Read Kok Borok 2 BOSONG 4 Bible Online

2 BOSONG 4 - Kok Borok bible

2 BOSONG 4

¹Solomon pitolni háyá kosongo muk 20, kebengo muk 20 tei kuchuk muk 10 khe snam kha.

²Hakhe bo twini dangai snam kha, abo thukmani muk 10 tei muk 5 khe kuchuk tei muk 30 khe aboni uarmani.

³Twi dangaini phataro mukchi khe beres[7] kitingwi abo khaksa-o bwtang tángnwi khe snamjak.

⁴Twi dangai chinwi beres saka-o bachajak, maktham salsibai bwkhak, maktham salgrabai bwkhak, maktham salka bwkhak tei maktham saltháng bwkhago nahorjak, dangai abórokni saka-o berajak, abórokni uklok khe bisingo hapjak.

⁵Dangai rwjamani khe muksa, bini búkhúk khe khuri búkhúk hai tei lili khumbar hai; dangai-o bath 3,000 twi chago.

⁶Bo sújaknai kaichi dangai snam kha, abórokno salsibai bwkhago kaiba tei salgrabai-o kaiba ton kha. Aro sógwi yapharmungno kaham khe sú-o; twi dangai kotoro khe ochairok súnani bagwi se.

⁷Bo chongjak tongmani hai khe rangchakni chati thopna snamwi noktharo, kaiba khe salgrabai bwkhago tei kaiba khe salsibai bwkhago ton kha.

⁸Bo kaichi songphangrok snamwi nokthar bisingo ton kha, kaiba salgrabai bwkhago tei kaiba salsibai bwkhago ton kha. Bo sara rangchakni dangaibo snam kha.

⁹Bo nok bisingo ochairokni bagwi khotol snam kha, khotol kotor tei khotolni bagwi dugarrok, dugarrokno pitol bai bólwi rw kha.

¹⁰Twini dangaino khe salgrabai tei salka bwkhakni nokthar busu-o ton kha.

¹¹Huram golarok, tharuk kotorrok tei dangairok snam kha. Hakhe Huram Kaitorni nokni bagwi habugra Solomonno khlai rwnai hwnmani samung pái kha.

¹²Thongla kongnwi twi dangaino kosol khe thongla bokhorogo thuklupma, tei thongla bokhorok sakani dangai thuklupjaknaino kholopnani bagwi chei hai khe snamjak.

¹³Thongla sakani dangai hai thuklupmano phinnani bagwi brwira pitolni dalim bwchlwi haino cheini babainwi-o khachiui rw kha.

¹⁴Bo yakungrok bo snamwi rw kha tei aboni saka-o dangairokno ton kha

¹⁵kaisa twi dangai kotor tei aboni kháma-o mak chinwi beresrok;

¹⁶twkrok, tharukrok tei yakheprokno, Huram pitol kwchẃng bai Solomonni bagwi Subraiyungni nokthar tangnani babwi snam kha.

¹⁷Ha panthor Jordano Sukot bai Seredani kwcharo habugra abórokno snam kha.

¹⁸Solomon abórokno kwbángma snam kha, hakhe bwswk hilik pitolni manwi snamjak kha saui man li ya.

¹⁹Kaitorni nokthar bisingni bebak manwirokno habugra Solomon snam kha; rangchakni háyá, Kaitorno auan yapharmani songphangrok,

²⁰chati thopna tei chongjak tongma tẃi nok bisingo sókjaknai rangchak kahamni chatirok,

²¹khumrok, chatirok tei yakheprok, rangchak kubui bai snam kha.

²²Chati dosi sochajaknairok, dangairok satrai sókjaknai manwirok, hór tongjaknai manwi, abórok bebak rangchak kaham kuk bai snamjak kha; phatarni dugarrok, kwthar kuk khotolni dugarrok, nukani dugarrok rangchak bai snamjak kha.