Read Kok Borok NEHEMIA 13 Bible Online

NEHEMIA 13 - Kok Borok bible

NEHEMIA 13

¹A salo Musini kerong bororokni bwskango poriui khna rwjak khe, aro omo hai swijak nuk kha: Ammonsarok eba Moabrok Kaitorni bororok bai ma gwdal glak hwnwi.

²Tamni hwn ba Israilni bororok ha Ijipni yógwi phai phuru bórok chánani mai tei twi rw sok li ya, phiya ba Balamno se Israilrokno swrainani bagwi na rw hor kha, hai phano chini Kaitor a swraimungno sláiwi hamari se khlai si-o.

³Bororok kerongni kók khna khe buini hani bororokno Israilrok bai khak kha.

⁴Chini Kaitorni noktharni barja mannai ochai Eliasib sal kwbángma swkang’-no Tobia bai kwtha laijak,

⁵Bo Tobiani bagwi nok kotorma kaisa bórok swkango mai yapharma, satrai, manwirok chi-o kaisa, yapharmani mai, angur bwtwi, Lebirokni bagwi thok, rwchapnairok, duglam mwrwknairok tei ochairokni bagwi yapharmarok tei tong soknani nok rw kha.

⁶Omorok wngwi tong phuru ang Jerusalemo kwrwi, ha Babilono Artasarses habugra chámani nokha bisi thamchinwi phuru ang bini thani kiphilwi tháng kha tei sal kisani ulo khe ang bini thani sanwi.

⁷Jerusalemo kiphilwi phai kha, hakhe Eliasib Kaitorni noktharno Tobiani bagwi rwui samung hamya tangwi tongmano saui man kha.

⁸Ang belai joliui Tobiani núkhungni manwirokno nok bisingni phataro khitarwi rohor kha.

⁹Hakhe nokno kwthar khlai phinani dagi kha tei ang aro Kaitorni manwi-khwnwirokno, mai yapharmarok, satrairokno tubu phi kha.

¹⁰Ang omonobo saui man kha, bororok Lebirokno chámung rw li yani bagwi, Lebirok, rwchapnairok, samung tangnairok, sak sakni panthoro kiphilwi tháng bai phi kha,

¹¹hakhe ang tẃiphangrokno hai hwnwi kul kha, “Tamni bagwi Kaitorni nok ba cherjak li ya wng lang?” Ang bórokno thum baiwi bórokni sak sakni samungo thepa phi khua.

¹²Hakhe bebak Israilni bororok chi-o kaisa, mai, angur bwtwi, thokrok rwbamo tubu bai kha.

¹³Ang omo bororokno rwbam nokni barja chongjak ochai Selemia, swinai Sadok, Pedaia hwnwi Lebi tei bórokno chubanai Jakurni bwsla Hanan, Mataniani busuk, tamo khe bórok se sói borok gwja, bórokni samung wng kha, bórokni takhuksongno banta khe rwnai barja.

¹⁴O ani Kaitor, ang omorok bebak ani Kaitorni noktharni bagwi tei bini samungrokni bagwi khlaimano muitu khlai ja di.

¹⁵A jora-o ang Judani bororokno nuk kha Sabat salo angur bwtwi sep lai-o tei mai poja tubu lai-o tei koraichirka saka-o poja boksa lai-o, abono karwi angur bwtwi, khwichang tei bebak poja boksin laiwi bórok Sabat salo Jerusalemo tubu lai-o, ang bórokno Sabat salo mungsa ta phal di hwnwi hwn kha.

¹⁶Jerusalemo tongnai Turni bororok, á bai kubun manwirokno sabat salo phalnani bagwi Jerusalemo tongnai Judani bororok tei Jerusalemo tongnairokni thani phal phai-o.

¹⁷Ang Judani tẃiphangrokno hai hwnwi kulwi sa kha, “Nai di, norok Sabat salno swbaiwi bubo hai samung hamya khlai kha?

¹⁸Norokni chuchusong omo hai khlai lang ya diba tei abo hai khe chini Kaitor chini saka-o tei o kamiyungno hamya bai sátok ya diba?” Hai wng twtwi phano norok Sabat swbaiwi Israilni saka-o Kaitorni jolimung teibo tubu kha.

¹⁹Sabat salni swkang sal hapsaui phai khe’-no ang Jerusalemni duglamrok kholopnani dagi kha tei Sabat pái ya sak duglamrok ta phiyok di hwnwi sa kha, sabat salo kebo bisingo mungsa tubujak ya tẃi khe ang ani kisa borokno duglamo tong rw kha,

²⁰tei bepar thwngnairok bai podrepot manwi phalnairok Jerusalemni phataro uáisa-uáinwi ma tong kha.

²¹Ang bórokno hai hwnwi kului ma sa kha, “Tamni norok phataro naisingwi ma tong? Norok omo hai khlai phi khe ang yak ma tisanai,” Aphuruni simi khe bórok tei Sabat salo phai li ya.

²²Hakhe ang Lebirokno sak sakno kwthar khlai bai di tei Sabat sal kwthar khe tẃijakna tẃi khe duglamrok mwrwk di hwnwi dagi kha. Omoni bagwi ano muitu khlai di, o ani Kaitor, nini sói hamjakma bai ano mwthang ja di.

²³A jora-o ang teibo nuk kha, Judaini bororok Asdodni, Ammonni Moabni bwrwirok bai káijak lai kha.

²⁴Bórokni bere baksa borokni bwsa-bẃtẃirok Asdodni kók se sa lai si-o, baksa kubun kók, bórok Judai kókno saui se man li ya.

²⁵Ang bórokno kulwi swrai kha, baksano khe bu-ui, bórokni bwkhnai phui kha tei Kaitorni mung bai bórokni chwla bwrwi bai sakni bwsa-bẃtẃirokno kái li ya hwnwi swmai tang rw bai kha.

²⁶Israilni habugra Solomon ba buini hani bwrwirokno naui’-no sumsok wng ya diba? Dopha kwbángmani bisingo bo hai khoroksa phano habugra kw se kwrwi tei bo wng kha Kaitor bai hamjaknai. Kaitor se bono Israilni bagwi habugra snamo, hai phano buini hani bwrwi se bono sumsogo khiklai si-o.

²⁷“Hakhe chwng ba norokni kók khnaui buini hani bwrwi bai káijagwi de omo hai Kaitorni bwskango samung hamya khlainai ba?”

²⁸Ochai bokhorok Eliasibni bwsla Jehoiada wng kha Horonsa Sanbalatni bwchamari; ang bono oroni rwkhlaiwi rohor kha.

²⁹O ani Kaitor, bórok bahai khe ochaini samung tei ochairok, Lebirok swmai tang laimano swbai kha muitu khlai di.

³⁰Abo tẃi khe ang bórokno buini hani bororok bai srai-srai khlai kha. Ang ochairok bai Lebirokni samungni bagwi kwtal dagima khlaiwi rw kha.

³¹Nangmani jora buphang tei tháiskangni yapharnabo rw kha. O ani Kaitor, samung kahamrokni bagwi ano muitu khlai ja di.