Read Kok Borok 2 BOSONG 9 Bible Online

2 BOSONG 9 - Kok Borok bible

2 BOSONG 9

¹Sebani Isiri Solomonni mung tormano khna khe bono kók kuthuk kuthukmarok sẃngnani bagwi Jerusalemo phai kha. Bini logi-o borok kwbángma tei mangingangrok, mosolarok tẃijak tei kwbángma rangni, rangchak tei holong morokmarok tubu kha. Bo Solomonni thani sók phai khe bini bwkha-o tongmani bebak kókrokno sẃng bai kha.

²Solomon bo sẃngmarokno bebak saui rw bai kha. Bwrwino saui man li ya abo tẃi kókrok tháisa phano Solomonni thani huijak kwrwi.

³Sebani Isiri Solomonni elem tei bo nok tangmano nuk kha;

⁴bini songphango chámung, bini selengrokni tongthai, rí naithok chumjak khe monnairokno, khuri tẃinairokno tei bo Subraiyungni nogo kasaui thángmani yakhilino bo nugwi kwmamjak kha.

⁵Bwrwi habugrano hai hwnwi sa kha, “Nini kók ani ha-o tong twtwi khnamani nini samungrok tei nini elem sói kubuino.

⁶Phiya ba ani mokol bai baithang phaiwi nuk phai ya sak ang poito cháui man li ya; nai di nini khaksa elem tongma suda ano sa ya gwja. Ang khnamani slái se báng kugo.

⁷Nini bororok bwswk hamchajak, nini bwskango bachaui máng nini elemni kók khnanai nini selengrok bwswk se hamchajak.

⁸Subraiyung nini Kaitor lobjak thung, Subraiyung nini Kaitor bini achukthayungo habugra chá rwnani nono belai chajago. Tamni hwn ba bo bini bororok Israilrokno hamjago tei mol brúm brúm bórokno songchanai; nwng sói tei kubui bai khe naiwi manna tẃi khe bo nono bórokni habugra snam kha.”

⁹Hakhe bwrwi (Isiri) habugra Solomonno 120 talen rangchak tei kwbángma mosolarok tei holong kahamrok rw kha. Sebani Isiri habugra Solomonno rwmani hai mosolarok tei kaham se kwrwi.

¹⁰Teibo habugra Hiramni selengrok bai habugra Solomonni Ophirni rangchak tubunai selengrok algam buphang tei holong kahamrok tubu lai kha.

¹¹Habugra algam buphang bai Subraiyungni nokni tei habugrani nokni kálam tei rwchapnairokni bagwi budukni tammungrok snam kha. Ha Juda-o swkango abórok hai uáisa phano nuk ya kho.

¹²Habugra Solomon Sebani Isirino bo muchungwi sanmani bebakno, bo tubumani slái kwbáng kuk rw kha. Hakhe bini selengrok bai khe bini ha-o kiphilwi tháng kha.

¹³Solomon nokha bisi kaisa-o rangchak manmani abo 666 talen ká-o.

¹⁴Abo bepar thwngnairok tei rangchak snamnairok, rwmano karwi se tei Arabiani habugrarok tei hani hastepharok Solomonni thani rangchak bai rukphai tubu bai-o.

¹⁵Habugra Solomon 200 phui kotorma rangchak tokjak bai snam kha; abo kaisa kaisa kilo 7 rangchak tokjak wng anw.

¹⁶Bo 300 phui kotoi rangchak tokjak bai snam kha, kaisa kaisa-o 3 kilogram rangchak wng anw. Habugra abórokno Lebanonni bolong nokrogo ton kha.

¹⁷Habugra kotorma khe mayung buani achukthayung snam kha tei rangchak kaham bai khobwi rw kha.

¹⁸Achukthayungni kálam kaidok tongo tei kaisa yakung berajaknai kwrwng laijak rangchak bai snamjak. Achukthayungni babainwi-o yaktwk tongo, yaktwk babainwi gana-o singho bachajak.

¹⁹Chinwi singho kálamo bachajak, kálam brúmni páithago masa masa khe bachajak. Abo hai khe kubun ha-o kebo snam ya kho.

²⁰Bebak habugra Solomonni nungjaknai khurirok rangchakni máng se tei Lebanonni bolongni nokni manwirok rangchak kaham máng se; Solomonni jora-o rukphai aswk samungo nangtha ya.

²¹Tamni hwn ba rung kotor Tarsiso Hiramni selengrok bai tháng kha, nokha bisik thamo uáisa Tarsisni rung kotor rangchak, rukphai, mayung bua, mwkhrarok tei tok-raitháirok tubu-ui phai-o.

²²Habugra Solomon o hayungni bebak habugrarokni slái rangbo gwnang kuk tei elembo kwrwng kuk.

²³Bebak hayungni habugrarok Kaitor Solomonni bwkha-o rwmani elemno khnanani bagwi phai bai-o.

²⁴Bórok jottono Solomonni thani kwbángma rangchak tei rukphaini manwirok, rírok, aitalrok, mosolarok, korairok tei koraichirkarok bisi brúm brúm hili tubu lai-o.

²⁵Habugra Solomonni korairok tei korai malkhungrokni bagwi khung brwisai khotol tongo tei 12,000 korai kasanai sengkrakrok tongo, bo abórokno korai malkhung tonmani kamiyungrogo tei baksano habugra pal khe Jerusalemo ton kha.

²⁶Bo bebak habugrarokno Uphratisni simi ha Philistia jora tei Ijipni ha ari jora muphunwi bugra chá kha.

²⁷Habugra Jerusalemo rukphaino holong hai tei sidar buphangno Sephelani khwichang buphang hai khe kwbángma manthok rw kha.

²⁸Solomonni bagwi korairok Ijipni tei bebak hani naharjago.

²⁹Solomon habugra chámani yaphang buchuk abo diyari Nathanni kerong kothoma-o tei Silo-o tongnai Ahiani kók diyari-o tei diyari Iddo Nebatni bwsla Jeroboamno tẃiwi nukmano swijak tongo.

³⁰Solomon Jerusalemo bebak Israilni saka-o nokha bisi 40 habugra chá kha.

³¹Solomon thwi khe bupha Daudni kamiyungo phobjak kha; Rehoboam bini bwsla bini yakchu-o habugra chá kha.