Read Kok Borok 2 BOSONG 32 Bible Online

2 BOSONG 32 - Kok Borok bible

2 BOSONG 32

¹Abórokni ulo tei Hejekia Subraiyungno sói khe monwi tong phuru, Asiriyani habugra Senacherib, bini sakni khlai bainani chongwi Judia-o hap phaiwi aboni kamiyungrogo batham kha lai kha.

²Hejekia Senacheribno Jerusalem bai choba nang lainani phai-o hwnwi saui man khe,

³bo bini tangphang okrarok tei phan gwnang bororok bai khe kamiyung phatarni twisano mwthak lainani chap lai khe bórok chuba lai kha.

⁴“Asiriyani habugra phaiwi tamni aswk twirok manna klai?” hwnwi sa laiwi borok kwbángma kuthum laiwi a ha tẃi khe kochoknai twisa tei twikherengrokno muthubwi rw lai kha.

⁵Bo hus khe bebak chokdeual kwbairokno snamwi aroni saka-o nok kuchukrok tang kha,[18] tei aboni phatarobo tei kaisa chokdeual tang phi kha tei bo Daudni kamiyungo (Milo) kuchuk sakani nokno kwrakma khlaiwi tisa kha. Bo kwbángma olongarok tei phuirok snam rw kha.

⁶Hejekia bororokni saka-o dagiphang bokhorokrok chongwi rw kha tei bórokno thupsa khe kamiyung duglamni bupra-o thum baiwi bórokno bwkha bacha rwui hai hwnwi sa kha,

⁷“Phan tisa di tei khá rak di, Asiriyani habugrani tei bini sengkrakrokni bwskango tabo ta kiri di, bwkhabo ta bai di, tamni hwn ba bórokni slái chini thani khoroksa phan gwnang kuk tongo.

⁸Bini logi-o khe bahan-bwthẃini sengkrakrok tongo tei chini logi-o khe Subraiyung chini Kaitor chwngno chubanani tei choba nang lainani tongo.” Judani habugra Hejekia samani kókrokno poito chá lai kha.

⁹Aboni ulo Asiriyani habugra Senacherib tei bini bebak sengkrakrok Lakhiso tong phuru, bini selengrokno Jerusalemo Judiani habugra Hejekia tei bebak Judani bororokni thani rohorwi sa hor kha.

¹⁰Asiriyani habugra Senacherib hai hwnwi sa-o, “Tamono poito cháui norok Jerusalemno segwi najagwi suda bachaui tong lai?”

¹¹Hejekia Subraiyung chini Kaitor Asiriyani habugrani yakni chwngno phiyóknai hwnwi saui norokno bandi ya diba, bo norokno ma chá ya, ma nung ya khe buthar bainai?

¹²O Hejekiano ha kuchukrok tei háyárokno nor baiwi Juda bai Jerusalemno kaisa háyá-o se khulumnani tei sógwi yapharnani bagwi dagi ya diba?

¹³Ang tei ani chuchusong kubun ha-o bebak bororokni bagwi tamo khlai kha norok saui man ya da? Kubun hani mwtairok ani yakni bórokni hano mwthangwi de man kha?

¹⁴Ani chuchusong sokomormani dophani mwtairokni bisingo sabo ani yakni mwthangwi mannai tong; hakhe norokni Kaitor ba ani yakni norokno mwthangwi mannai de?

¹⁵Tabuk hakhe Hejekia abo hai khe bandiui lama ta koró rw thung tei bono poito ta chá bai di, tamni hwn ba dophani tei hani khoroksa mwtai phano bini bororokno ani yakni tei ani chuchusongni yakni mwthangwi man ya. Hakhe norokni Kaitorbo ani yakni norokno mwthangwi man glak.

¹⁶Asiriyani tẃiphangrok teibo Subraiyung Kaitorno tei bini seleng Hejekiano hamya sa lai kha.

¹⁷Habugra Subraiyung Israilni Kaitorno mwkhang sógwi kóktun swihor kha tei hai hwnwi sa kha, “Kubun hani mwtairok ani yakni bini bororokno mwthangwi man ya tẃi, Hejekiani Kaitor bo haino bini bororokno ani yakni mwthangwi man glak.”

¹⁸Hakhe bórok Hibru kók bai khe Jerusalemni chokdeualo tong bainai bororokno sikiriui bwkha swbai laiwi kamiyungo segwi na lainani bagwi chirik lai kha.

¹⁹Bórok o ha sakani bororokni mwtairokno hwnmani hai khe Jerusalemni Kaitornobo borokni yak bai snammani hwnwi hwn lai kha.

²⁰Hakhe habugra Hejekia tei Amojni bwsla diyari Jisaia Kaitorni thani suriui chubachu san lai kha.

²¹Subraiyung khoroksa suarino habugra Asiriyani bathamo rohorwi phan gwnang sengkrakrok, dagiphang bokhorokrok, tẃiphangrokno buthar bai kha. Hakhe bo lachimasingcha khe bini ha-o kiphil kha. Bo bini mwtai nogo phai phuru khe, baksa bini bwsarok aro bórokni seng bai buthar kha.

²²Abo hai khe Subraiyung Hejekia tei Jerusalemo tong bainai bororokno Asiriyani habugra Senacheribni yakni tei bórokni arirokni yakni mwthangwi bebak bwkhago tong kwchang tong rw kha.

²³Kwbángma bororok Jerusalemo Subraiyungno yaphar phai bai kha tei habugra Hejekiano bo hili rw phai bai kha, hakhe aphuruni simi khe bo bebak dopharok bai bórom khlaijak kha.

²⁴Aphuruni jora-o Hejekia lumui thwina nai khe, bo Subraiyungni thani suri san kha tei Subraiyung bini surimano khnaui bono kaisa mari phunuk kha.

²⁵Phiya ba Hejekiabo khairokjakmani se belai khe kung chuk kha. Aboni bagwi Subraiyungni jolima bini saka-o tei Juda bai Jerusalemni saka-o klai kha.

²⁶Hakhe Hejekia tei Jerusalemo tong bainairok kung chukmani bwkha kiphil kha, aboni bagwi Subraiyung bórokno Hejekia kwthang tong sak sátok li ya.

²⁷Hejekia belai gwnang wng kha tei bórom man kha. Bo bini rangchakni, rukphaini, holong kahamrokni, mosolarokni, phuirokni tei podrepot morokma manwirokni nokrok snam kha.

²⁸Tei mai, arak, thok, mal-matarokni, merarokni nokrokbo snam kha.

²⁹Bo abo hai khe sakni bagwi kamiyungrok tang kha, bini, merarok, musukrok, kwbángma tongo, tamni hwn ba Kaitor bono kwbángma núkhungo hamcha rw kha.

³⁰Habugra Hejekia, Gihonni twi yornaino muthubwi, saltháng bwkhak Jerusalem tẃi khe rohor kha. Hejekia samung khlaima bebakno cha kha.

³¹Bini ha-o kwmamsingcha wngmarokno sẃngnani bagwi Babilonni bugra tẃitunrokno rohor khe, Kaitor Hejekiano amjogwi bini bwkha-o tongmani kókno sinani bagwi bono yakarwi klang kha.

³²Habugra Hejekia aswk samung kahamrok khlai langmani abórok bebak Amojni bwsla diyari Jesaiani nukmani-o tei Juda bai Israilni habugrarokni bijabo swijak tongo.

³³Hejekia thwi khe, sakani habugrarokni simalwngo phobjak kha. Judia tei Jerusalemo tong bainai bororokbo thwi phuru bórom khlai lai kha. Bini bwsla Manase bini yakchu-o habugra chá kha.