Read Kok Borok 2 BOSONG 6 Bible Online

2 BOSONG 6 - Kok Borok bible

2 BOSONG 6

¹Hakhe Solomon hai hwnwi sa kha, “Subraiyung, bo mwnakma-o se tongnai hwnwi sa kha.

²Ang nini bagwi naithokma nok tang kha, mol brúm brúmni bagwi nini kaisa tongthai.”

³Hakhe habugra uphilwi bebak Israil kuthumnairok bacha laiwi tong phuru bórokno hamari rw kha.

⁴Hakhe bo hai hwnwi sa kha, “Subraiyung Israilni Kaitor lobjak thung, bo bini búkhúk bai ani apha Daudni thani swmai tangmano bini yak bai supung kha, bo hai hwnwi sa kha,

⁵‘Ani bororokno ha Ijipni tikhlaiwi tubu phuruni salni simi Israil bosongni kamiyungrokni bisingo kisa nok tangwi ani mung aro tongnani bagwi chong ya kho tei ang khoroksano phano ani Israil bororokni bagwi bugra chong ya kho.

⁶Tamni hwn ba ani mung tongnani bagwi ang Jerusalemno chong kha tei Daudno ani Israil bororokni saka-o tonnani bagwi chong kha.’

⁷Subraiyung Israilni Kaitorni mung bai nok tangnani abo ani apha Daudni bwkha-o tongo.

⁸Tamo khe Subraiyung ani apha Daudno hai hwnwi sa kha, ‘Nwng ani mung bai nok tangnani hwnwi nini bwkha-o chongmani abo kahamno wng kha,

⁹hai phano nwng ani bagwi nok tangwi man glak, phiya ba nini thani achainai nini sajla se ani nok tangnai.’

¹⁰Tabuk bo swmai tangmano narwk kha, Subraiyung swmai tangmani hai ani apha Daudni sak slái-o ano Israilo habugra chánani bacha rw kha tei ang Subraiyung Israilni Kaitorni mung bai khungsa nok tang kha.

¹¹Aro ang Subraiyung bororok bai kók kha laimani; swmai bokhokno ton kha.”

¹²Hakhe Solomon bebak Israil kuthum laima jidolo Subraiyungni háyá bwskango bachaui bini yakrok pholok kha.

¹³Solomon pitolni háyá mukba kosong, mukba kebeng, muktham kuchuk khe nok kwcharo tangwi aro saka-o bacha kha, bebak Israil bororokni bwskango yáskú sungwi chuknoha bwkhak yakrok surcha kha.

¹⁴Bo hai hwnwi suri kha, “O Subraiyung, Israilni Kaitor, nwng hai Kaitor o ha saka bai chuknoha-o tei kwrwi; nini bwskango bwkha rwui nwng bai tongnairokno nwng nini swmai tei hamjakma phunugo.

¹⁵Nini seleng Daud ani aphani thani swmai tangmano, nini búkhúk bai samano tini nini yak bai tang kha.”

¹⁶Tabuk abo bai, O Subraiyung, Israilni Kaitor, ani apha Daudni thani swmai tangmano narwk ja di, nwng hai hwnwi sa kha, “Nwng ani bwskango tongmani hai khe nini bwsarok ani raida tẃi tong khe Israilni achukthayungo achuknai borok cho glak.”

¹⁷Hakhe tabuk, Subraiyung, Israilni Kaitor, nini seleng Daudno samani kók nang thung.

¹⁸“Tamo khe Kaitor borok bai kubui de o ha saka-o tongno? Nai di, nokhayung tei kuchuk kukni nokhayungo se nwng chak ya; hakhe ang tangmani nok le bwswk se kotoi ja?

¹⁹Hai phano nini seleng surimani tei yapharmano cher ja di, O Subraiyung ani Kaitor tei nini seleng surimani tei kapmano khna ja di.

²⁰O nokno sal bai hor naiwi tong ja di, oro se nini mung songchana bagwi swmai tang kha tei oroni nini seleng surimano khna ja di.

²¹Nwng ani surima tei nini Israil bororok yang bwkhak nahorwi surimano khna ja di; nwng tongmani chuknohani khna ja di tei nwng khna khe nakar ja di.

²²“Khoroksa swk tei khoroksano hamya khlaiwi nini o nok bisingni háyá bwskango phaiwi swmai tang phai khe

²³nwng chuknohani khna ja di, nini selengrokno jera naui hamya khlainaino bini manthai tongmani haino khlai di, borok kahamno bini samung tẃi sokat rw ja di.

²⁴“Nini thani sumsok khlaiwi nini Israil bororok arirok bai mechenjagwi bórok kiphilwi o nok bisingo phaiwi nini thani suri phai khe,

²⁵chuknohani khna ja di tei nini Israilni bororokni sumsokno nakar ja di tei bórokno tei bórokni chuchusongno rwmani ha-o kiphilwi tubu ja di.

²⁶“Nini bororok sumsok khlaiwi nwng uatwi rohor li ya wngwi bórok nono siniui sumsokni uphilwi o nok nahorwi suri khe,

²⁷chuknohani khna ja di tei nini seleng Israil bororokni sumsok nakar ja di tei bórokno lama kaham himna phrwng di tei nini bororokni thani yapharmani ha-o uatwi rohor ja di.

²⁸“Tumungno ha-o asari nang phai khe eba bok bai manjak khe eba maitháirok hamya wng khe eba kukrok eba meua klai khe eba bórokni arirok bórokni kamiyungrokno sek phai bai khe, wng ya khe sátokma kotor sók phai khe, bemuk kotor sók phai khe,

²⁹bebak nini Israil bororok bai, bórokni tekto siui, tekto manẃi bórokni yak phologwi o nok bwkhak naharwi suri khe

³⁰hakhe nini tongthai chuknohani khna hor ja di tei nakar ja di, bórokno sak sakni manthai tongma tẃi bwthái rw di, nwng bórokni bwkhano saui mano (tamni hwn ba nwng simi bororokni bwkharokno saui mano);

³¹hakhe bórok nono ma kiri baina tẃi tei nini lama tẃi khe himwi chini chuchusongno nwng rwmani ha saka-o tongwi mannai.

³²“Abo hai kheno nini Israil bororok wng yaui hakchalma phatar hani buini borok nini mung kotor tei nini phan yak kwrakni kókrok khnaui phaiwi o nok bisingo suri phai khe,

³³nini tongthai chuknohani khna ja di tei o phatarsa surimani haino khlai di, hakhe nini Israil borok hai khe swngcharni bebak bororok nini mungno sina tẃi tei nono ma kiri baina tẃi tei ang tangmani nogo se nwng lobjago hwnwi bórok saui thung.

³⁴“Nini bororok lama twngsa swk tẃi arirok bai choba nang lainani nongkhorwi thángwi, bórok nwng chongmani kamiyung tei ang tangmani nok bwkhak naharwi suri khe

³⁵hakhe chuknoha-o tongwi bórokni surima koima khna ja di tei bórok sanmano rw ja di.

³⁶“Tumungno bórok nono kebengwi sumsok khlai khe—tamni hwn ba khoroksa phano sumsok khlai ya kwrwi—hakhe nwng bórokno joliui arirokni yago yaphar di, bórok bórokno hakchalma eba sampha ha-o khaui tlangnai;

³⁷aphuru bórok khaui tlangjakmani ha-o tongwi bwkha-o uansugwi khá kiphil khe, a ha-o tongwi ‘Nini thani chwng sumsok khlaiwi samung hamya tang kha tei lama hamya-o him kha’ hwnwi gosiui suri khe, nwng bórokni surimano khnanai.

³⁸Tumungno a ha-o bórok khá bai khúk bai nini thani kiphil khe tei nwng bórokni chuchusongno yapharmani ha bwkhak tei nwng chongmani kamiyung phaising, nini mungwi tangmani nok phaising naharwi suri khe,

³⁹hakhe nini tongthai chuknohani simi bórokni surima tei koimano khna di tei bórokno sói khe naiwi nono kebengwi sumsok khlainai nini bororokno nakar ja di.

⁴⁰Tabuk ani Kaitor, oro surimano nai ja di tei khna ja di.

⁴¹“Tabuk o Subraiyung Kaitor, bacha di, nwng tei swmai bokhok nini phan bai khe nini lenglathai-o hap di. Nini ochairok mwthangmani chum mung bai chum rwjak thung tei nini borok kahamrok nini kaham bai tongthok bai thung.

⁴²Subraiyung Kaitor, nwng thok phulmani borokno ta nor ja di. Nini seleng Daudno hamjakma bai muitu khlai ja di.”