Read Kok Borok 2 BOSONG 23 Bible Online

2 BOSONG 23 - Kok Borok bible

2 BOSONG 23

¹Nokha bisi kaisnini ulo ochai Jehoiada kiri ya khe khorokba sengkrak bokhorokrok bai swmai tang lai kha; bórok Jehoramni bwsla Ajaria, Jehohananni bwsla Ismael, Obedni bwsla Ajaria, Adaiani bwsla Maseia tei Jikhrini bwsla Elisaphat.

²Bórok Judani bebak kamiyungrogo thángwi Lebirok tei Israil núkhungni bokhorokrokno Jerusalemo tubu lai kha.

³Bebak kuthumnairok Subraiyungni nok bisingo habugra Joas bai swmai tang lai kha. Jehoiada bórokno hai hwnwi sa kha, “Nai di, habugrani bwslano, Subraiyung Daudni bosongni kók samani hai, bo habugra chá si thung.

⁴Chwng khe omo hai samung ma khlainai. Ochairok tei Lebirok Sabat salo samungo phai khe, bodol dolthamni bisingo dolsa noktharni duglamrok ma mwrwknai.

⁵Tei dolsa khe habugrani noyung ma mwrwknai tei dolsa khe thonglani duglam ma mwrwknai tei bebak bororok khe Subraiyungni nok bisingo ma kuthumnai.”

⁶Khoroksa phano ochairok tei samung khlaiwi tongnai Lebirokno karwi Subraiyungni nok bisingo habwi man glak. Bórok habwi mano tamni hwn ba bórok khe kwthar tei bebak bororok khe Subraiyungni kók ma khna bainai.

⁷Lebirok khe habugrano kitingwi yago sengrok tẃiwi ma mwrwknai, Subraiyungni nok bisingo hapnai bórok butharjaknai, habugra nok bisingo tong phuru, phataro tháng phuru bini logi-o ma tongnai.

⁸Lebirok tei bebak Judani bororok ochai Jehoiada samani hai khe khlai bai kha. Bórok sak sakni borok sabat salo samungo phainai tei Sabat salo samung yakarwi thángnaino tubu kha, tamni hwn ba ochai Jehoiada bodol kaisano phano yakarwi rohor ya.

⁹Ochai Jehoiada tẃiphangrokno Subraiyungni nok bisingo tongmani habugra Daudni olongarok tei kotor, kotoi phuirokno yaphar kha.

¹⁰Bo bebak bororokno yago seng tẃijak máng khe nokni salgrabaini simi salsibai bwkhak jora, habugrano kitingwi háyá gana-o mwrwk rwui ton kha.

¹¹Hakhe bo habugrani bwslano kariui tubu-ui bini bokhorogo motok thup rwui, kaisa kerong bijap yapharwi, bono habugra hwnwi sakhlai kha tei Jehoiada bai bini bwslasong bono thok phul laiwi sa kha, “Habugra umor kolok wng thung.”

¹²Athalia bororok khachik laimani tei habugrano lob laimani khorang khna hor khe, bo bororok tongmani Subraiyungni nogo tháng kha.

¹³Bo aro habugrani duglam kwtal ganani thongla gana-o bachajak, sengkrak bokhorokrok, totro supnairok, habugrani gana-o tei bebak hani bororok tongthok laiwi, totro sup laiwi tei rwchapnairok tamjaknai manwirok bai khe pandano tẃither lai-o. Athalia bini rí sichigwi hai hwnwi chirik kha, “Bugrano kebengnai.”

¹⁴Hakhe ochai Jehoiada sengkrak bokhorokrokno kariui tubu-ui bórokno hai hwnwi sa kha, “Mwrwknairokni kwcharo o bwrwino kariui tubu di, bini logi-o thángnai borokbo butharjaknai.” Tamni hwn ba ochai hai hwnwi sa kha, “Subraiyungni nok bisingo o bwrwino ta buthar di.”

¹⁵Hakhe bini yago romwi habugrani nokni korai duglamo bórok bono buthar kha.

¹⁶Jehoiada bo bai baksa pal khe habugra Joas tei bebak bororok Subraiyungni borok wngwi tong lainani hwnwi swmai tang lai kha.

¹⁷Hakhe bebak bororok Bal mwtaini nogo thángwi bini háyárok, bini mangtangrok, phondrik-phandrak khe swbai lai kha tei bórok háyá bwskango Bal mwtaini ochai Matanno tanthar lai kha.

¹⁸Jehoiada Subraiyungni nok mwrwknai ochairok tei Lebirokno chong kha, Daud khlai langma hai khe bórok Musini kerongo swijak tongma hai khe Subraiyungni nok nainai tei sógwi yapharmani tei Daud dagima hai khe tammungrok tamwi rwchapnani barja chongjak kha.

¹⁹Jehoiada Subraiyungni nokni duglamo borok cha yarok habwi man ya tẃi khe aro mwrwknairokno ton kha.

²⁰Jehoiada sengkrak bokhorokrok, kolok kotorrok, habugrarok tei hani bebak bororok bai pal khe habugrano Subraiyungni nok bisingni nongkhor rwui tubu-ui habugrani nokni sakani duglam tẃi bwtang khe him laiwi habugrano bini achukthayungo achuk rw lai kha.

²¹Hakhe bebak hani bororok tongthok lai kha, Athalia butharjakmani ulo kamiyung siring siring wng kha.