Read Kok Borok EJRA 9 Bible Online

EJRA 9 - Kok Borok bible

EJRA 9

¹Abórok bebak khlai bai khe, Israilni kisa tẃiphangrok, phaiwi ano sa phai kha, Israil bororok, ochairok, Lebirok tei bórokni gana-o tongnai kubun dopharok Ammonsarok, Moabsarok, Ijipsarok, Kanansarok, Hitisarok, Peressarok, Jebussarok tei Amorsarok bai kak laijak khe tong ya, bórokbo bororokni selengmasingcha tongma tẃi’-no tong kha.

²Juda bororokni sajlasong buini hani bwrwirok bai káijak lai kha, hakhe Kaitorni dopha kwtharrok a hani bororok bai gwdalwi kha. Ojarok bai tẃiphangrok se lama phér bai kha.

³Abono ang khna khe khá khamwi ani kanmani rírokno sichigwi bwkhnai bai khochairok sachigwi bwkha hamya wngwi achuk kha.

⁴Ang khá hamya wngwi sarikni yapharma jora-o aro achugwi tong khe, buini hani kiphilwi phainairok kók khna ya wngma bai Israilni Kaitorni kókno kirijagwi kwlwiwi ani gana phaiwi chorsa khe kiting lai kha.

⁵Sarikni yapharmani jora sók phai khe, ang ok bukcha tongmani bachaui ani rí kichikrokno kanjak khe ang yáskú sungwi ani Subraiyung Kaitorni thani yak phologwi

⁶hai hwnwi sa kha, “O ani Kaitor nini bwskango ani mwkhang tisanani ang belai lachi kha, chini bokhorokni slái chini sumsok chuk súk kha. Tei chini cha yarok chukha jora sógwi kha.

⁷Chini chuchusongni simi tabuk jora chwng nini bororok kwbángma cha ya khlai kha, chini sumsokni bagwi chwng, chini habugrarok, chini ochairok, kubun hani habugrarokni yago klai kha, khokjak kha tei buini ha-o khaui tlangjak kha, tini wngma haino lachimasingcha wng súk kha.”

⁸Tabuk srapsani bagwi, Subraiyung chini Kaitor khairokjagwi buini ha-o khaui tlangjakmani phiyógwi chwngno bini kwthar ha-o kwchang kwchang khe tong rw kha. Chini Kaitor chwngno khajaknani yakni kisa phiyógwi chini mokol kiyok rw kha.

⁹Chwng khajagwi tong phurubo chini Kaitor chwngno bini khairokma phunuk kha tei báikhrubwi klai tongnai Kaitorni nok kwthar tang phina bagwi aro tongnani tei Juda bai Jerusalem bisingo chwngno kati rwnani khlai kha.

¹⁰Tabuk chini Kaitor omo hairokni yagulo chwng tamo sa sinai? chwng nini dagimarokno khna lai li ya.

¹¹Nini seleng diyarirokni khúk tẃi hai hwnwi dagi kha, norok habwi segwi nanani naimani ha le borok hamya bai máng kupulung, bórok tong mung hamya bai yaphang buchuk páithak jora sitra bai máng kupulung.

¹²Aboni bagwi’-no norokni sajlasongno bórokni sajwksong bai ta kái lai di. Phiya bórokni sajwksong bai bo norokni sajlasongno ta kái di, kwchang kwchang tongnano tei bórokni núkhung chanani-o ta chuba di, hakhe norok a ha-o tongthok khe tongwi mannai tei norokni bosong bwsa-bẃtẃirok mol brúm brúm tongwi mannai.

¹³Chini sumsok tei cha ya khlaimani bagwi chwngno sátokmani yagulo chwng saui mano, chini Kaitor chwng kwbángma sátokma mannani tongmani hai phano bo kisa se sátogwi baksano omo hai khe yakarwi klang kha.

¹⁴Hakhe chwng bahai khe nini dagima khna yaui selengmasingcha khe tongnai tei borok hamyarok bai kái lai bór lai wng lai mannai ba? Chwng abo hai khlai khe, nwng chwngno joliui tei khoroksano phano narwk yaui sokomor suknai, hakhe khoroksa phano yógwi tong rwk glak.

¹⁵O Subraiyung Israilni Kaitor, nwng se sói, chwng tini jora yakarwi klangwi tong rwkmani chwng chini o cha yarokno tẃiwi nini bwskango bachanani chini kisa phano phan kwrwi.