Read Kok Borok 2 BOSONG 36 Bible Online

2 BOSONG 36 - Kok Borok bible

2 BOSONG 36

¹Judani bororok Josiani bwsla Jehoahasno buphani yagulo Jerusalemo habugra chá rw lai kha.

²Jehoahas nokha bisi 23 phuru-o habugra cháui Jerusalemo taltham jora habugra chá lang kha.

³Hakhe Ijipni habugra bono khaui tlangwi Judani saka-o 100 talen rukphai tei kaisa talen rangchak ma rwnai hwnwi chong kha.

⁴Ijipni habugra Jehoahasni takhuk Eliakimno Juda bai Jerusalemni habugra snamwi bini mungno Jehoiakim hwnwi sláiwi rw kha, phiya ba bini takhuk Jehoahasno Ijibo tlang kha.

⁵Jehoiakim nokha bisi 25 phuruni simi habugra chána chengwi Jerusalemo bisi chisa jora habugra chá lang kha. Bo Subraiyung bini Kaitorni mokolo hamya samung máng tang lang kha.

⁶Babilonni habugra Nebukadnejar Juda-o phaiwi bono sorni dwkhwi bai khaui Babilono tlang kha.

⁷Nebukadnejar Subraiyungni nokni baksa manwirokno Babilono tlangwi bini noyungo ton kha.

⁸Tabuk aswk Jehoiakim samung khlai langmarok tei selengmasingcha samung khlaimarok tei bo sumsok khlaimarok bebak Israil tei Judani habugrarokni bijabo swijak tongo. Bini bwsla Jehoiachin bini yakchu-o habugra chá kha.

⁹Jehoiachin nokha bisi char phuruni simi habugra chána chengwi Jerusalemo taltham tei salchi jora bugra chá lang kha; bo Subraiyungni mokolo samung hamya khlai kha.

¹⁰Sachlangni jora-o habugra Nebukadnejar Babilono bono noktharni manwi kahamrok bai baksa tlang kha tei Jehoiachin bini takhukno Juda bai Jerusalemni habugra snam kha.

¹¹Jedekia nokha bisi 21 phuruni simi habugra chána chengwi Jerusalemo nokha bisi chisa jora habugra chá lang kha.

¹²Bo Subraiyung bini Kaitorni mokolo samung hamya khlai kha, bo Subraiyungni kók sanai diyari Jirimiani bwskango bini sakno koinene wng li ya.

¹³Jedekia habugra Nebukadnejarno kebengwi bacha kha, bo Kaitorni mung bai swmai tang rw kha. Bo bwkha kwrak khlaiwi Subraiyung Israilni Kaitorni thani kiphil li ya.

¹⁴Bebak ochai bokhorokrok tei bororok Kaitorni thani sói khe tong bai li ya, kubun dopharok hai selengmasingcha samung khlaiwi, Kaitor Jerusalemo lobjakmani Subraiyungni nokno sitra rw bai kha.

¹⁵Subraiyung bórokni chuchusongni Kaitor bini tẃitunrokno thak phlai ya khe bórokni thani khoraina rohoro, tamni hwn ba bo bini bororokno tei bini noktharno belai khe khairogo.

¹⁶Phiya ba bórok Kaitorni tẃitunrokno thesra khlai lai-o, bini kókno sak nang ya wngo tei diyarirokno mwnwi lai-o, Subraiyungni jolima o bororokni saka-o klaiwi yóknani lama man ya jora khlai lai-o.

¹⁷Abo bai’-no Subraiyung Babilonni habugrano bórok bai nang lai rwna tubu kha, habugra bórokni noktharono bórokni siklarok jotonono buthar bai kha. Bo khoroksano phano sikla, chakra, chwla tei bwrwino suda khairok li ya. Bórok jotono bini yago yaphar kha.

¹⁸Babilonni habugra Kaitorni nokni bebak manwi-khwnwirok, kotor kotoi, Subraiyungni nokni rangkhókrokno, habugrani tei tẃiphangrokni rangkhókrok bebakno na baiwi Babilono tubu kha.

¹⁹Tei bórok Kaitorni nokno hór bai sókchaui, Jerusalemni chokdeualno swbaiwi, bebak noyungrokno bo hór bai sókchaui tei bebak manwi kahamrokno sokomor bai kha.

²⁰Bo kwthang tong rwknairokno Babilono khaui tlang bai kha, aro bórok Parsiani habugra bacha phi ya sak bini tei bini bwsarokni seleng ma khati bai kha.

²¹Subraiyung diyari Jirimiani khúk tẃi hai hwnwi sakhlaimani abo nang phai kha, “Ha-o Sabatni lenglamung lenglaui man kha; aswk borok bukcha khe nokha bisi 70 jora Sabatni lenglama se lengla lai-o.”

²²Tabuk Parsiani habugra Sairasni habugra chámani bisi-o, diyari Jirimiani khúk tẃi Subraiyung sakhlaimani nang phainani bagwi, Subraiyung Parsiani habugra Sairasno bwkha bacha rwui bini bebak ha gwnangwi sakhlainani bagwi swiwi rohor kha.

²³Parsiani habugra Sairas hai hwnwi sa-o, “Subraiyung Chuknohani Kaitor, bo ano swngcharni bebak hano ani yago yaphar kha, bo ano Judiani Jerusalemo bini bagwi nokthar tangnani barja rw kha. Tabuk norokni bisingo bini bororok khe aro tháng di, Subraiyung bini Kaitor logi-o tong thung.”