Read Kok Borok 2 BOSONG 19 Bible Online

2 BOSONG 19 - Kok Borok bible

2 BOSONG 19

¹Judani habugra Jihosapat Jerusalemni bini nogo kaham kwrwng khe kiphil kha.

²Hwn ba diyari khoroksa Hananini bwsla Jehu bo bai malaina thángwi habugra Jihosapatno hai hwnwi sa kha, “Nwng borok hamya Subraiyungno naislernaino de hamjagwi chubanai? Aboni bagwi Subraiyungni aroni jolima nini bagwi nongkhorwi tháng kha.

³Hai phano nini sago kahambo tongo, nwng o hani Asera mwtaijwkno sokomor kha tei nini bwkha Kaitorno rutuk kha.”

⁴Jihosapat Jerusalemo tong phano, bo bororokni thani thángo phai-o wngo. Birsebani simi Ephraimni hathái kami jora bororokno Subraiyung bórokni chuchusongni Kaitorni thani kiphil rwui tubu-o.

⁵Bo Judia hani bebak kamiyungrogo buj thumnairokno chong kha.

⁶Bórokno sa kha, “Norok buj khlaimani hus khe khlai di, norok borokni bagwi ya, Subraiyungni bagwi se buj khlainai; buj thum phuru-o bo norokni logi-o tongo.

⁷Hakhe tabuk, Subraiyungno kiri di, nwng bubo hai samung khlai abono tẃi hus wng di, tamni hwn ba Subraiyung chini Kaitor buj cha ya khlaimani tei rang cháui kaisani bwkhak wngmano soiwi man ya.”

⁸Subraiyungni wngwi Jihosapat Jerusalemobo buj sakhlaina bagwi tei uálai-suklai methepna bagwi kisa swk Lebirokno, ochairokno tei kisa swk Israil dophani tẃiphang chong kha. Bórok Jerusalemo tong bai-o.

⁹Bo bórokno abo hai khe saui rw kha, “Norokni samungno Subraiyungno kiriui, sói khe bini kók naui tei bebak norokni bwkha bai khe ma khlainai.

¹⁰Norokni takhukrok bórokni kamiyungrokni buthar laimani, raida, eba dagimarok, kerongrokno tẃiwi khek laimani norokni thani sók phai khe, bórok Subraiyungni bwskango majra klai ya tẃi khe tei jolima norokni saka-o tei norokni takhukrokni saka-o klai ya tẃi khe bórokno ma phrwngnai. Norok abo hai khlai di, hakhe norok majra berjak glak.

¹¹Nai di, Amaria, ochai bokhorok Subraiyungni bujni bagwi norokni kotor tei Ismaelni bwsla Jebadia, Judani habugrabo bebak habugrani bujni kotor tei Lebirok khe tẃiphangrokni samung khlainai. Kiri ya khe samung tang di tei Subraiyung borok kahamrokni logi-o tong thung.”