Read Kok Borok 2 BOSONG 29 Bible Online

2 BOSONG 29 - Kok Borok bible

2 BOSONG 29

¹Hejekia nokha bisi nwichiba phuru-o habugra chána chengwi Jerusalemo nokha bisi 29 jora tẃi habugra chá lang kha. Bini buma wng kha Sakariani bwsajwk Abia.

²Bini búchu Daud khlai langmani hai khe Subraiyungni mokolo chajakmani haino khlai kha.

³Bo habugra chámani bisi yaphangni talo Subraiyungni nokni duglamno phiyogwi abórokno snam phi kha.

⁴Bo ochairokno tei Lebirokno salka bwkhakni lama bupra-o kuthum rwui,

⁵bórokno hai hwnwi sa kha, “Khna bai di, Lebirok, norokni sakno kwthar khlai bai di tei Subraiyung norokni chuchusongni Kaitorni nokno kwthar khlai di tei nokthar dera rwnairokno nor bai di.

⁶Tamni hwn ba chini chuchusong Kaitorni thani sói khe tong ya khe Subraiyung chini Kaitorni mokolo chajak ya tẃi samung khlai bai kha; bórok bono yakarwi bórok uphilwi Subraiyung tongmani bwkhakni uslu-ui uphil kha.

⁷Bórok noktharni duglam kholobwi, chati butharwi Israilni Kaitorni kwthar thai-o satraibo sók lai li ya tei sógwi yapharmungrokbo yaphar lai li ya.

⁸Abo baino Subraiyungni jolima Juda tei Jerusalemni saka-o klai kha, norok mokol baithang nukmani hai khe, bo bórokno kirimasingcha, uanamasingcha tei selengmasingcha snam kha.

⁹Nai di, chini chuchusong choba-o butharjak bai kha tei chini hikrok tei chini bwsa-bẃtẃirok khajagwi tlangjak bai kha.

¹⁰Subraiyung Israilni Kaitorni thamchi chini sakani norjak thung hwnwi tabuk bo bai kók kha lainani bagwi ani bwkha-o chong kha.

¹¹Ani sajlarok, sak nang ya ta wng bai si di, Subraiyung bini bwskango bachanani, bono monnani tei bini thani satrai sóknani bagwi norokno se chongo.”

¹²Hakhe Lebirok bacha lai kha, Kohat beremni khe Amasaini bwsla Mahat, Ajariani bwsla Joel. Merari beremni khe Abdini bwsla Kis, Jehalelelni bwsla Ajaria. Gerson beremni khe, Jimani bwsla Joa, tei Joani bwsla Eden.

¹³Elijaphan beremni khe, Simri tei Jeuel. Asap beremni khe, Sakaria tei Matania.

¹⁴Heman beremni khe, Jehuel tei Simei. Jeduthun beremni khe, Semaia tei Ujiel.

¹⁵Bórokni takhukrokno kuthum rwui bebak sakno kwthar khlai lai kha, bórok habugra tholmani hai khe tei Subraiyungni kók tẃi noktharno kwthar khlaina tháng lai kha.

¹⁶Ochairok kwthar khlainani bagwi Subraiyungni nok bisingo habwi tháng lai kha, bórok Subraiyungni nok bisingo aswk dera rwnai manwirok nukmano kariui nokhla-o tubu lai kha. Lebirok abórok bebakno Kidron harungo tlang kha.

¹⁷Bórok tal yaphangni puilani salni simi kwthar khlaina samung cheng laiwi, salcharni salo khe Subraiyungni nuka-o sók phai kha, bórok tei salchar jora Subraiyungni nokno kwthar khlai kha, hakhe sal chidokni salo bórok samung pái súk kha.

¹⁸Hakhe bórok habugra Hejekiani thani thángwi hai hwnwi sa lai kha, “Chwng bebak Subraiyungni nokno, sógwi yapharmani háyá, bebak manwirok tei auan yapharmani songphang tei aboni manwirokno kwthar khlai bai kha.

¹⁹Ahas habugra cháui tong phuru Kaitor bai sói khe tong ya khe bebak manwirok normano chwng abórokno kwthar khlai bai kha, abórok tabuk Subraiyungni háyá bwskango tong bai-o.”

²⁰Hakhe habugra Hejekia dakti bachaui kamiyungni tẃiphangrokno thumwi Subraiyungni nogo tháng lai kha.

²¹Bórok hani, noktharni tei Judiani sumsokni bagwi musuk maksni, mera maksni, punjua maksni tubu lai kha. Hakhe bo Aronni bwsa ochairokno Subraiyungni háyá-o yapharnani bagwi dagi kha.

²²Hakhe bórok musuk beresrok, merarok tei punrok ratharwi abórokni thẃino naui háyá-o sarwi rw kha.

²³Bórok punrokno habugra tei lukurokni thani tubu lai khe, abórokni saka-o yak rw kha.

²⁴Ochairok abórokno ratharwi bebak Israilni sumsok súnani bagwi thẃino háyá-o lukhlaiwi rw kha. Tamni hwn ba habugra bebak Israilrokni bagwi sógwi yapharmung tei sumsok yapharmung yapharna bagwi dagi kha.

²⁵Subraiyung bini diyarirokni bising tẃi tei habugra Daudni tei habugrani diyari Gad tei Nathan diyari dagimani tẃi khe Lebirokno Subraiyungni nok bisingo tammung tamjaknairok yago tẃi rwui tong rw bai kha.

²⁶Lebirok Daudni tammungrokno tẃiwi tei ochairok khe totro kotor tẃiwi bacha lai kha.

²⁷Hakhe Hejekia háyá-o sógwi yapharmung se ma yapharnai hwnwi dagi kha. Sógwi yapharmung cheng khe bororok Subraiyungni mungo rwchap lai kha tei Israilni habugra Daudni tammungrok tei totro kotorrok tam lai kha.

²⁸Bebak lukurok khulum lai kha, sógwi yapharma pái ya sak rwchapnairok rwchap lai kha, totro sup lai kha.

²⁹Yapharmung pái khe habugra bai baksa aro tong bainairok yáskú sungwi Kaitorno khulum lai kha.

³⁰Habugra Hejekia tei tẃiphangrok Lebirokno Daud bai diyari Asapni rwchap mungrokno Subraiyungni thani rwchap laina dagi kha. Bórok tongthogwi rwchap lai kha tei yáskú sungwi Kaitorno khulum lai kha.

³¹Hakhe Hejekia hai hwnwi sa kha, “Tabuk norok sakno Subraiyungni thani kwthar khlai bai kha, Subraiyungni nogo hambai yapharmungrok tubu bai di.” Hakhe lukurok hambai yapharmungrok tei bebak bwkha kahamrok sógwi yapharmungrok yaphar bai kha.

³²Lukurok sógwi yapharmung tubumani bebagwi musuk beres 70, mera bwsa 100, mera 200, Subraiyungni thani tubu lai kha.

³³Kwthar yapharmung beres mak 600 tei merarok mak 3,000 wng kha.

³⁴Phiya ba sógwi yapharna bagwi aro ochairok borok báng lai yani bai, bebak samung pái ya sak tei kubun Lebirok sakno kwthar khlai bai ya sak Lebirok chuba lai kha, tamni hwn ba Lebirok kwthar tongnai ochairokni slái bwkha kaham gwja.

³⁵Kwbángma sógwi yapharmungno karwi buphamni khakchangma yapharma tei arak lukhlaiwi yapharmabo tongo. Abo hai khe Subraiyungno khulumma cheng phi kha.

³⁶Dakti khe samung khlainani bagwi Kaitor chubamani bai habugra Hejekia tei bebak bororok tongthok lai kha.