Read Kok Borok 2 BOSONG 31 Bible Online

2 BOSONG 31 - Kok Borok bible

2 BOSONG 31

¹Bebak pandarok pái bai khe Israilni luku tong bainairok Judani kamiyung thwgwi nongkhorwi tháng baiwi holongni thonglarok, Asera mwtaijwkni mangtangrok tei mwtai khulummani jagarokno swbai rw lai kha, abo hai khe Judani Benjaminni, Ephraimni tei Manaseni bebak háyárokno sokomor bai kha. Hakhe bebak Israil bororok sakni nogo kiphilwi tháng bai kha.

²Habugra Hejekia ochairokno tei Lebirokno buthup buthup khe samung barja berwi rw bai kha, ochairok, Lebirok khe sógwi yapharmung yapharnani tei khakchangma yapharnani tei Subraiyungni nokni duglamo samung khlainani, hambai rwnani bai lobnani.

³Habugra Subraiyungni raida-o swijak tongmani hai khe bini mal-matarok tongmani bisingni sógwi yapharmungni bagwi phung tei sarigo, Sabat salo, tal kwtalni panda-o tei kubun pandarokni bagwi yaphar kha.

⁴Ochairok tei Lebirok Subraiyungni kerong-raidano simi tẃi tongwi manna tẃi khe Jerusalemo tongnairokno bórokni manthaino rwna bagwi habugra dagi kha.

⁵Israil bororok dagimano khna khe kwbángma khe tháikrarok arak, thok, piya bwtwi, hani manmani bwtháirok tei bórok bebakni chi-o kaisa kwbángma tubu lai kha.

⁶Bebak Judani kamiyungrogo tong bainai bororok bórokni musuk tei merarokni chi-o kaisabo tubu lai kha tei kwbángma hilirok tubu kha, abono Subraiyung bórokni Kaitorni thani yaphar lai kha tei kuchuk khe rúngwi rw lai kha.

⁷Talthamni talo bórok rúngna chengwi talsnini talo pái súk lai kha.

⁸Hejekia tei bini tẃiphangrok phaiwi kwbángma rúngjak nuk phai khe Subraiyungno tei Israil bororokno hambai rw lai kha.

⁹Hejekia aboni bagwi ochairok tei Lebirokno sẃng kha.

¹⁰Sadok bosongni ochai bokhorok Ajaria bono hai hwnwi sa kha, “Bórok Subraiyungni nogo yapharmungrok tubuna cheng khe chini chajaknai kwbángma wng kha tei yak bára kwbángma tongo; tamni hwn ba Subraiyung bini bororokno hamari kwbángma rw kha, hakhe chini kwbángma yak bára wng kha.”

¹¹Hakhe Hejekia bórokno Subraiyungni nok bisingni khotolrok snamnani bagwi dagi khe bórok snam kha.

¹²Bórok sói khe yapharjak manwirokno, chi-o kaisa yapharmano aro tubu kha; Konania hwnwi khoroksa Lebi abono naikini khlainai bokhorok wng kha tei bono chubanai bini takhuk Simei.

¹³Konania tei bini takhuk Simeino chubanairok wng kha: Jehiel, Ajajia, Nahat, Asahel, Jerimot, Jojabad, Eliel, Ismakia, Mahat tei Benaia bórok habugra Hejekia tei Kaitor nokni ochai bokhorok Ajaria bai chongjakmani se.

¹⁴Lebisa Imnani bwsla Kore, salka bwkhakni duglam mwrwknai khe Kaitorno khá phurwi yapharmani barja rwjak kha, kwthar kuk yapharmungni aroni Subraiyungni bakna bagwibo barja rwjak.

¹⁵Ochairokni kamiyungrogo Eden, Miniamin, Jesua, Semaia, Amaria tei Sekania sói khe bono chuba lai-o; bórok chongjakmani hai khe sikla, chakra bórokni takhukrokni thani baksa khe rw lai-o.

¹⁶Bosong bijabo mung swijakrokno karwi bisik tham tei aboni slái kwbáng kuk chwlarokno, sak sakni samung berjak tongmani tẃi bebak borok Subraiyungni nogo samung tangnani bagwi chongjak kha.

¹⁷Ochairok khe bórokni bosong tẃi khe samung chongjago tei Lebirok khe bisik nwichi tei aboni kwbáng khe bórok samung tẃi khe chongjago.

¹⁸Ochairok khe bebak bórokni bihiksong, bwsa-bẃtẃirok bai pal khe bumung ma swijago, tamni hwn ba bórok sakno yapharma kógo bachaui tong bai-o.

¹⁹Aron bosongni ochairok, bórokni kamiyungrokni ha-o tongnairok, ochai núkhungrokni tei Lebi beremni chwlarok jotono chámung baknani bagwi chongjak tongo.

²⁰Abo hai khe Hejekia bebak ha Judia-o Subraiyung bini Kaitorni bwskango kaham, kubui tei sói samung khlai kha.

²¹Kaitorni nokni bagwi aswk samung khlaimani Kaitorni raida tẃi tei bini dagimani tẃi khe bwkha bai’-no khlai-o, aboni bagwi hamari man kha.