Read Kok Borok 2 BOSONG 28 Bible Online

2 BOSONG 28 - Kok Borok bible

2 BOSONG 28

¹Ahas nokha bisik nwichi umor phuru-o habugra chána chengwi Jerusalemo nokha bisi chidok jora habugra chá lang kha. Bo Daud hai khe Subraiyungni mokolo chajakmani hai khlai li ya.

²Phiya ba bo Israil habugrarokni lama-o se him si-o. Bo Bal mwtaini mangtang snam kha.

³Bo Hinom harungo satrai sók kha, Israil bororokni bwskango rwkhlaiwi rohormani dopharok khlaimani hai khe bini bwslasongno sógwi yaphar kha.

⁴Bo yapharmung yaphar kha, ha kuchukrogo tei hathái-o buphang kwkhrang yaphangrogo satrai sók kha.

⁵Abo baino Subraiyung bini Kaitor bono Siriyani habugrani yago yapharwi mechen kha, bini borok kwbángmano khaui Damaskoso tlang kha. Bo Israilni habugrani yagobo yapharjagwi mechenjak kha.

⁶Remaliani bwsla Peka Judani sengkrakrokno salsa-o khorok 120,000 borok buthar kha; bórok bebak phan gwnang mángno, phiya ba bórok Subraiyung bórokni chuchusongni Kaitorno yakarmani bai abo hai wng kha.

⁷Ephraimni phan gwnang Jikhri, habugrani bwsla Maseia tei noyungni bokhorok Ajrikam tei habugrani yagra yaktwk Elkanano buthar kha.

⁸Israilni bororok bórokni sandairokno 200,000 bwrwirok, chwrairok, sajwkrok, khaui tlang kha, bórok kwbángma manwirok tubu kha tei bórokno Samaria-o tubu kha.

⁹Phiya ba Oded hwnwi khoroksa Subraiyungni diyari aro tongo; bo Samaria-o phai bainai sengkrakrok bai malaina thángwi bórokno hai hwnwi sa kha, “Nai di, Subraiyung norokni chuchusongni Kaitor Judiano joliui, bórokno norokni yago yaphar kha, phiya ba norok bórokno belai joliui butharmani bai chuknoha jora sógwi kha.

¹⁰Tabuk norok Judia bai Jerusalemni chwla bwrwirokno norokni seleng snamna nai-o. Norokbo Subraiyung norokni Kaitorni bwskango sumsok khlai ya de?

¹¹Tabuk khna di, norok tubumani norokni sandairokno kiphilwi rohor di, tamni hwn ba Subraiyungni jolima norokni saka-o klainai.”

¹²Ephraimni bokhorokrok Jehohananni bwsla Ajaria, Mesilemotni bwsla Berekia, Salumni bwsla Jehiskia tei Hadlaini bwsla Amasa chobani kiphilnai sengkrakrokno kebengwi bacha laiwi

¹³bórokno hai hwnwi sa kha, “O khajak bororokno norok oro ta tubu di, chwng Subraiyungni thani cha ya wng twtwi norok teibo dera rwna nai-o, chini sumsok kwbángma tei Israilni saka-o Kaitorni joli ma tongo.”

¹⁴Hakhe sengkrakrok khajakrokno tei segwi tubumani manwirokno tẃiphangrok tei lukurokni bwskango yakarwi klang kha.

¹⁵O chongjak tẃiphang bokhorokrok, bwrwirok khajakrokno tlangwi bórokno segwi tubumani manwi naui rírok kan rw bai kha. Bórokno rí-chum rw bai kha, yaklap ka rw bai kha tei chána nungnabo rw kha tei thok phul rw kha. Borok kebelrokno khe korai chirka saka-o boksaui bórokni sandairokni thani Jeriko-o, tal buphangrok tongmani kamiyungo tubu kha. Hakhe Israilrok Samaria-o kiphilwi tháng lai kha.

¹⁶A jora-o habugra Ahas Asiriyani habugrano chubachu san hor kha.

¹⁷Tamni hwn ba Idomsarok Judia-o tei uáisa habwi mechen phaiwi khajakrokno tlang bai kha.

¹⁸Hakhe Philistiasarok kamiyungni Sephela tei Judani Negebo hap phaiwi Bet-semes, Aijalon, Gederot tei kamiyung Soko tei aroni kamirokno, Timna tei aroni kamirokno, Gimso tei aroni kamirokno segwi naui aro tong lai kha.

¹⁹Israilni habugra Ahasni bagwi Judano hache-o tikhlai kha, tamni hwn ba bo Judano belai sátogwi Subraiyungni thani sói khe tong li ya.

²⁰Hakhe Asiriyani habugra Tilgat-pilnesar bono kebengwi chuba ya khe sátok kha.

²¹Hakhe Ahas Subraiyungni nokni, habugrani nokni tei tẃiphangrokni rangkhókrok naui Asiriyani habugrano rw kha, tamo khe abo bai mungsa chubachu man li ya.

²²Bo tekto manẃi tong phuru khe habugra Ahas Subraiyungni thani teibo kwbáng sumsok khlai kha.

²³Bono mechennai Siriyarokni mwtairokni thani yapharmungrok yapharwi hai hwnwi sa kha, “Siriyani mwtairok bórok habugrarokno chuba kha, bórok ano chuba thung hwnwi angbo bórokni thani yapharmung yapharnai.” Abo bai bo tei bebak Israilrok komor kha.

²⁴Ahas bebak Subraiyungni nok bisingni manwi-khwnwirokno thumwi naui phondrik-phandrak khe swbaiwi rw bai kha, bo Subraiyungni nokni duglamno kholobwi Jerusalemo kupulung háyárok snam kha.

²⁵Judani kamiyung brúmono kubun mwtairokni thani satrai sóknani bagwi háyá kuchukrok snamwi Subraiyung bini chuchusongni Kaitorno joli rw kha.

²⁶Bo aswk samung khlai langmani yaphangni simi páithak jora abo Juda tei Israilni habugrarokni bijabo swijak tongo.

²⁷Ahas thwi khe, Jerusalemo phob lai kha, phiya ba bono habugrarokni simalwngo tubu li ya. Bwsla Hejekia bini yakchu-o habugra chá kha.