Read Kok Borok 2 BOSONG 21 Bible Online

2 BOSONG 21 - Kok Borok bible

2 BOSONG 21

¹Jihosapat thwi khe bupha bai baksa Daudni kamiyungo phobjak kha tei bini bwsla Jehoram bini yakchu-o habugra chá kha.

²Habugra Jihosapatni bwsla Jehoramni takhuk khorokdok tongo: Ajaria, Jehiel, Sakaria, Ajaria, Mikail tei Sephatia.

³Bórokni bupha bórokno kwbángma hilirok, rangchak, rukphai tei morokma manwirok rw kha tei Judani kamiyung krakmarokno yaphar kha; phiya ba Jehoram khe bwsla okra wngma bai bono yakchu snam kha.

⁴Jehoram bini buphani achukthayungo achugwi rak súk khe, bini bebak takhukrokno tei baksa tẃiphangrokno buthar kha.

⁵Jehoram habugra chá phuru nokha bisi thamchinwi wng kha, bo Jerusalemo nokha bisi char jora habugra chá lang kha.

⁶Bo Israilni habugrarok himmani lama-o himwi Ahabni núkhung khlaimani hai khlai kha; tamni hwn ba Ahabni bwsajwk wng kha bini bihik, bo Subraiyungni mokolo chajak ya samungrok khlai kha.

⁷Phiya ba Subraiyung Daudni núkhungno sokomor li ya, tamni hwn ba bo Daud bai swmai tang kha, bo bono tei bini bwsarokno mol brúmni chati chẃng rwnai hwnwi swmai tangjak.

⁸Jehoram bugra chámani molo Idom Judano kebengwi bórokni sakni habugra song lai kha.

⁹Hakhe Jehoram bini sengkrak bokhorokrok bai khe, bebak korai malkhungrok tlangwi horni bisingo bono tei bini korai bokhorokrokno kiting phai bainai Idomsarokno mechen kha.

¹⁰Hakhe Idom tabuk jora Judano kebengwi máng tongo; a jora-o Libna bo kebeng kha, tamni hwn ba bo Subraiyung bini chuchusongni Kaitorno yakar kha.

¹¹Teibo bo Judani hathái kamirogo háyá kuchukrok snam kha tei Jerusalemni bororokno sói khe tẃi li ya tei Judano lama koró rw kha.

¹²Daud Eliani kangsa kóktun Jehoramni thani sók phai khe, aro swijak tongo, “Subraiyung, nini nwpha Daudni Kaitor hai hwnwi sa-o, ‘Nwng nini nwpha Jihosapat himmani lama-o him li ya, eba Judani habugra Asa himmani lama-obo him li ya.

¹³Phiya ba Israilni habugrarok himmani lama-o se him si-o tei Juda bai Jerusalemno Ahab lama koró rwmani hai khe koró rw kha tei nwng nini takhukrokno buthar bai kha, bórok nini slái kaham kuk gwja.’

¹⁴Nai di, ‘Subraiyung nini bororokno, nini bwsarokno, nini hiksongno tei nini bebak tongmani manwirokni saka-o sátokma tubunai.’

¹⁵Nini sakbo haino bubukni bemuk bai manjaknai, bubukrok nongkhorwi phai ya sak abo belai láisuknai.”

¹⁶Ithiopia gana-o tong bainai Philistiasarok bai Arabrokno Subraiyung joli rwui Jehoram bai choba nang lai rw kha.

¹⁷Bórok Juda-o hap phaiwi habugrani noyungo tongmani bebak rang-rírok, bini bwsla kusu Jehoahasno karwi bebak bini bwsarok tei bihiksongrokno tlang bai kha.

¹⁸Abórokni ulo Subraiyung bono tei hamya abo tẃi bubukni bemuk bai manjak rw kha.

¹⁹Hamya wngmani ulo khe nokha bisik nwini páithago bemukni bagwi bubuksarok nongkhorwi phai bai kha, hakhe bo belai tekto khe ma thwi kha. Bini bororok búchusongno khlaimani hai khe bono bórom khlaiwi hór sók lai li ya.

²⁰Bo nokha bisi thamchinwi phuru habugra chána chengwi Jerusalemo nokha bisi char jora habugra chá lang kha. Bo thwi phuru kebo bwkha nang li ya. Bórok bono Daudni kamiyungo phob lai kha, tamo khe habugrarokni simalwngo ya.