

⁹Ithiopiani Jera khorok 1,000,000 sengkrakrok tei 3000 korai malkhungrok tẃiwi Judia-o hap phaiwi Maresa jora sók phai kha.

¹⁰Asa bo bai choba nang lainani bagwi nongkhorwi thángwi Maresani Sephatha harungo bacha lai kha.

¹¹Asa Subraiyung bini Kaitorni thani hai hwnwi suri kha, “O Subraiyung, nwng hai phan gwnang bai phan kwrwino chubanai tei kwrwi. Subraiyung chini Kaitor, O Subraiyung chini Kaitor chwng nini thani bwkha berajak, nini mung bai se chwng aswk kwbángmarok bai nang lainani phai lai-o. O Subraiyung, nwng se chini Kaitor; borok nono mechenwi ta man thung.”

¹²Hakhe Subraiyung Ethiopiasarokno Asa tei Judarokni bwskango mechen kha, bórok ma khár bai kha.

¹³Asa tei bini bororok bórokno Gerar jora rwkthar lai kha, Ithiopiasarok butharjak bai kha, bórok Subraiyungni bwskango bini sengkrakrok bai mechenjak kha. Judani bororok kwbángma manwirok man bai kha.

¹⁴Bórok bebak Gerar ganarokni kamiyungrokno sokomor bai kha, tamni hwn ba bórok Subraiyungno belai kirijak bai kha. Sengkrakrok bebak kamiyungrogo habwi bebak tong kwrwi na bai kha.

¹⁵Bórok mera tongmani ríni nokrok swbai baiwi kwbángma merarok tei mangingangrok tlang baiwi Jerusalemo kiphilwi tháng bai kha.