Read Kok Borok 2 BOSONG 26 Bible Online

2 BOSONG 26 - Kok Borok bible

2 BOSONG 26

¹Bebak Judani bororok nokha bisi chidokni chwrai Ujiano bini bupha Amajiani yakchu-o habugra chá rw lai kha.

²Amajia thwimani yagulo Ujia Elotno segwi na phirwi aro kamiyung tang kha.

³Ujia nokha bisi chidok phuru-o habugra chána chengwi Jerusalemo nokha bisi bachinwi jora habugra chá lang kha. Bini buma khe Jerusalemni Jekolia.

⁴Bini bupha Amajia bebak khlai langmani hai khe, bo Subraiyungni mokolo chajakmani haino khlai kha.

⁵Bo Sakaria kwthang tong sak Kaitorno mon kha, tamni hwn ba bo Kaitorno kirina phrwng kha, bo Kaitorno monwi tong sak Kaitor bono hamari rw kha.

⁶Bo Philistiasarok bai choba nang laina nongkhorwi thángwi Gat, Jabnia tei Asdodni kamiyungni chokdeualrokno swbai baiwi Asdod amchoi-o tei Philistiarogo kamiyungrok tang kha.

⁷Philistiasarokno, Gurbalo tong bainai Arabrokno tei Meunsarokno mechenna bagwi Kaitor bono chuba kha.

⁸Ammonsarok Ujiano teks ma rw-o, bo belai phan gwnang wngma bai bini mung Ijipni ha ari jora mung tháng kha.

⁹Phiya Ujia Jerusalemo nok busuni duglam, harungni duglamo; harungni duglamo, kokoi khe thángmani jidolo nok kuchukrok tang kha.

¹⁰Bo hasing panthorobo nok kuchuk tang kha tei kwbángma twikhorrok khur kha, tamni hwn ba bini Sephela-o tei ha panthoro kwbángma merarok tongo, hathái-o tei ha kaham jidolo bini tangnairok tei angur bari tangnairok tong bai-o, tamni hwn ba bo’-bo haino tangwi chána belai hamjago.

¹¹Ujiani choba nang laiwi mannai sengkrakrok habugrani sengkrak bokhorok Hananiani tẃi khe tei tẃiphang Jeiel bai Maseia bodol snamwi chongwi rwmani hai khe tiyar tong lai-o.

¹²Bebak buphani núkhungni bosongni phan gwnangrok wng kha 2,600.

¹³Bórokni yago 307,500 phan khe choba nang laiwi mannai tei habugrano bini arino mechenna chubaui mano.

¹⁴Ujia bebak sengkrakrokni bagwi phuirok, olongarok, khorok katijaknai, chumjaknairok, badukhungrok, chakhlarok tei holongni badulrok tiyar khlai kha.

¹⁵Jerusalemo bini kwrwng bororok nok kuchugo tongwi tei nok buchugo tong twtwi chakhla bai holong kotor kok hornani bagwi manwi snam kha, bo kwbángma chubachu manẃi phan manmani bai bini mung kotor wng kha.

¹⁶Hwn ba Ujia phan wng khe kung chuk kha; abo baino bo komor kha. Subraiyungni nokthar bisingo habwi satrai sókmani háyá-o satrai sógwi Subraiyung bini Kaitorni mungno dera rw kha.

¹⁷Phiya ba ochai Ajaria khorok 80 phan gwnang Subraiyungni ochairok bai khe habugrano rwkthar lai kha.

¹⁸Bórok habugra Ujiano bathak rwui hai hwnwi sa kha, “Ujia nwng Subraiyungni thani satrai sókthai kwrwi, abo Aron bosongni ochairok simi se satrai sóknani bagwi yapharwi kwthar khlaijak. Háyáni nongkhorwi tháng di, nwng samung cha ya khlai kha; abo bai nwng Subraiyung Kaitorni bórom man glak.”

¹⁹Hakhe Ujia belai jolijak kha, bini yago satrai sóknani bagwi dugol tẃijak, bo ochairokno joli khe Subraiyungni nokni háyá gana-o ochairokni bwskango bini kwpalo biyadi kwpha kha.

²⁰Ochai bokhorok Ajaria tei bebak ochairok, bono nai ba bini murku-o biyadi wng kha. Bórok bono dakti khe phataro kariui rohor kha; bo’-bo do lang kha, tamni hwn ba Subraiyung bono sátok kha.

²¹Habugra Ujia thwimani jora biyadi wng kha, biyadi wngma bai bo nok kagwi ma tong kha; Subraiyungni nogo bo ma hap li ya. Tei bini bwsla Jotham habugrani nokno tei hano naikini khlai kha.

²²Habugra Ujia aswk samung yaphangni simi páithak jora khlai langmani Amojni bwsla diyari Jisaia swiwi narwk kha.

²³Ujia thwi khe habugrani simalwngo bono phob lai kha, phiya ba bórok hai hwnwi sa kha, “Bo biyadi chájak.” Bini bwsla Jotham bini yakchu-o habugra chá kha.