Read Kok Borok NEHEMIA 4 Bible Online

NEHEMIA 4 - Kok Borok bible

NEHEMIA 4

¹Chwng Judairok chokdeual tangwi tong kha hwnwi Sanbalat khna khe belai jolijagwi Judairokno thesra sa kha.

²Bini takhukrok tei Samariani sengkrakrokni bwskango bo hai hwnwi sa kha, “O pot kha ya Judairok tamo khlaima klai? Bórok kamiyung de songchana nai? Bórok chokdeual de tang phina nai? Bórok yapharmung yaphar lainai de? Salsa bai bórok samung pái lainai de? Samung chúk li ya kukhrupjak holong sókjak burungno bórok haino hai snamwi da man phino ba?”

³Ammonsa Tobia bini gana-o bachajak tei bo, “Bórok holongni chokdeual snammani aro siyalsa masa kasama bai se abo bebak bái anw!” hwnwi sa kha.

⁴O chini Kaitor, khna ja di, chwng belai khe mwkhang sókjak kha, chwngno thesra khlaima bórokni bokhorok saka-o klai phi thung, bórokni tong kwrwi sekjak baiwi buini ha-o khaui tlangjak thung.

⁵Bórokni cha ya khlaimano ta kholop di; tei nini bwskangni bórokni sumsokno hu-ui ta khibi di, bórok tangnairokni bwskango nono joli rw kha.

⁶Hakhe chwng chokdeualno tang lai kha tei abo daktino kosa kuchuk jora chokdeualrok kwrwngwi páima klai kha. Tamni hwn ba bororokni bwkha-o samung tangna muchungjakma tongo.

⁷Tamni hwn ba Sanbalat, Tobia, Arabni bororok, Ammonsarok tei Asdodo tongnairok chwng Jerusalemni chokdeual tang laimani doui tongo hwnwi khna khe bórok belai jolijak kha,

⁸hakhe bórok Jerusalemo phaiwi nang lainani tei bororokno urumuru phnangnani chap lai kha.

⁹Tamni hwn ba chwng chini Kaitorni thani suri san lai kha tei sapung-hopung mwrwgwi tong lai kha.

¹⁰Hai phano Judani bororok hai hwnwi sa kha, “Barja tẃinairokni phan chúk ya wng kha, tei manwi hamya kwbángma khibijaknai tong kho, bahai khe chwng chokdeual tangwi man sinai?”

¹¹Chini kena arirok, “Bórok si slap ya sini tei chwngno nuk ya sini bórokno thángwi buthar lainai tei o samungno mwthagwi pái lai sinai,” hwnwi sa lai-o.

¹²Bórokni gana-o tongnai Judairok uáichi chini thani phaiwi hai hwnwi sa phai kha, “Bórok kwrẃng kwrẃngo tongmani aroni phaiwi chwngno kebengwi bacha phainai[2].”

¹³Hakhe chokdeual bisingni hache jidolo snamwi pái súk ya tongthani bosong thwgwi bórokno sengrok, koslurok tei chakhlarok yago tẃi rwui ton kha.

¹⁴Naiba bororok belai uana laijak, hakhe ang bachaui ojamarokno, tẃiphangrokno tei bebak bororokno hai hwnwi sa kha, “Bórokno ta kiri di, kirimasingcha phan gwnang Subraiyungno se muitu khlai di, norokni takhukrokni bagwi, nwslasongrokni bagwi nwsajwksongrokni bagwi, nihiksongrokni bagwi tei núkhungrokni bagwi choba nang lainai.”

¹⁵Bórok chap laimano chwng saui man kha hwnwi chini arirok khna khe tei Kaitor bórokni bwkhano swbai rw kha, hakhe chwng bebakno chokdeualo kiphilwi thángwi sak sakni samungno rom lai phi kha.

¹⁶Aphuruni simi khe ani borok bodol kaisa khe samung tango tei bodol kaisa khe kolonga, phui, chakhla tei aitalrok yago tẃi laiwi tiyar wngjak; tei tẃiphangrok khe bebak Judani uklogo bacha laijak,

¹⁷chokdeual tangnairokno chuba lai-o, samung tangnairok yago babaisa khe tangmani manwi tẃi-o tei babaisa khe chobani da-seng tẃi lai-o.

¹⁸Samung tangnairok seng khaikhlaijak kheno samung khlai lai-o. Hwn ba chobani totro supnai le ani gana’-ono tongo.

¹⁹Ang ojamarokno tẃiphangrokno tei bebak bororokno hai hwnwi sa kha, “Samung khe kotorma tei chwng belai chal laiwi tháng kha tei abo bai chwng kaisa bai tei kaisa hakchal lai kha.

²⁰Norokni tongthaini simi chobani totro khorang khna khe ani thani kuthum phai bai di, chini Kaitor chini bwkhak wngwi choba nang lainai.”

²¹Hakhe, chwng sal brúm brúm bodol kaisa khe phung aichukni simi, horni athukiri pasama jora samung tang lai-o tei bodol khaksa khe da-seng tẃi laiwi mwrwk lai tongo.

²²A jora ang ahai hwnwi bororokno sakhlai rw kha, “Horo mwrwgwi manna tẃi khe phiya salo samung tangwi manna tẃi khe jotono sak sakni selengno tẃi Jerusalemo tong di.”

²³Ang, ani takhukrok, ani bororok, mwrwknairok kebo rírok khuk lai li ya, jotoni da-sengno sakni yakni kak lai li ya.[3]