Read Kok Borok 2 BOSONG 35 Bible Online

2 BOSONG 35 - Kok Borok bible

2 BOSONG 35

¹Josia Subraiyungno bórom khlaiwi Jerusalemo yókma ter panda khlai kha, bórok tal yaphangni sal chibrwini salo panda-o merarok rathar lai kha.

²Bo ochairokno bórokni samungo chongwi Subraiyungni nogo kaham khe samung khlainani bagwi bwkha bacha rw bai kha.

³Bo Israilno phrwngnai, Subraiyungni thani kwthar khe tongnai Lebirokno hai hwnwi sa kha, “Daudni bwsla habugra Solomon snammani swmai bokhokno nokthar bisingo ton di, norokni bangora-o tei abono tẃina nang glak, tabuk norok Subraiyung norokni Kaitorno tei bini Israil bororokno mon di.”

⁴Norokni núkhung tẃi khe Israilni habugra Daud tei bini bwsla Solomon barja yapharmani hai khe noktharni samung khlai bai di.

⁵Núkhungni takhukrok bai bodol khe tei Lebirok bosong buthup khe thai kwtharo bacha lai di.

⁶Tei yókma ter pandani merarok ratharwi norok sakno kwthar khlai di tei Musini tẃi khe Subraiyung dagimarokno khlainani bagwi norokni takhukrokno tiyar khlai di.

⁷Hakhe yókma ter panda-o bebak bororokni bagwi yapharnani mak 30,000 merarok bai mera bwsarok tei mak 3,000 beresrok, habugra bini saknino rw kha.

⁸Bini tang okrarok muchungwino bororokno ochairokno tei Lebirokno yaphar bai kha. Kaitorni nokni tang okra bokhorokrok Hilkia, Sakaria tei Jehiel tero yapharnani bagwi mak 2600 merarok tei punrok tei mak 300 beresrok ochairokno rw lai kha.

⁹Lebirokni bokhorokrok, Konania, Semaia tei bini takhuk Nethanel. Hasabia, Jeiel tei Jojabad tero yapharnani bagwi mak 5,000 merarok bai punrok tei mak 500 beresrok Lebirokno rw lai kha.

¹⁰Terni bagwi bebak tiyar khlai bai khe habugra dagimani hai khe ochairok tei Lebirok bórokni bacha thai-o bacha lai kha.

¹¹Bórok tero merarok rathar bai khe ochairok bórok yapharjakmani thẃino sarwi rw lai khe tei Lebirok khe bukur khuk lai kha.

¹²Bórok sógwi yapharmano Musini bijabo swijak tongmani hai khe núkhungni berem buthup bororokno baknani tei Subraiyungni thani yapharnani bagwi khagwi ton kha. Abo hai kheno beresroknobo khlai kha.

¹³Bórok raida-o tongmani hai khe yókma ter yapharjakmani merarokno hóro sók lai kha tei bórok kwthar yapharmungrokno twgo, karai-o, manwi kotoro ruk laiwi dakti khe bororokno rw lai kha.

¹⁴Aboni ulo bórok sakni bagwi tei ochairokni bagwi tiyar khlai kha, tamni hwn ba Aron bosongni ochairok sógwi yapharnani bai bupham yapharna hor kuthukma jora-obo pái lai li ya.

¹⁵Asap bosongni rwchapnairok bórokni samungo Daud Asap, Heman tei habugrani diyari Jeduthun dagimani hai khe tong bai kha, duglam mwrwknairok bórokni samung yakarwi thángna nang li ya, tamni hwn ba tei kubun Lebirok bórokni bagwi yókma ter panda tiyar khlai-o.

¹⁶Hakhe habugra Josia dagimani hai khe Subraiyungno khulumnani bagwi a salo bebakno yókma terni panda tei háyá-o sógwi yapharnani tiyar khlai bai kha.

¹⁷Aro tongnai bebak Israil bororok salsni romwi yókma ter panda tei auan bánglani panda khlai lai kha.

¹⁸Diyari Samuelni molni simi abo hai khe yókma ter panda khlaijak ya kho. Habugra Josia yókma ter panda khlaimani hai khe bini slái swkang tong langnai habugrarok abo hai khe khlai ya kho, ochairok, Lebirok, bebak Judia tei Israilni bororok tei Jerusalemo tongnairok aro manjak bai kha.

¹⁹Josia habugra chámani nokha bisi chicharo abo panda khlaijago.

²⁰Habugra Josia noktharni bagwi bebak samung khlai baimani ulo, Ijipni habugra Neko Uphratis twimani Karkamiso choba nang laina tháng kha, Josiabo bono kasuna tháng ka.

²¹Phiya ba Neko Josiani thani tẃitun rohorwi hai hwnwi sa hor kha, “Judani habugra, chwng khoroknwi tamo khlainai? Tini ang nono kebengwi phaimani ya, phiya ba ani ari bai nang lainani se phai-o, Kaitor ano dakti khe khlaina dagi kha, Kaitor ani bwkha-o tongo, ano ta kebeng di, wng ya khe bo nono sokomornai.”

²²Phiya ba Josia bini aroni kiphil li ya. Bo Nekoni khúk tẃi khe Kaitor kók samano khna ya khe choba nang laina chong kha, hakhe ha panthor Megido-o choba nang lai kha.

²³Habugra Josia chakhla bai kokjak khe bini selengrokno hai hwnwi sa kha, “Ano tẃi bai si di, tamni hwn ba ang nang kha.”

²⁴Hakhe bini selengrok bini korai malkhungni tei kaisa malkhungo khe Jerusalemo tubu kha. Bo arono thwi khe, bini buphasongni simalwngo phobjak kha. Bebak Juda bai Jerusalemni bororok Josia thwimani bagwi kap lai kha.

²⁵Diyari Jirimia habugra Josia thwima bai bwkha khamwi kapmani kókthái kari kha, bebak rwchapnairok chwla, bwrwirok tabuk jora a kóktháino kholwi kap lai kho. Bórok abono Israilo kaisa tongmung hai khlai kha. Abo kap mung bijabo swijak kha.

²⁶Tabuk aswk Josia samung khlai langmani Subraiyungni raida-o swijak tongmani tẃi, bini samung kahamrok,

²⁷aboni kókrok, yaphangni simi buchuk jora abórok bebak Israil tei Judiani habugrarokni bijabo swijak tongo.