Read Kok Borok 2 BOSONG 20 Bible Online

2 BOSONG 20 - Kok Borok bible

2 BOSONG 20

¹Aboni ulo Moabsarok, Ammonsarok tei bórok bai Meunrok[10] khe Jihosapat bai choba nang laina phai lai kha.

²Baksa borok phaiwi Jihosapatno hai hwnwi sa phai kha, “Borok kwbángma nwng bai choba nang lainani Idomni[11] tei twijlang narni phai bai kha. Nai di, bórok Hajajon-tamaro” (abo wng kha, Engedi).

³Hakhe Jihosapat kiriui Subraiyungno ma rutuk kha, bebak ha Juda-o chá yaui ok bukcha tong bainani sakhlai kha.

⁴Judani bebak kamiyungni bororok Subraiyungni chubachu sannani bagwi kuthum lai kha.

⁵Jihosapat Juda bai Jerusalemni kuthum laima-o Subraiyungni nok bisingo nok kwtal bwskango bachaui,

⁶tei hai hwnwi sa kha, “O Subraiyung chini chuchusongni Kaitor, nwng chuknohani Kaitor ya diba? Nwng bebak ha sakani dopharokno nai ya de? Nini yago se bebak phanrok tongo tei nono kebo kebengwi man ya.

⁷O chini Kaitor, nwng ba Israil bororokni bwskango o ha-o tongnairokno rwkhlaiwi rohorwi nini kiching Abrahamni bosongni thani yaphar ya de?

⁸Bórok oro tong lang kha tei nini bagwi bórok aro nokthar tangwi hai hwnwi sa kha,

⁹‘Tumungno mungsa swk dobrok chini saka-o klai phai khe, abo sátokma, buj,[12] bok eba asari, manjak phano wng thung, hakhe chwng aphuru o nokthar bwskango, abo khe nini bwskango bachanai, tamni hwn ba nwng o nogo tong kha. Chwng tekto man phuru chwng nini thani kapnai, hakhe nwng chini sanmano khnaui chwngno mwthangnai.’

¹⁰Tabuk nai di, Ammon, Moab tei hachuk Seirni bororokno Israilrok ha Ijipni phai phuru-o bórok o borokno sek rw li ya, hakhe bórok sokomor yaui narwk kha.

¹¹Tabuk bórok nwng rwmani hani chwngno rwkhlaiwi rohorwi yagul sunani phai lai kha.

¹²O chini Kaitor, nwng bórokno jera na glak diba? Chwngno kebengwi phai bainai aswk borok kwbángmarokni thani chwng le phan kwrwi se. Chwng tamo khlainai saui man ya; phiya ba chwng nono se naisaui tong ja-o.”

¹³Bebak Judani bororok bwsarok tei bórokni bihiksong bai khe Subraiyungni bwskango bacha lai kha.

¹⁴Hakhe Subraiyungni Phola luku kuthum laima-o, khoroksa Asap beremni Lebi Sakariani bwsla Jahasielni saka-o sók phai kha. Bini bosong wng kha Benaia, Jeiel, Matania.

¹⁵Bo hai hwnwi sa kha, “Habugra Jihosapat tei Jerusalemo tong bainai bebak Judani bororok ani kókno khna di, Subraiyung norokno hai hwnwi sa-o, ‘Ta kiri di tei aswk borok kwbángma hwnwi bwkha ta bái di, choba norokni ya, abo Kaitorni se.

¹⁶Khwna bórok Sij tẃi khe phainai aphuru bórok bai nang laiwi di, norok bórok bai harung páithak Jeruel hasing panthorni bwkhak malainai.

¹⁷Norok o choba-o nang laina nang glak, norok thir khe bachaui tong di, Subraiyung norokno kwplai khlainai, Juda bai Jerusalem,’ ta kiri di, bwkha ta bái di, khwna-o bórok bai nang lai di, Subraiyung norok bai tongnai.”

¹⁸Hakhe Jihosapat ha-o bokhorok klaiwi bom kha tei bebak Juda bai Jerusalemo tongnairok bokhorok bomwi Subraiyungno khulum lai kha.

¹⁹Kohat tei Kora bosongni Lebirok bachaui Subraiyung Israilni Kaitorno khorang kotorma bai khe lob lai kha.

²⁰Bórok phung aidrobo bachaui Tekoani hasing panthoro tháng lai kha, bórok tháng lai phuru khe Jihosapat bachaui sa kha, “Juda tei Jerusalemo tongnairok ani kókno khna di, norok Subraiyung Kaitorno poito chá di, norok songchajaknai, bini diyarirokno poito chá di, norokni samung chanai.”

²¹Bororokno sẃngwi bo Subraiyungni thani rwchapnairok tei bini mung kwtharno lobnairok tei sengkrakrokni bwskango himnani bagwi chong kha, bórok, “Subraiyungno hambai rw di. Tamni hwn ba bini hamjakma mol brúm brúm tongo,” hwnwi lob lai-o.

²²Bórok rwchapnani, lobnani cheng khe, Subraiyung Juda bai nang laina phainai Ammon, Moab tei hachuk Seiro mechen kha.

²³Ammon tei Moabni bororok hachuk Seir (Idom) rokno kebengwi bachaui bórokno buthar bai kha, bórok Idomsarokno buthar bai khe sak bai sak buthar lai phi kha.

²⁴Judani borok hasing panthorni nok kuchugo sók phaiwi bórok borok kwbángma bwkhak naharwi nuk kha; aro mang kwthwirok bebak ha-o klaiwi tongjak; khoroksa phano yógwi man li ya.

²⁵Jihosapat tei bini bororok bórokni manwi-khwnwirokno na lainani phai khe kwbángma mal-matarok,[13] manwirok, rírok tei manwi kahamrok, bórok tẃiwi se man bai li ya khe na lai kha. Bórok saltham jora na lai kha, manwirok kwbángma aro tongo.

²⁶Nokha salbrwini salo bórok Beraka[14] harungo kuthum laiwi Subraiyungno lob lai kha. Aboni bagwi tini jora abo Beraka harung hwnjago.

²⁷Hakhe Jihosapatno bokhorok songwi bórok tongthogwi Jerusalemo kiphilwi tháng kha, tamni hwn ba Subraiyung bórokni arirokno mechen kha.

²⁸Bórok Jerusalemo Subraiyungni nogo budukni tammungrok bai totrorok bai phai lai kha.

²⁹Bebak hani dopharok Subraiyung Israilni arirokno mechen kha hwnwi khna bai khe belai kirijak bai kha.

³⁰Hakhe Jihosapatni jora-o kwchang kwchang wng kha tamni hwn ba Kaitor bono bebak phaising tong kwchang tong rw kha.

³¹Abo hai khe Jihosapat Judia-o habugra chá lang kha; bo habugra chána cheng phuru nokha bisik thamchiba wng kha, bo Jerusalemo nokha bisik nwichiba jora habugra chá kha. Bini buma wng kha Silhini bwsajwk Ajuba.

³²Bini bupha Asa himmani lama tẃi him kha, aboni uphil li ya; bo Subraiyungni mokolo chajakmani haino khlai kha.

³³Phiya ba háyá kuchukrok norjak li ya; bororok bórokni chuchusongni Kaitorni thani bwkha bera li ya gwja.

³⁴Jihosapat aswk samung khlai langmani yaphangni simi páithak jora, abo Hananini bwsla Jehuni bosong bijabo tei abo Israil habugrarokni bijabo swijak tongo.

³⁵Aboni ulo Judani habugra Jihosapat Israilni habugra Ahajaia bai kiching wng kha, bo belai samung hamya tangnai.

³⁶Bórok Esiongebero Tarsiso thángnai rung kotor snam lai kha.

³⁷Phiya ba Maresa-o tongnai Dodabahuni bwsla Eliaser Jihosapatno hai hwnwi khorai kha, “Tamni hwn ba nwng Ahajaia bai kiching kha kha, Subraiyung norok snammano sokomornai.” Rung kotor báiwi pái kha, Tarsiso thángwi man li ya.