Read Kok Borok NEHEMIA 8 Bible Online

NEHEMIA 8 - Kok Borok bible

NEHEMIA 8

¹Israilni bororok sak sakni kamiyungo tong phaimani nokha talsni tal sók phai khe, bebak bororok Twi duglamni lampra-o pal khe kuthum lai kha. Bórok ochai tei swinai Ejrano Israil dophano Subraiyung rwmani Musini kerong bijapno tubu di hwnwi sa lai kha.

²Hakhe ochai Ejra talsni talni puilani salo chwla, bwrwi tei chwrai buchiui mannai bororok kuthum laimani-o kerong bijapno tubu kha.

³Twi duglamni lampra bwkhak rohorwi chwla, bwrwi tei buchiui mannai bororokni bwskango bo a kerongno phungni simi sal dibor jora pori kha, bebak bororok kerong bijapno khunju kaichomwi khna lai kha.

⁴Ejra a samungni bagwi khlaijakmani buphangni háyá-o bacha kha tei bini gana yagra bwkhago: Matithia, Sema, Anaia, Uria, Hilkia tei Maseia bacha kha tei bini yaksi bwkhago: Pedaia, Misael, Malkija, Hasum, Hasbadana, Sakaria tei Mesulam.

⁵Ejra bebak bororokni bwskango bijapno phiyok kha bo buini slái kuchuk kuk háyá-o bachajak, bo a bijapno phiyok khe bebak bororok bacha lai kha.

⁶Ejra, “Subraiyung kwplaisa Kaitorno lob di,” hwnwi sa kha. Hakhe bebak bororok bórokni yak tisa laiwi, “Amen, Amen,” hwnwi hwn lai kha, bórok yáskú sungwi, bokhorok bomwi, ha-o kwpal phnangwi Subraiyungno khulum lai kha.

⁷Bórok aro bachaui tong phuru Lebirok: Jesua, Bani, Serebia, Jamin, Akub, Sabethai, Hodia, Maseia, Kelita, Ajaria, Jojabad, Hanan, Pelaia, bororokno kerongni kókno swbaiwi sa kha.

⁸Bórok Kaitorni kerong bijapno srai-srai khe poriui romwi manna tẃi khe swbaiwi saui khna rw kha.[6]

⁹Bororokno phrwngnai habugra Nehemia, ochai tei swinai Ejra, Lebirok bórokno hai hwnwi sa kha, “Tinini sal le norokni Subraiyung Kaitorni thani kwthar se, I’n Norok khábo ta kham di, ta bo ta kap di.” Bebak bororok kerongni kókno khna khe kap lai kha.

¹⁰Nehemia hai hwnwi sa kha, “Tháng di, chámung kaham chá lai di nung lai di tei khoroksa swkni tiyar kwrwi hwn khe bonobo banta rohor di, tamni hwn ba tinini sal Subraiyungni thani kwthar se tei bwkha dukhu ta wng di, tamni hwn ba Subraiyungo tongthokmani se nini phan.”

¹¹Lebirok bebak bororokno methebwi hai hwnwi sa kha, “Sring, sring wng bai di, tini kwthar sal, bwkha ta kham bai di.”

¹²Hakhe bebak bororok nogo kiphilwi thángwi tongthok khe chá lai kha-nung lai kha tei bórokni tongmano buino bo banta khe rw lai kha, tamni hwn ba bórokni thani poriui khna rwjakmani kókrokno saui man kha.

¹³Teini salo bebak bosongni bokhorokrok, ochairok Lebirok pal khe Ejrani thani kerong pori lainani kuthum lai kha.

¹⁴Bórok kerongo Israilrok nokha talsnini talni panda-o kainok nogo ma tongnai hwnwi Subraiyung Musini yak tẃi dagimani swijak nuk kha.

¹⁵Hakhe bórok bebak kamiyungrogo tei Jerusalemo hai hwnwi sakhlai rw kha, “Kerongo swijak tongma haino hathái-o thángwi kainok tangnani bagwi olib, bolongni Olib, jamuk, khajuri tei kubun bwlái gwnang buphang bedekrok tubu-ui phai bai di.”

¹⁶Hakhe bororok nongkhorwi thángwi buphang bedekrok tubu-ui bórok sak sakni nokni núkhúngo, kainokni nokhlarogo, Kaitorni nokni nokhla-o, Twi Duglamni lampra-o tei Ephraimni duglamni lampra-o tang lai kha.

¹⁷Buini hani bebak kiphil phainai bororok Kainok tang laiwi aro tong lai kha. Nunni bwsajla Jesuani molni simi a sal jora Israilni bororok abo hai uáisa phano panda khlai lai ya kho tei bórok belai tongthok lai kha.

¹⁸Panda chengmani nokha salsnini simi páimani sal jora sal brúm brúm Ejra Kaitorni kerong bijapno pori kha. Bórok nokha salsni panda khlai lai kha tei kerongo swijak tongmani bai nokha salcharni sal páimani panda khlai lai kha.