Read Kok Borok NEHEMIA 6 Bible Online

NEHEMIA 6 - Kok Borok bible

NEHEMIA 6

¹Aphuru ang duglamo dugarrok thepa bai ya kho phano Sanbalat, Tobia Arabo tongnai Gesem tei bebak chini kena arirok chwng bebak chokdeual tang bai kha tei aro mungsabo karjak kwrwi kha, hwnwi khna khe,

²Sanbalat bai Gesem ano hai hwnwi sa hor kha, “Phai di, chwng Ononi ha-mil kami khungsa-o malai lai anw,” Omo bórok ano hamya khlaina naitima se.

³Ang bórokni thani tẃitun rohorwi hai hwnwi sa hor phi kha, “Ang samung kotor khlai tongma bai ang phaiwi man glak. Tamni ang samungrok yakarwi ba norokni thani phai mannai?”

⁴Bórok abo hai khe máng uái brwi ano sa hor kha tei angbo haino abo tẃi khe máng sa hor kha.

⁵Hakhe Sanbalat uáiba abo hai khe’-no bini selengno rohor kha, bini yago sil bujak ya kóktun kangsa tongo.

⁶Aro omo hai hwnwi swijak, “Dopharokni thani omo hai hwnwi khwna khnaui tong kha tei Gesembo[4]sa kha: Nwng bai bebak Judairok chwngno kebengnani bagwi se chokdeual tang lai-o tei abo hai khe nwng se bórokni habugra chána naiwi tong kha.”

⁷Tei Jerusalem gwnangwi Judaini bisingo khoroksa habugra tongo hwnwi sakhlai rwnani khoroksa diyari chong kha hwnwi bebak dopharok khna bai kha. Gesembo hai hwnwi sa kha, “A kókrokno habugrano sauijaknai, hakhe phai di chwng pal khe sa lai anw.”

⁸Ang kiphilwi hai hwnwi sa hor kha, “Nwng sama hairok mungsa phano khlaijak ya, abórok nwng nini bokhorokni karimani se.”

⁹Samung tangnani yak thak rwui mwthakna hwnwi uansugwi se bórok chwngno sikirina nai-o, tamo khe o Kaitor tabuk ani yakno teibo rak rw ja di.

¹⁰Delaiani bwsajla, Mehetabelni khe busuk, Semaiani nogo ang tháng khe, noksingo dugar kholopjak bo ano hai hwnwi sa kha, “Phai di, chwng Kaitorni nok kwthar bisingo hap laiwi, dugar kholobwi tong lai anw, tamni hwn ba bórok nono butharnani phainai, horni bisingo’-no bórok nono butharna phai lai anw.”

¹¹Tamo khe ang hai hwnwi sa kha, “Ang hai borok ba khár nai de? Thangwi tongnani bagwi nokthar bisingo de huijakna naino? Ang abo hai khlai glak.”

¹²Ang saui man kha Kaitor bono rohor ya, tamo khe Tobia bai Sanbalat bono rang tukmani bai se bo ano o kók sa-o.

¹³Ano sikriui sumsogo khiklaiwi ano mung hamya khe mwkhang sóknani bagwi se bórok bono tuk lai-o.

¹⁴O ani Kaitor, ang suri ja-o, Tobia bai Sanbalat tamo khlai kha muitu khlai di tei diyarijwk Noadia bai tei kubun diyarirok ano sikirina naimano muitu khlai di.

¹⁵Nokha sal bachinwi tang láiwi Elul talni nwichibani salo samung pái súk kha.

¹⁶Chini arirok bai bebak gana-o tongnai dopharok abono khna khe kirijak baiwi ma lon bai kha, Kaitorni chubamani bai se o samung khlaijago hwnwi saui man bai kha.

¹⁷A jora-o Judiani kolok-kotorrok Tobiano kóktun swihor lai-o tei Tobiani kóktunrokbo bórokni aro sók phai-o.

¹⁸Judaini borok kwbángma bini bwkhago tongo, tamni hwn ba bo Arani bwsajla Sekaniani bwchamari. Tei bini bwsajla Jehohanan, Berekiani bwsajla Mesulamni bwsajwk bai káijago.

¹⁹Bororok Tobia aswk samung kaham khlaimano ani bwskango sa lai-o tei ang samani kókroknobo bono thángwi sa lai-o. Hakhe Tobia ano sikirinani bagwi kóktun swihor máng tongo.