Read Kok Borok EJRA 5 Bible Online

EJRA 5 - Kok Borok bible

EJRA 5

¹Aphuru diyari Hagai bai Iddoni bwsla Sakaria Israilni Kaitorni mung bai Jerusalemo tong bainai Judairokni bagwi kók diyari sa kha.

²Hakhe Sialtialni bwsla Serubabel bai Josadakni bwsla Jesua, bórokni kók khna khe Jerusalemni Kaitor nok tang phina cheng lai kha tei diyarirok bórokno chuba kha.

³Aphuru saltháng twima nar amchoini hastepha Tatenai, Setharbojenai tei bórokni tẃiphang palrok Jerusalemo phaiwi hai hwnwi sa phai kha, “Sabo norokno abo hai nokthar tangna dagi lang?”

⁴Bórok teibo sẃng kha, o nok tang rwnai bororokni mung tamo?

⁵Tamo khe Kaitor Judaini okrarokno naikhlaiwi tongo, hakhe Dariasni thani kóktun swi rohorwi bini aroni kók khna phiya sak samung tangmano mwthak li ya.

⁶Omo wng kha twima ayang nar amchoini hastepha Tatenai Setharbojenai tei bórokni palrok habugra Dariasni thani kóktun swihor laimani:

⁷Bórok swihormani kóktun khe omo hai, habugra Dariasni bebago’-no khakchang thung.

⁸Habugra saui man thung, chwng ha Juda amchoini kwplaisa Kaitorni nogo tháng lai kha, abo holong kotormarok bai tei buphang bai khe chokdeual thepajak, samungrok kaham khe khlai rwui snamjago tei samung belai do laiwi tongo,

⁹hakhe chwng okraroknobo hai hwnwi sẃng kha, “Sabo norokno abo hai nokthar tangnani tei oro manwirok thepanani dagi lang?”

¹⁰Tei chwng nono sa horna bagwi samung tang rwnai okrarokni mungbo bórokno sẃng kha,

¹¹bórok hai hwnwi sa kha, “Chwng chuknoha bai o hayungni Kaitorni selengrok, chwng bisi kwbángma swkang Israilni habugra tangmani a noktharno tei uáisa tang phiro,

¹²tamo khe chini chuchusong chuknohani Kaitorno joli rwmani bagwi bo Babilonni habugra Nebukadnejarni yago bórokno yaphar kha; Nebukadnejar o noktharno swbaiwi bororokno ha Babilono tlangwi tháng kha.

¹³Hai phano Sairas Babilonni habugra chána cheng phuru-o, bo Kaitorni noktharno ma tang phinai hwnwi dagi kha.”

¹⁴Tei Nebukadnejar Jerusalemni noktharo tongma rangchak rukphaini manwirokno tlangwi Babilono bini mwtai nogo tonwi kha. Abórokno Sairas mwtai nokni tikhlaiwi Sesbajar hwnwi Judani Hastephani yago yapharwi rw kha,

¹⁵tei bo sa kha abórokno tlangwi Jerusalemni noktharo tonwi di tei agi nokthar tongmani aro’-no aro Kaitorni nokthar tang lai phi di,

¹⁶hakhe Sesbajar phaiwi Jerusalemo Kaitorni nok tangnani bagwi thongla kái phai kha, aphuruni simi tangjakmani tabukbo abo pái ya kho.

¹⁷“Hakhe tumungno habugra nai khe Babilonni habugra Sairas Jerusalemo Kaitorni nokthar tangna bagwi daimung sa de sakhlai sakhlai ya abono bini swiwi narwkma manwirok khatiui narwkthani naitugwi naiwi mano. Omoni yagulo habugra chá-o hwnwi uansukmano chongwi chwngno saui rwna wng thung.”