Read Kok Borok NEHEMIA 5 Bible Online

NEHEMIA 5 - Kok Borok bible

NEHEMIA 5

¹Aboni ulo kwbángma bororok tei bórokni bwrwirok sakni Judai takhukrokni bwskango kebengwi podrepot sa lai kha.

²Baksa hai hwnwi sa-o, “Chini sajwk-sajlarok bai chwng kwbángma se; chwng cháui thangwi tongnani bagwi chámung nango.”

³Tei baksaba hai hwnwi sa-o, “Asarini jora-o chámung mannani bagwi chini hapharrok angur bwlwngrok tei nokrok ma phal bai sinai.”

⁴Teibo aro baksa khe hai hwnwi sa lai-o, “Chwng buini thani rang se yak solok ma nanai, chini haphar, angur bwlwngo habugrani lakai sunani nango,

⁵chini takhuksong hai chwngbo bahan bwthẃi-o thansa, chini bwsa-bẃtẃirok ba bórokni hai hamya da? Hai phano chwng khe chini bwsarokno seleng ma khati rw kha. Chini baksa sajwksongno khe selengjwk se snamwi pái kha, hai phano chini phan kwrwi, tamni hwn ba chini haphar, angur bwlwng bui bai segwi najak bai kha.”

⁶Bórok abo tẃi khe chirik laima khna khe ang belai joli kha,

⁷tei tamo khlainai ma uansuk kha, hakhe bebak ojamarok tei tẃiphangrokno hai hwnwi ma kul kha, “Norokni takhukrokno se kusup lai kha bla.” Aboni bagwi ang borok kwbángma kuthumui sa lainani bagwi ringwi,

⁸bórokno sa kha, chwng mansak chini Judai takhukrokno buini dophani thani seleng khatina bagwi phaljakmano kiphilwi pai lai phinai, norok tabuk norokni takhuksongno chini thani kiphilwi paijak phi thung hwnwi se phal lai-o. Bórok aswk khe siring siring wng kha, kók tháisa phano sanani bwlam man lai li ya.

⁹Hakhe ang hai hwnwi sa kha, “Norok khlaimani abo cha ya, chini kena ari kubun dopharok chwngno thesra khlai man ya tẃi khe Kaitorno kiriui tongthai klai ya de?

¹⁰Teibo ang ani takhukrok, ani selengrok bórokno rang-mai lakai rw-o, omo tẃi rw laimano yakar lai si anw.

¹¹Bórokni aroni namani, bórokni haphar, angur bwlwng, Olib tháiblwngrok, bórokni nok-hukrok tei rang bwsa manna bagwi rang solok rwmarok, mai, angur bwtwi tei thokrok abórokno tini’-no kiphilwi rw di.”

¹²Hakhe bórok, “Chwng abórokno kiphilwi rwnai tei mungsabo bórokni thani nai glak, chwng nwng samani haino khlainai,” hwnwi sa kha. Ang ochairokno ringhor kha, hakhe bórok sama hai samung khlai thung hwnwi swmai tang rw bai kha.

¹³Ang kanwi tongmani rírokno bupraui hai hwnwi sa kha, “Omo hai khe’-no Kaitorbo norokni bisingo swmai narwk yarokno bupranai tei Kaitor norokni nok-huk, norokni tong kwrwi bebak kaisa phano karjak ya tẃi khe tlangnai.” Aro tongnai bebak bororok, “Amen” hwn lai kha tei Subraiyungno lob lai kha. Hakhe bororok swmai tangmani hai khlai lai kha.

¹⁴Ang ha Juda-o naikolphang chongjak phuruni simi Artasarses habugra chámani bisik nwichini simi bisik thamchinwi, ang tei ani takhuksong habugrani bagwi chámungni rang manthaino na li ya.

¹⁵Ani slái swkang tong langnai habugrarok bororokni saka-o poja hilikma boksin kha, bórok rukphaini rang belep lep brwichino karwi chámung tei angur bwtwirokbo na-o. Bórokni selengrok suda bororokno kusubo. Phiya ba ang khe abo hai khlai ya, tamni hwn ba ang Kaitorno kiri-o.

¹⁶Ani phan tong sak chokdeual tangnani bagwi sakthar kha, khoroksani hanobo sek li ya, ani bebak bororok samung tangnani kuthum lai kha.

¹⁷Gana-gini hani chini thani phainairokno karwi ang sal brúm brúm ani songphango khorok 150 Judai tei bórokni tẃiphangrokno chá rw-o.

¹⁸Sal brúm brúm ani bagwi musuk beres masa, mera kaham makdok tei kwbángma tomsarok chánani tiyar khlaijago tei nokha salchini bisingo uáisa kahamma angur bwtwibo rwjago, hai wngwi bo ang habugrarokni chámung manthaino san li ya, tamni hwn ba ang saui mano bororok poja hilikma tẃinani nango.

¹⁹Ano khá kaham bai muitu khlai ja di, o ani Kaitor, ang bebak khlaimani abo o bororokni bagwi se.