Read Kok Borok 2 BOSONG 5 Bible Online

2 BOSONG 5 - Kok Borok bible

2 BOSONG 5

¹Hakhe Solomon Subraiyungni nokni bagwi samung tangmani bebak pái súk kha. Solomon bini bupha Daud yapharmani manwirokno tubu-ui rukphai, rangchak tei bebak manwi-khwnwirokno Kaitorni nogo ton kha.

²Hakhe Solomon bebak Israilrokno, bosongni bokhorokrokno, Daudni kamiyung Siyonni Subraiyungni swmai bokhokno tubunani bagwi Jerusalemo thum kha.

³Bebak Israil bororok habugrani bwskango nokha talsnini panda jora-o kuthum lai kha.

⁴Bebak Israilni okrarok phai bai khe Lebirok swmai bokhokno tisa lai kha.

⁵Bórok swmai bokhok ríni nok bisingo tongmani bebak kwthar manwirokno, ochairok tei Lebirok abono tubu lai kha.

⁶Habugra Solomon tei bebak Israilni lukurok bini bwskango kuthumnairok, swmai bokhokni bwskango kwbángma merarok, musukrok, lekhaui man bai li ya khe yaphar lai kha.

⁷Hakhe o ochairok Subraiyungni bokhokno noktharo tubu lai kha, nok bisingni, jotoni slái kwthar kuk khotolo bwkrang gwnang cherubni kháma-o ton lai kha.

⁸Bórokni bwkrang swmai bokhok kholopjak bai-o, hakhe cherubrok bórokni bwkrang bai swmai bokhok bai balphung khe tubu-ui ton kha.

⁹Balphungrok aswk khe kolok, khotol kwthar kuk bwskangni abórokno nuk horjago, phiya ba phatarni khe nuk ya, abórok tabuk jora aro tong kho.

¹⁰Aro Musi Horebo holong belep kainwi tonmano karwi tei mungsa kwrwi; Subraiyung Israil bororok bai ha Ijipni yógwi phai phuru kók kha laimani.

¹¹Ochairok kwthar khotolni nongkhorwi phai khe bórokni bodolrokno uansuk lai ya khe, aro tong bainai bebak ochairok bórok sak sak kwthar khlai bai kha.

¹²Bebak Lebini rwchapnairok- Asap, Heman tei Jeduthun tei bórokni bwsarok bai sandairok, rí kaham kanwi, budukni tammungrok yago naui, háyáni salka bwkhago khorok 120 totro subnai ochairok bai baksa bacha kha.

¹³Totro subnairok tei rwchapnairokni samung wng kha Subraiyungno lob phuru tei hambai rw lai phuru thansa khe rwchabwi totro subwi cheuangrok pung rwui tei kubun tamjaknairok tam laiwi: Subraiyungno hai hwnwi lobo, “Subraiyung kahamma, bini hamjakma mol brúm tong phlai-o.” Aphuru nok tei Subraiyungni nok chumui bai kupulung wng kha.

¹⁴Hakhe chumuini bagwi ochairok aro monnani bachaui tongwi man li ya, tamni hwn ba Subraiyungni chẃngsacha bai Kaitorni nok kupulung wng kha.