Read Kok Borok 2 BOSONG 15 Bible Online

2 BOSONG 15 - Kok Borok bible

2 BOSONG 15

¹Kaitorni Phola Odedni bwsla Ajariani saka-o sók phai khe,

²bo habugra Asa bai malainani nongkhorwi bono hai hwnwi sa kha, “Ani kók khna ja di, habugra Asa tei bebak Judia bai Benjaminni bororok: Nwng Subraiyung bai tong khe, bo nwng bai tongo, nwng bono rutuk khe, bo nwng bai nukjaknai, phiya ba nwng bono yakar khe, bo’-bo nono yakarnai.

³Nokha bisi kwbángma Israilrok kubui Kaitorno karwi, bórokno phrwngnai ochai kwrwi khe raidarok kwrwi khe tong bai kha.

⁴Bórok tekto man phuru, Subraiyung Israilni Kaitorni thani kiphilwi bono ring khe bórok bai nukjago.

⁵Aphuruni jora-o bini thani phai-o thángo wngnairok tong kwchang ma tong ya gwja tamni hwn ba bebak ha gwnangwino urumuru nangjak.

⁶Bórok phondrik-phandrak wngjak, dopha bai dopha kamiyung bai kamiyung nang laijak, tamni hwn ba Kaitor bórokno podrepot sátokma bai sátok kha.

⁷Tamo khe nwng rak di, nini yak ta bel di, tamni hwn ba nwng samung tangmani sokat mannai.”

⁸Asa Odedni[8] bwsla Ajaria[9] kók diyari samano khna khe bo phan man kha, bo bebak ha Judia bai Benjaminni mwtairokno tei bo segwi namani hathái kami Ephraim kamiyungrokni mwtairokno nor bai kha. Bo Subraiyungni nok bwskangni háyáno bo snam phi kha.

⁹Bo bebak Judani, Benjaminni tei Ephraimni, Manaseni tei Simionni bini ha-o tong bainairokno thum kha, borok kwbángma Israilni bini thani phai kha, tamni hwn ba Subraiyung bini Kaitorno bini logi-o tongma bórok nuk bai kha.

¹⁰Bórok Asa habugra chámani nokha bisi chibani talthamni talo Jerusalemo kuthum lai kha.

¹¹A salo bórok Subraiyungni thani choba-o segwi tubumani 700 musukrok tei merarokno yaphar lai kha.

¹²Bórok Subraiyung bórokni chuchusongni Kaitorno bebak bórokni bwkha bai, khúk bai khulumnani bagwi kók kha lai kha.

¹³Khoroksaswk Subraiyung Israilni Kaitorno khulum ya hwn khe butharjaknai, sikla phano, chakra phano, eba chwla phano, bwrwi phano wng thwng.

¹⁴Bórok khorang kotor khe Subraiyungni thani chirigwi, totro sub laiwi tei bokorongrok sub laiwi swmai tang lai kha.

¹⁵Bebak Judanibo bororok tongthok lai kha, tamni hwn ba bebak bórokni bwkha bai tei chongmani bai tang lai kha, bo bórok bai nukjak kha tei Subraiyung bórokno bebak phaisingo tong kwchang tong rw kha.

¹⁶Habugra Asa, bini bumano suda Isiri buma ton li ya, tamni hwn ba bo Asera mwtaijwkni mangtang snam kha. Asa bini mwtaino tan kha, sukhrup kha tei bono Kidron twisa-o hór bai sógwi pái kha.

¹⁷Phiya ba háyá kuchukrok Israil hani norjak li ya. Hai phano bini langma tong lang sak Subraiyungni thani sói khe tong kha.

¹⁸Bo Kaitorni nok bisingo bebak bini bupha yaphar langmarokno tei bini sak yapharmani rangchak, rukphai tei manwi-khwnwirok tubu kha.

¹⁹Asa nokha bisik thamchiba jora habugra chá lang sak aro tei choba wng li ya.