Read Kok Borok 2 BOSONG 8 Bible Online

2 BOSONG 8 - Kok Borok bible

2 BOSONG 8

¹Solomon Subraiyungni nokthar bai bini noyung tangnani nokha bisi nwichi nang kha.

²Bo habugra Huram bai rwjakmani kamiyungrokno tang phirwi aro Israilni bororokno ton kha.

³Solomon Hamat bai Joba amchoirokno segwi na kha.

⁴Bo hasing panthoro Tadmor tei Hamatni bebak kamiyungrogo rúngma nok tang kha.

⁵Bo teibo sakani Bet-horon tei khámani Bet-horon tei kamiyung kahammarok, chokdeualrok, duglamrok, bengkirok tang kha.

⁶Balat kamiyung tei bebak bini khatima nok tongmani kamiyungrok tei bebak korairok tei korai malkhungrokni nokrok tangnani hwnwi Jerusalemo tei Lebanon, bini yago tongmani harogo chongmarokno khlai kha.

⁷Bebak Hitisarok, Amorsarok, Peressarok, Hibisarok tei Jebussarokno karwi klangjak bainai bororok, bórok Israil buya.

⁸Bórokni bosongni ha-o yakarwi klangjak bainairok bórokno karwi klangjak bainairok bórokno Israilrok sokomor yaui Solomon bórokno selengni samung tang rw bai kha, bórok tabuk jorabo tong kho.

⁹Tamni hwn ba Solomon Israil bororokno bini samungo seleng khati rw ya; bórok sengkrakrok, bini tẃiphangrok, korai malkhungrokni bokhorokrok tei korai kasanairok wng bai kha.

¹⁰Abórok khorok 250 wng kha habugra Solomonni tangphang bokhorokrok, bororokno naikini khlainani bagwi man kha.

¹¹Solomon Pharaoni bwsajwkno Daudni kamiyungni bini bagwi tangmani nogo tubu-ui hai hwnwi sa kha, “Ani hik Israilni habugra Daudni nogo tongwi man glak, tamni hwn ba Subraiyungni swmai bokhok tongmani wng kha kwthar.”

¹²Hakhe Solomon Subraiyungni thanibo tangmani nuka bwskangni háyá-o sógwi yapharmung yaphar kha.

¹³Sal brúm nangmani tẃi Musi dagiui klangmani hai khe Sabat, tal kwtalrok, bisi-o uáithamni panda, auan bángla panda, hati barsani pandani panda ma khlai-o.

¹⁴Bini bupha Daud bai raida khlaijakmani hai bo ochairokni samung khagwi rw kha tei Lebirokno bo sal brúmni bagwi ochairokno rwchabwi lobnani samungo chubana bagwi chong kha tei sal brúm duglam mwrwknairokno duglam brúmo mwrwknani chong kha, tamni hwn ba Kaitorni borok Daud abo hai khe dagiui klang kha.

¹⁵Habugra ochairokno tei Lebirokno dagimani rangkhókrokno tei kubun kókrokno kaisa phano nor lai li ya.

¹⁶Abo hai khe bebak Solomonni samungrok Subraiyungni nok tangna chengjak phuruni simi páimani jora. Hakhe kaham kheno Subraiyungni nok pái súk kha.

¹⁷Hakhe Solomon ha Idomni twijlang rukung Esiongeber tei Elotho tháng kha.

¹⁸Habugra Hiram bini tẃiphang twijlang lamarok kaham khe saui mannai borok bai khe rungkotorrok rohor kha. Bórok Solomonni selengrok bai khe Ophiro pal tháng laiwi 450 talen rangchakrok habugra Solomonni thani tubu lai kha.