Read Kok Borok NEHEMIA 3 Bible Online

NEHEMIA 3 - Kok Borok bible

NEHEMIA 3

¹Ochai bokhorok Eliasib tei bini ochai palrok bachaui mera duglamno tang lai phi kha. Bórok abono yaphar lai kha tei aboni duglambo khlai rw lai kha. Bórok chokdeualni khungsarani nok kuchukno tei Hananelni nok kuchukno bo yaphar lai kha.

²Jerikoni bororok tei kaisa bwkhakno tang lai kha. Imrini bwsla Jakur tei kaisa bwkhakno tang kha.

³Hasena bosongrok Á duglamno tang lai kha, bórok bini phaklaino songcha lai kha, duglam khlai lai kha, berepjaknai tei dugar berepnani dang snam lai phi kha.

⁴Bórokni ulo Uriani bwsajla Meremot Hakosni bwsla tei kaisa bwkhakno snam lai phi kha. Berekiani bwsla Mesulam bai Mesesabelni bwsla tei kaisa bwkhakno snam lai phi kha. Tei bórokni ulo Banani bwsla Sadokbo snam phi kha.

⁵Bórokni ulo Tekoani bororok bo snam lai phi kha, bórokni bisingo kolok kotorrok khe bórokni Subraiyungni bagwi samung kisa phano tangna muchungjak ya.

⁶Paseani bwsla Joiada bai Besodeiani bwsla Mesulam Jesanani duglamno snam lai phi kha. Bórok aboni buphang boui dugar snam lai phi kha tei aboni berepjaknairok thepaui rw kha.

⁷Bórokni yagulo tang lainairok khe Gibeonsa Melatia, Gibeono tongnai Meronotsa Jadon tei Mijpani bororok twimani salthángbaini habugrani tongma nok jora tang lai kha.

⁸Bórokni ulo rangchakni manwi snamnai Harhaiani bwsla Ujiel aboni ulnino snam lai kha. Aboni ulo thok motom snamnaisa Hanania snam phi kha, bórok Jerusalemni chokdeual kuar jora snam lai kha.

⁹Aboni ulo khe Jerusalem amchoi khaksano naikini khlainai Hurni bwsla Rephaia snam phi kha.

¹⁰Bórokni ulo Harumapni bwsajla Jedaia bini nok gana-o tang kha. Aboni ulnino Hasabniani bwsajla Hatus snam phi kha.

¹¹Harimni bwsla Malkija tei Pahatmoabni bwsla Hasub tei khaksa bai Thapa nok kuchukno snam lai phi kha.

¹²Aboni ulo tei khaksa Jerusalem amchoino naikini khlainai Halohesni bwsajla Salum tei khaksano snam phi kha. (Bini bwsajwk bono a samungo chuba kha.)

¹³Hanun bai Janoa a kamiyungo tongnairok harungni duglamno snam lai phi kha tei bórok dugar snamwi aboni berepjaknairok khlai kha tei 440 mitar chokdeual snam phi kha abo khi duglam swk hakchalo.

¹⁴Bet-hakherem amchoino naikini khlainai Rekabni bwsla Malkija khi duglamno snam phi kha, bo aboni dugar snamwi berepjaknai bai tala rwjaknai khlaiwi rw kha.

¹⁵Mijpa amchoino naikini khlainai bokhorok Kolhoseni bwsajla Salum twimuk duglamno snam phi kha. Bo aboni duglam snamwi kholobwi rw kha, hakhe aboni berepjaknai bai tala rwjaknairok khlaiwi rw kha. Bo habugrani tháiblwng ganani Selani pukhirini chokdeualno, Daudni kamiyungni simi ongkhorwi thángjaknai lama jora snam phi kha.

¹⁶Bini ulo Betjur amchoi khaksano naikini khlainai bokhorok Ajbukni bwsla Nehemia Daudni simalwngni tei babaisa bwkhak pukhiri snamjak, phan gwnang bororokni nokrokno snam phi kha.

¹⁷Aboni ulo Lebirok snam lai phi kha, bini ulo Banini bwsla Rehum bini ulo Keila amchoi khaksano naikini khlainai bokhorok Hasabia bini amchoino snam phi kha.

¹⁸Aboni ulo Keilani tei khaksa amchoino naikini khlainai bokhorok Henadadni bwsajla Babai snam phi kha.

¹⁹Aboni ulo Mijpano naikini khlainai bokhorok Jesuani bwsajla Ejer chobani da-seng tonmani nok jora tei chokdeual páithak jora snam phi kha.

²⁰Aboni ulo Jabbaini bwsajla Baruk ochai bokhorok Eliasibni nogo hapmani jora snam phi kha.

²¹Aboni ulo khe Hakosni busuk tei Uriani bwsla Meremot tei khaksano Eliasibni nok páithak jora snam phi kha.

²²Bini ulo khe ochairok, hano kitingwi tongnai bororok abono snam lai phi kha.

²³Benjamin bai Hasub bórok nokni uklok bwkhago snam lai phi kha. Aboni ulo Ananiani busuk, Maseiani bwsajla Ajaria bini nok bwskangnino snam lai phi kha.

²⁴Aboni ulo Henadadni bwsajla Binui Ajariani nokni simi nokbusup páithak jorano snam phi kha.

²⁵Ujani bwsla Palal chokdeual busupni simi chengwi kuchuk noyungni nok kuchukni simi mwrwkma nok jorano snam phi kha.

²⁶Parosni bwsajla Pedaia salka phaisingni Twi duglamni ganani simi noktharni mwrwkmani kuchuk nok jorano snam phi kha. (Abo Ophel hwnwi khaksa kamiyungni gana, Noktharo samung tangnairok snam phimani.)

²⁷Aboni ulo Tekoani bororok nokthar mwrwkmani nok kuchukni uklokni simi Ophelni chokdeual gana jora snam phi kha.

²⁸Korai duglam sakano ochairok sak sakni nokni uklokno snam lai phi kha.

²⁹Bórokni ulo Imerni bwsajla Sadok bini nok ukloknino snam phi kha. Sekaniani bwsajla Semia, salka phaisingni duglam mwrwknaibo snam phi kha.

³⁰Aboni ulo Selemiani bwsajla Hanania bai Salap khorokbani ulni bwsajla Hanun tei khaksano snam lai phi kha. Berekiani bwsajla Mesulam bini nok ukloknino snam phi kha.

³¹Aboni ulo Malkija[1] hwnwi khoroksa rangchakni samung tangnai noktharo samung tangnairokni nok jora tei bepar thwngnairokni nok jora khe Mipkad duglam tei nok busupni kuchuk nok jora’-no snam phi kha.

³²Tei rangchakni manwi taknai bai bepar thwngnai nok busupni khotolni simi mera duglam jora snam lai phi kha.