Read Kok Borok 2 BOSONG 24 Bible Online

2 BOSONG 24 - Kok Borok bible

2 BOSONG 24

¹Joas nokha bisisni phuru habugra chána chengwi Jerusalemo nokha bisik brwichi jora habugra chá lang kha, bini buma wng kha Birseba-o tongnai Sibia.

²Ochai Jehoiada kwthang tong lang sak Joas Subraiyungni mokolo chajakmani haino khlai kha.

³Jehoiada bugra Joasni bagwi khoroknwi bwrwi chong kha. Tei bo bwsa chwla tei bwrwirok man kha.

⁴Aboni ulo Joas Subraiyungni nokno tang phirnani chong kha.

⁵Bo ochairok tei Lebirokno thumwi bórokno sa kha, “Judani kamiyungrogo thángwi nokha bisi brúm Kaitorni nok tangnani bagwi bebak Israilrokni thani rang thumwi di, dakti khe khlai di.” Phiya ba Lebirok dakti khe khlai li ya.

⁶Hakhe habugra Jehoiada bokhorokno ringwi sa kha, “Subraiyung tongmani ríni nokni bagwi Kaitorni seleng Musi bai Israil lukurokni saka-o teks chongjakmano Juda tei Jerusalemni tubunani bagwi nwng tamni Lebirokno thol ya?”

⁷Bwrwi cha ya Athaliani bwsarok Kaitorni nokno swbaiwi, Subraiyungni nok bisingni yapharmani manwirokno Bal mwtaini samungo phnang kha.

⁸Hakhe habugra Lebirokno kaisa bokhok snamna dagi kha, hakhe abono Subraiyungni nokni phatarni duglamo ton kha.

⁹Kaitorni seleng Musi hasing panthoro dagiui klangmani hai khe Subraiyungni bagwi teks tubunani bebak Juda tei Jerusalemo sakhlaijak kha.

¹⁰Abo bai bebak tẃiphangrok tei bororok tongthogwi teks tubu-ui bokhokno supungwi rw lai kha.

¹¹Aroni bokhogo rang bángma nuk khe habugrani tang okra bai ochai okrani samung tang okra phaiwi bokhokni rangno lukhlaiwi naui arono kiphilwi ton phiro. Abo hai khe bórok sal brúm khlaiwi rang kwbángma thum lai-o.

¹²Habugra bai Jehoiada rangno Subraiyungni nokni barja manjak bororokno yapharo, bórok Subraiyungni nok tang phina bagwi holongni samung tangnairok, mistrirokno, sorni samung tangnairok, pitolni samung tangnairokno naharwi tang rw-o.

¹³Hakhe samung tangnairok saktharwi tak lai kha, bórok Kaitorni nokno swkang phuruni hai khe tangwi krakma khe rw lai kha.

¹⁴Bórok tang baiwi pái khe, yak bára tong rwkmani rangno habugra tei Jehoiadani thani tubu lai kha, abo bai Subraiyungni nokni bagwi manwirok tei khulum phuru tei sógwi yaphar phuru tei satraini bagwi manwirok, rangchak tei rukphaini snamjak kha. Jehoiada kwthang tong lang sak Subraiyungni nogo sógwi yapharmungrok sal brúm yapharjago.

¹⁵Phiya ba Jehoiada chakra wng súgwi 130 umor bisi-o thwi kha.

¹⁶Bórok bono Daudni kamiyung habugrarok bai baksa khe phob lai kha, tamni hwn ba bo Israilrokni bagwi, Kaitorni bagwi tei noktharni bagwi samung kaham tang lang kha.

¹⁷Jehoiada thwimani ulo Judani tẃiphangrok habugrano mothor khe bórokni kókno ma khna kha.

¹⁸Bórok Subraiyung bórokni chuchusongni Kaitorni nokno yakarwi mwtairok tei Aserano ma khulum bai kha. Bórokni o sumsokni bagwi Kaitorni jolima Juda tei Jerusalemni saka-o sók phai kha.

¹⁹Hai phano Subraiyung bórokno kiphil rwna bagwi bórokni thani diyarirokno rohorwi saui khna rw-o, tamo khe bórok khna li ya.

²⁰Hakhe Kaitorni Phola ochai Jehoiadani bwsla Sakariano kobolwi bororokni slái kuchugo bachaui bórokno hai hwnwi sa kha, “Kaitor hai hwnwi sa-o: Norok tamni Subraiyungni dagimarokno khna ya wngwi hamwi man ya wngwi tong? Norok Subraiyungno yakarmani bagwi bo’-bo norokno yakar kha.”

²¹Phiya ba bórok bono kebeng lai kha, habugra dagimani bai bórok Sakariano Subraiyungni nokni nokhla-o holong bai khitar lai kha.

²²Habugra Joas bono Sakariani bupha Jehoiada khairokmani kókno pogwi thángwi bini bwslano buthar kha. Sakaria thwina nai phuru bo hai hwnwi sa kha, “Subraiyung omono naiwi yagul su thung.”

²³Bisi páithago Siriyani sengkrakrok Joasno kebengwi batham kha lai phai kha. Bórok Juda bai Jerusalemo phaiwi bebak tẃiphangrokno buthar baiwi, bórokni tong kwrwi manwi Damaskoso tlang bai kha.

²⁴Siriyani sengkrakrok borok báng ya khe phai lai phano, Subraiyung bórokni yago kwbángma sengkrakrokno yaphar kha; tamni hwn ba bórok Subraiyung bórokni chuchusongni Kaitorno yakar kha. Abo hai khe bórok Joasno sátok kha.

²⁵Bono kwbángma yókhak-sukhak khe klangwi tháng bai khe, bini selengrok bono kebengwi ochai Jehoiadani bwsla Sakariano butharmani bagwi bini thuyamo bono buthar kha. Hakhe bo thwi kha, bórok bono Daudni kamiyungo phob lai kha, tamo khe bórok bono habugrarokni simalwngo phob lai li ya.

²⁶Bono kebengnairok wng kha, Ammono tongnai Simeatni bwsla Jabad tei Moabo tongnai Simritni bwsla Jehosabad.

²⁷Bini bwslasongni kók tei bini bagwi kók diyari sajakma tei Kaitorni nok tangma kókrok habugrarokni bijabo swijak tongo. Bini bwsla Amajia bini yagulo habugra chá kha.