Read Kok Borok 2 BOSONG 33 Bible Online

2 BOSONG 33 - Kok Borok bible

2 BOSONG 33

¹Manase nokha bisi chinwi phuru habugra chána chengwi Jerusalemo nokha bisi bachiba habugra chá kha.

²Bo Subraiyung Israil bororokni bwskango rwkhlaiwi rohormani dopharok selengmasingcha samung khlaima hai khe Subraiyungni bwskango hamya samung khlai kha.

³Bini bupha Hejekia swbaimani mwtai khulumma háyárok snam phirwi Bal mwtaini háyárok snamwi tei Asera mwtaijwkni mangtang snamwi tei nokhani athukirirokno khulum kha.

⁴Subraiyung Jerusalemo se ang mol brúm brúm khulumjaknai hwnwi sama-o se, bo Subraiyungni nok bisingo mwtaini háyárok snam kha.

⁵Subraiyungni nokni khotol kwrẃngnwi-o bo nokhani athukirirokni bagwi háyá snam kha.

⁶Bini bwslano Hinom harungo hór bai sógwi yaphar kha. Bo kók mwlang tei kók mwtai tei bwskangni kókrok sa-o. Bo kwbángma samung hamya khlaiwi Subraiyungno joli rw kha.

⁷Bo a takmani mangtangno Kaitorni nogo khe tonwi kha, Daud bai Solomonno Kaitor o nokno tẃiwi hai hwnwi samani, “O nok tei Israilni bosongrokni bisingni saiwi namani o Jerusalemno ang mol brúm brúmni bagwi ani mungno tonnai.

⁸Bórok Musini khúk tẃi khe rwmani raidarok, dagimarokno kaham khe tẃi khe, ang bórokni chuchusongno rwmani o hani bórokno tei nor glak.”

⁹Manase Juda bai Jerusalemni bororokno lama koró rw kha, hakhe bórok Israil bororokni bwskango Kaitor sokomormani dopharokni slái bo hamya kuk samung khlai bai kha.

¹⁰Subraiyung Manase tei bini bororokno sa kha, tamo khe bórok khna li ya.

¹¹Abo bai’-no Subraiyung Asiriyani habugrani sengkrak bokhorokrokno tubu-ui, Manaseno biching bai khebwi, pitolni buduk bai khaui bono Babilono tubu-ui phai kha.

¹²Bo belai khe tekto man khe bwkha kiphilwi Subraiyung bini Kaitorni chubachu san kha.

¹³Bo suri khe Kaitor bini surimano khnaui bini ha Jerusalemo kiphilwi tubu kha. Abo bai Manase Subraiyungno Kaitor hwnwi saui man kha.

¹⁴Aboni ulo Manase Daudni kamiyung phatarni chokdeual, saltháng bwkhak Gihonni harungo tang phi kha, abo a duglamni simi khe Ophelno kitingwi abono kuchukma khe tang kha, bo Judani bebak kamiyung kwrakmarogo sengkrak bokhorokrokno ton kha.

¹⁵Bo Subraiyungni nok bisingni bebak buini hani mwtairokno tei mangtangrokno nor bai kha, Jerusalemo Subraiyungni nokni hachuk saka-o bo bebak háyárok snammano kamiyungni phataro khibiui rohor bai kha.

¹⁶Bo Subraiyungni háyáno tang phirwi aro khakchangma tei hambai yapharmung yaphar kha tei bo Judani bororokno Subraiyung Israilni Kaitorno khulumnani dagi kha.

¹⁷Bororok háyá kuchukrogo yaphar lai phano bórok Subraiyung Kaitorni thani simi se yaphar lai-o.

¹⁸Manase aswk samung khlai langmani tei bini Kaitorno suri sanmani, Subraiyung Israilni Kaitorni mung bai diyari bono samani kók, abórok bebak Israilni habugrarokni bijabo swijak tongo.

¹⁹Bini surima tei abono Kaitor khnamani, bini sumsok tei hamya samung khlaima, bo háyá kuchukrok tangmani tei Asera mwtaijwkni mangtangrok snammani tei bo bwkha kiphilmarokbo diyarirokni bijabo swijak tongo.

²⁰Hakhe Manase thwi khe bini noyungo phobjak kha tei bini bwsla Amon bini yagulo habugra chá kha.

²¹Amon nokha bisi nwichinwi phuru habugra chána chengwi Jerusalemo nokha bisiknwi habugra chá lang kha.

²²Bo bini bupha Manase hai khe Subraiyungni bwskango hamya samung khlai kha; Amon bini bupha Manase snammani mangtangrogo yapharwi khulum kha.

²³Bini bupha Manase hai khe Subraiyungni bwskango koinene wng li ya. Amon teibo kwbángma hamya khlai kuk kha.

²⁴Bini selengrok bono kebengwi bini nok bisingo buthar kha.

²⁵Phiya ba Judani bororok habugra Amonno kebengnairokno butharwi bini bwsla Josia bini yakchu-o habugra chá rw lai kha.