Read Kok Borok EJRA 3 Bible Online

EJRA 3 - Kok Borok bible

EJRA 3

¹Israilsarok bórokni kamiyungo tong phaimani nokha talsni-o talo khe, bororok Jerusalemo thansa khe kuthum lai kha.

²Aphuru Josadakni bwsla Jesua bini logisong ochairok tei Sialtialni bwsla Serubabel tei bono chubanairok Kaitorni háyáno snam lai kha. Tei sógwi yapharnani bagwi aro Musini kerongo swijak tongmani tẃi’-no, Kaitorni bororok,

³a ha-o tongnai bororokno kiri twtwi phano bórok agini tongma’-ono háyá snam lai kha tei sal brúm phung bai sarigo Subraiyungni thani sógwi yaphar mung yaphar lai kha.

⁴Swijak tongma haino bórok rí nokni panda khlai lai kha tei sal brúmni bagwi nangmani jora tẃi sógwi yaphar lai kha.

⁵Abono karwi bórok sógwi yaphar lai-o, tal kwtalni yapharmung yaphar lai-o tei Subraiyungni thani khoroksa khoroksa muchungwi yapharmarokbo yapharjak kha.

⁶Bórok Subraiyungni nokthar tangnani cheng lai ya sini’-no, nokha talsni talni puilani salo khe sógwi yapharma cheng lai kha.

⁷Hakhe bórok itni samung tangnairokno, buphangni samung tangnairokno rang rw kha, Sidon bai Turni bororokno khe Parsiani habugra Sairas Lebanonni sidar buphangrok rwna hwnwi lonmani buphangrokno twijlang tẃi Jopa-o tubuna bagwi chámung tei nungmungrok rw kha tei thokrokbo rw kha.

⁸Hakhe bórok Kaitorni nok Jerusalemo phaimani nokha bisik nwini talnwini talo, Sialtialni bwsla Serubabel, Josadakni bwsla Jesua tei bebak takhukrok ochairok. Lebirok tei bebak buini hani Jerusalemo phainairok samung tang laina cheng lai kha, Lebirokno khe nokha bisik nwichi bisini simi chengwi bebak okrarokno Subraiyungni nok tangma-o naikini khlainani chong kha.

⁹Tei Jesua, bini bwslasong tei bini takhukrok, Kadmiel bai bini bwsarok, Judani bwsarok tei Henadadni bosongrok bai Lebini bwsarok pal khe Kaitorni nok tang thani yak baksa khe chuba lai kha.

¹⁰Hakhe bororok Subraiyungni nok tangnani cheng lai khe, Israilni habugra Daud bai chongjakma hai, ochairok bórokni chummung chum laiwi totro kotor yago na laiwi, Asapni bwsa Lebirok cheuang tam laiwi Subraiyungno lob lai kha,

¹¹Bórok Subraiyungno lobmung bai hambai rwui hai hwnwi rwchap lai kha: “Subraiyung kaham, bini Israilno hamjakma mol brúm brúm tongnai.” Bebak bororok khorang kotorma khe Subraiyungno lobwi chirik lai kha, tamni hwn ba, Subraiyungni nokthar tangnani chengjak kha.

¹²Borok kwbángma tongthogwi chirik lai phano, swkangni noktharno mokol baithang nuk rwknai ochairok, Lebirok tei bosongni okrarok tabuk nok kwtal tang phijakmano nugwi chirik lai kap lai kha.

¹³Chirik laimani khorang aswk khe tor kha, hakchalo tong twtwi’-no bororok khna kha, abo bai’-no kapmani khorang bai tongthogwi chirik laimani khorangno romwi man li ya.