Read Kok Borok NEHEMIA 1 Bible Online

NEHEMIA 1 - Kok Borok bible

NEHEMIA 1

¹Omo Hakaliani bwsajla Nehemiani kókrok. Artasarses Parsia-o habugra chámani nokha bisik nwichini Kisleb talo ang, Nehemia noyung Susa-o tong phuru,

²Hanani hwnwi ani takhukrokni bisingo khoroksa tei kubun bodol kaisa bororok bai Judani phaiwi sók phai kha; hakhe ang bórokno buini ha-o khaui tlangjak phuru yógwi tong rwknai Judairok tei Jerusalem bahai tong hwnwi sẃng kha.

³Bórok ano hai hwnwi sa kha, “Yógwi tong rwknairok tabuk belai tekto tei lachima manẃi tong bai ja-o, Jerusalemni chokdeualrok swbaiwi khibijak kha tei aboni duglamrok hór bai sógwi sokomorjak kha.”

⁴Ang abórokno khna khe ang achugwi kap kha, tei sal kolokma ang khá khamwi tong kha tei ang chukhani Kaitorni bwskango chá ya-nung ya khe suri san kha.

⁵Hakhe ang hai hwnwi sa kha, “O chukhani Subraiyung Kaitor, belai kotor tei kirimasingcha Kaitor, hamjaknai tei bini dagimarokno kaham khe khlainairok bai nwng sói khe swmairok narwknaisa;

⁶o Subraiyung nini seleng sapung-hopung nini bwskango nini Israilsarokni bagwi suri sanmano khunju kaichomwi khna ja di tei mokol phiyogwi naikhlai ja di. Chwng Israilni bororok, ang bai tei ani chuchusong aswk nini thani sumsok khlaimani bebakno ang nini thani gosi-o.”

⁷Chwng nini bwskango belai samung hamya tang kha tei nwng dagima hai khlai li ya. Chwng nini seleng Musini yak tẃi rwmani kerongrokno tẃi li ya.

⁸Nini seleng Musino dagimarokno muitu khlai di, “Norok sói khe tong ya wng khe, ang norokno dopharokni bisingo piring-poroi khlainai.

⁹Phiya ba norok ani thani kiphilwi phai khe tei ang norokno dagimarokno khlai khe, ang khulumjaknani hwnwi saimani-o thumwi norokno tubu-ui phai phinai.”

¹⁰Bórok nini selengrok tei nini sakni bororok; kwmamsingcha phankrak phan tei nini yak bai bórokno phiyók kha.

¹¹O Subraiyung, nini seleng surimano tei nono bórinairok suri sanmano khunju kai ja di. Nini selengni samungno cha rw ja di tei habugrani thani ano khairokjakna tẃi khlai ja di. Ang a jora-o habugrani khuri tẃinai ja se.