Read Kok Borok 2 BOSONG 34 Bible Online

2 BOSONG 34 - Kok Borok bible

2 BOSONG 34

¹Josia nokha bisi char phuru habugra chána chengwi, bo Jerusalemo nokha bisi thamchisa jora habugra chá lang kha.

²Bo Subraiyungni mokolo chajakmani haino samung khlai kha tei bini búchu Daud himmani lama-o him kha, bo aboni yagra eba yaksi wng li ya.

³Josia habugra chámani nokha bisi char phuru-o, aphurubo chwraisano tong kho, bo bini chuchu Daudni Kaitorno rutuk kha, nokha bisi chinwi phuru-o khe bo Juda tei Jerusalemni háyá kuchukrok, Asera mwtaijwkni tei kubun mwtaino sokomor bai kha.

⁴Bini bwskango Bal mwtairokni háyárokno swbai lai kha tei satrai sókmani háyároknobo swbai lai kha. Asera mwtaijwkni mangtangno tei mwtairokno phondrik-phandrak khe tokhrup lai kha tei abórokno bono khulumnai bororokni simalwng hakhorrogo piring-poroi khe lukhlaiwi rw lai kha.

⁵Bo o mwtaini ochairokni bekrengrokno háyá saka-o sógwi Juda tei Jerusalemno sap-sutra khlai kha.

⁶Manase, Ephraim, Simion tei Naptali jora kamiyungrogobo abo haino khlai kha.

⁷Bo bebak ha Israil gwnangwi háyárok, Asera mwtaijwkni mangtangrokno tei satraini háyárokno swbaiwi Jerusalemo kiphilwi tháng kha.

⁸Bo habugra chámani nokha bisi chichar phuru-o, bo ha tei nokrok sap-sutra khlai bai khe Subraiyung bini Kaitorni nokno snam phinani bagwi Ajaliani bwsla Saphan, kamiyungni bugra, Maseia tei swi narwknai Joahajni bwsla Joano rohor kha.

⁹Bórok ochaiyung Hilkiani thani phaiwi duglam mwrwknai Lebirok Kaitorni nok bisingo tubujakmano Manase, Ephraim tei bebak karwi klangjaknai Israilrok tei bebak Juda bai Benjamin tei Jerusalemo tongnairokni aro rang thumjakmano yaphar lai kha.

¹⁰Bórok Subraiyungni nok tangna chongjak bororokno yaphar kha, samung tangnairok.

¹¹Mistrirokno, nok tangnairokno holong painani, buphangrok, Judiani habugrarok swbaimani phaklairokni bagwi rw lai kha.

¹²Bororok sói khe samung tang lai kha, bórokno naikini khlainairok wng kha, Lebirok Jahat tei Obadia khe Merari bosongni, Sakaria tei Mesulam khe Kohat bosongni, Lebirok bebak kham tammung kwrwng mángno.

¹³Baksa Lebirok khe barja tẃinairok tei podrepot samung tangnairokno chubanairok, baksa Lebirok khe swinairok, tang okrarok tei duglam mwrwknairok.

¹⁴Subraiyungni nok bisingni rang kariui tubujak khe ochai Hilkia Musini tẃi khe yapharjakmani Subraiyungni kerong bijabo man kha.

¹⁵Hakhe Hilkia swinai Saphanno hai hwnwi sa kha, “Ang Subraiyungni nok bisingo kerong bijap man kha.” Tei Hilkia bijapno Saphanno yaphar kha.

¹⁶Saphan bijapno habugrani thani tubu-ui hai hwnwi sa kha, “Nwng dagima haino bebakno chwng khlai kha.

¹⁷Subraiyungni nok bisingo tongmani bebak rangno tubu-ui, abórokno naikini khlainairok tei samung tangnairokni thani yapharjak kha.”

¹⁸Hakhe swinai Saphan habugrano hai hwnwi sa kha, “Ochai Hilkia ano kangsa bijap yaphar kha.” Saphan habugrani bwskango abono pori kha.

¹⁹Habugra kerongni kókrokno khna khe bini rírok sichigwi

²⁰habugra Hilkia, Saphanni bwsla Ahikam, Mikani bwsla Abdon, swinai Saphan tei habugrani seleng Asaiano hai hwnwi dagi kha,

²¹“Tháng di, ani bagwi tei Israil bai Judani yakarwi klangjak bainai bororokni bagwi tei bijap manjakmani kókno tẃiwi Subraiyungno sẃngwi nai bai di, Subraiyungni jolima chini saka-o klai kha, tamni hwn ba chini chuchusong Subraiyungni kókno khna ya khe kerong bijabo swijak tongmani hai khlai li ya.”

²²Hakhe Hilkia tei habugra dagiui rohormani[19] bororok Jerusalemni khotol nwini nogo tongnai diyarijwk Huldani thani tháng lai kha. Bini bwsai wng kha Tokhatni bwsla tei Hasrani busuk Salum, bo khe rí-chumrok mwrwknai, bórok bwrwino saui khna rw lai kha.

²³Ani thani norokno rohornaino hai hwnwi saui di;

²⁴Subraiyung hai hwnwi sa-o, “Nai di, ang o ha saka-o tei bini saka-o tong bainairokni saka-o Judani habugrani bwskango porijakmani kerong bijabo swijak tongmani bebak swraimungrokno klai rwnai.

²⁵Tamni hwn ba bórok ano yakarwi kubun mwtairokni thani satrai sógwi bórokni yak bai takjak mwtairok bai khe ano joli rw bai kha, abo baino ang o ha-o ani jolima lukhlaiwi rwnai, abo tei ham glak.

²⁶Subraiyungno sẃngwi di hwnwi norokno rohornai Judani habugrano norok hai hwnwi sa di, ‘Subraiyung Israilni Kaitor hai hwnwi sa-o: O ha tei oroni bororokno kebengwi ang samano khnaui nini bwkha nangjak kha tei ani

²⁷bwskango koinene wng kha, nini rírokno sichigwi ani thani kaka-kokok wng kha, nwng omo hai wng kha hwnwi ang Subraiyung nini surimano khna kha.

²⁸Aboni bagwi ang daktino nono nini chuchusongni thani tlangwi thángnai tei nwng kwchang kwchang khe mangkhoro phobjak anw. O ha-o tei oro tongnairokni saka-o ang birmanrok tubuna hwnmano nwng nini mokol bai nuk glak.’ ” Bórok habugrani thani o kók tubu-ui phai lai kha.

²⁹Hakhe habugra Josia Juda tei Jerusalemni okra chakrarokno thum kha.

³⁰Habugra bebak Judani bororok, Jerusalemo tongnairok, ochairok, Lebirok, bebak kotor kotor bororok bai khe Subraiyungni nogo thángwi, Subraiyungni nok bisingo manmani swmai bijapni kókno bórokno khna rwui pori kha.

³¹Habugra bachaui bijabo swijak tongmani hai khe bebak bini bwkha bai khúk bai khe Subraiyungni lama-o himnani, bini dagimarokno tei raidarokno tẃinani bagwi Subraiyungni bwskango swmai tang lai kha.

³²Hakhe bo bebak Benjamin tei Jerusalemni aro tongnairokno swmai tang rw bai kha. Jerusalemo tongnairok bórokni chuchusongni Kaitor bai swmai tang laimani tẃi’-no khlai kha.

³³Habugra Josia, Israil bororokni, hani bebak Israilo tongnairokno Subraiyung bórokni Kaitorno ma mon bai kha. Bo kwthang tong lang sak Subraiyung Kaitorno khulum ya wng bai li ya gwja.