Read Kok Borok 2 BOSONG 30 Bible Online

2 BOSONG 30 - Kok Borok bible

2 BOSONG 30

¹Hejekia Subraiyungni noktharo Subraiyung Israilni Kaitorni thani yókma ter panda khlainani bagwi bebak Israil tei Judani thani Ephraim tei Manase-o kóktun swiwi Jerusalemo phai bai thung hwnwi sa hor kha.

²Habugra, bini tẃiphangrok tei Jerusalemni bebak lukurok tal nwini talo yókma ter panda khlaina chap lai kha.

³Tamni hwn ba ochairok kwbángma bórokni sakno kwthar khlai yani bagwi tei bororok Jerusalemo kuthum yani bagwi bórok pandano jora-o khlaiwi man lai li ya.

⁴Habugra tei bebak bororok bórok chongmano chajak bai kha.

⁵Hakhe bórok bebak Israil bororokno Birsebani simi Dan jora Jerusalemo phaiwi Subraiyung Israilni Kaitorni thani yókma ter panda khlaina sakhlai kha, tamni hwn ba bórok chongjak tongmani hai khlaiwi borok kwbángma khe khlai li ya.

⁶Habugra dagimani hai khe tẃitunrok bebak ha Israil bai Judia-o habugra tei bini tẃiphangrokni kóktun tlangwi thángwi hai hwnwi sa lai kha, “O Israilni bororok, Subraiyung, Abraham, Isak tei Israilni Kaitorni thani kiphil bai di, hakhe bo Asiriyani habugrani yakni yógwi tong rwknairokni thani kiphilnai.

⁷Norokni chuchusong tei takhuksong hai ta wng bai si di, bórok Subraiyung norokni chuchusongni Kaitorni thani sói khe tong lai li ya, tabuk norok mokol baithang nukmani hai khe bórokno sátok kha.

⁸Bórok hai gwdna kwrak ta wng bai si di, phiya ba Subraiyungni kók khna di, norokni sakani bini jolimani rosajakna tẃi khe Subraiyung norokni Kaitor mol brúmni bagwi kwthar khlaimani bini noktharo phai bai di tei Subraiyungno mon di.

⁹Norok Subraiyungni thani kiphilwi phai khe norokni takhukrok tei bwsa-bẃtẃirokno khaui tlangnairok ma khairoknai tei ha-o kiphilwi ma phainai. Tamni hwn ba Subraiyung norokni Kaitor wng kha khairokma tei mayabo gwnang, norok bini thani kiphilwi phai phi khe, bo norokno khibiui rohor glak.”

¹⁰Hakhe tẃitunrok kamiyung brúm Ephraim, Manase tei Jebulun jora tháng lai kha, hwn ba bororok thesra khlaiwi mwnwi lai bai kha.

¹¹Aserni, Manaseni tei Jebulunni borok kisicha sak-sakno koinene khlaiwi Jerusalemo phai lai kha.

¹²Subraiyungni kók habugra tei tẃiphangrokni tẃi khe dagimano nanani bagwi Judani bororokno bwkha thansa khlaima-o Kaitorni yak tongo.

¹³Borok kwbángma auan bángla ter khlainani bagwi tal nwini talo Jerusalemo kuthum lai kha.

¹⁴Bórok Jerusalemo tongmani háyárok tei bebak satrai sókmani háyárokno norwi tlangwi Kidron harungo khibiui rw lai kha.

¹⁵Bórok yókma ter pandani bagwi talnwi talni sal chibrwini salo mera rathar lai kha. Bórok sakno kwthar khlaiwi Subraiyungni nok bisingo sógwi yapharmung tubu laiwi ochairok tei Lebirokno lachi rw lai kha.

¹⁶Bórok Kaitorni borok Musini kerongo tongmani hai khe sak sakni samungno na lai kha, Lebirok bai yapharjakmani thẃino ochairok sar lai kha.

¹⁷Luku kuthumnairokni bisingo kwbángma sakno kwthar khlai ya kho tong bai-o, aboni bagwi Lebirok joto bororokno Subraiyungni thani kwthar khlainani bagwi yókma terni mera ratharna nango.

¹⁸Aro borok kwbángma Ephraimni, Manaseni, Isakarni tei Jebulunni bórok sak sakno kwthar khlai ya khe, bórok chongjakmani tẃi wng ya phano yókma ter panda-o chá lai kha. Tamni hwn ba Hejekia bórokni bagwi abo hai khe suri san kha, “Subraiyung kaham, nwng bebakno’-no

¹⁹noktharni raida tẃi bórok kwthar wng ya phano bebak bwkha rwui Subraiyung bini chuchusongni Kaitorno khulumnairokno nakar ja di.”

²⁰Subraiyung Hejekiani suri sanmano khnaui bororokno ham rw kha.

²¹Jerusalemo kuthumnai Israil bororok nokha salsni romwi belai tongthogwi auan bángla panda khlai lai kha; Lebirok tei ochairok sal brúm brúm Subraiyungno lob lai kha, panda khlaiwi Subraiyungni thani tammungrok bai bebak phan rwui[17] rwchap lai kha.

²²Hejekia kiri ya khe Subraiyungni samung kaham phunuknai Lebirokno sa kha. Hakhe bororok nokha salsni romwi pandani chámung chá lai kha, khakchangma yapharwi tei Subraiyung bórokni chuchusongni Kaitorno hambai rw lai kha.

²³Hakhe bebak luku kuthumnairok tei salsni panda khlaina gosi lai kha; bórok tei salsni tongthogwi khlai lai kha.

²⁴Judani habugra Hejekia kuthumnairokno yapharna bagwi beresrok 1,000 tei merarok 7,000 rw kha tei tẃiphangrokbo kuthumnairokno yapharna bagwi beres 1,000 tei merarok 10,000 rw lai kha. Ochairok kwbángma sak sakno kwthar khlai bai khe,

²⁵bebak Judani luku kuthumnairok, ochairok, Lebirok tei Israilni phai bainai buini hani bororok tei Juda-o tong bainai buini hani bororok tongthok lai bai kha.

²⁶Hakhe Jerusalemo tongthokma kupulung wng kha, Israilni habugra Daudni bwsla Solomonni molni simi omo hai tongthokma Jerusalemo wng ya kho.

²⁷Hakhe ochairok tei Lebirok bachaui lukurokno hamari rw kha, bórokni surima khorang chuknoha jora sógwi kha.