Read Kok Borok 2 BOSONG 16 Bible Online

2 BOSONG 16 - Kok Borok bible

2 BOSONG 16

¹Judani habugra Asa bugra chámani nokha bisik thamchiba phuru-o, Israilni habugra khe Basa, khoroksa phano Judani habugra Asani thani phai-o thángo wngwi man ya tẃi khe Judano segwi naui Ramano tang phi kha.

²Hakhe Asa Subraiyungni nok bisingni tei bini noyungni rangkhókni rangchak tei rukphai naui Damaskoso tongnai Siriyani habugra Benhadadno hai hwnwi saui rohor kha;

³“Ani apha bai nini apha kiching wng laima hai khe, nwng bai ang kiching wng lai anw. Nai di, ang nono rangchak tei rukphai rohoro, tháng di, Israilni habugra Basa bai kiching kak lai si di; hakhe bo ani hani bini sengkrakrokno ma rosa bai anw.”

⁴Benhadad habugra Asani kókno khnaui bini sengkrak bokhorokrokno Israil bai choba nang laina rohor kha. Bórok Ijon, Dan, Abel Bet Maka tei bebak chámungrok tongmani Naptalini kamiyungrokno segwi na lai kha.

⁵Habugra Basa abono khna khe, bo Ramano tangmani mwthagwi samung yakar kha.

⁶Hakhe habugra Asa Judani bororokno tlangwi tei Basa tangmani Ramani holong bai buphang tlangwi abórok bai Geba tei Mijpa kamiyungno tang kha.

⁷A jora-o diyari Hanani, Judani habugra Asani thani phaiwi hai hwnwi sa kha, “Tamni hwn ba nwng Subraiyung nini Kaitorni thani bwkha bera yaui Siriyani habugrani thani bwkha bera kha, aboni bagwi Siriyani habugrani sengkrakrok nini yakni yógwi tháng bai kha.

⁸Ithiopiasarok tei Libyasarok kwbángma sengkrakrok bai khe korai malkhungrok tei korai kasanairok kwrwi diba? Hai phano nwng Subraiyungni thani bwkha beramani bagwi bórokno nini yago yaphar kha.

⁹Tamni hwn ba Subraiyung bebak hayungo bini thani bwkha kubuino chubanani bagwi mokol phiyógwi naiwi tongo. Nwng butua hai khe samung tang kha, hakhe tabukni simi nwng choba nang lai máng ma tongnai.”

¹⁰Hakhe Asa diyarino aboni bagwi jolijak kha tei bono bo alongo chobwi ton kha; abo tẃi kheno Asa baksa bororokno sátok kha.

¹¹Asa habugra chámani yaphang buchuk jora Juda tei Israilni habugrarokni bijabo swijak tongo.

¹²Asa habugra chámani nokha 39 bisi-o khe bo yakungo bemuk hamya bai manjak kha, bini bemuk belaino wngsa kha, hai phano bo Subraiyungno rutuk yaui daktorni thani se chubachu nai si-o.

¹³Bo habugra chámani nokha 41 bisi-o khe Asa thwi kha.

¹⁴Bini sakni bagwi khurmani simalwng Daudni kamiyungo phobjak kha. Bórok mosolarok tei thok motomrogo mokhol lai kha tei bórok bono bórom khlaiwi hórjlai kotor khlai kha.