Read Kok Borok ESTER 3 Bible Online

ESTER 3 - Kok Borok bible

ESTER 3

¹Aboni ulo khe bubagra Ahasuaras, Agagsa[1] Hamedathani bwsla Haman hwnjaknaino bono bini hani tei kubun tẃiphangrokni slái kuchugo achuk rw kha.

²Noyungni duglamo tongnai bebak bubagrani tangphangrok bono yáskú sungwi khorok bomwi bono bórom ma khlai-o, tamni hwn ba bono tẃiwi habugrani omono dagijak. Tamo khe Mordekai khe bini thani yáskúbo sung ya bórombo khlai ya.

³Hakhe habugrani dugayungo tongnai tangphangrok Mordekaino “Nwng tamni bagwi habugrani dagima kókno na ya wng?” hwnwi hwn kha.

⁴Sal brúmno bórok bono sa phano bo abono khna li ya; hakhe bórok o kókno Hamanno sa kha, Mordekaini omo tẃi tongmung ya de yachakjakno hwnwi bórok nainani nai lai kha, tamni hwn ba bo Judai se hwnwi bórokno sama tongo.

⁵Haman nuk kha Mordekai bono khubo khulum ya tei khorokbo bom ya hakhe bo belai kheno jolijak kha.

⁶Bo Mordekaino simi se yak rwna hwnwi chongmani. Ulo khe Mordekai bu bosongni saui man kheno Ahasuarasni ha gwnangwi tongnai bebak Judairokno sokomorna bagwi bwkha chong kha.

⁷Talsani talo, abo wng kha Nisan tal. Ahasuaras habugra chámani bisichinwini jora-o bórok Hamanni bwskango Pur khiklai lai kha, abo khe pat karwi naima se, bórok abono tal mareui’-no khiklai lai kha, talchinwi Adar tal jora khiklai lai kha.

⁸Hakhe Haman bubagra Ahasuarasno hai hwnwi sa kha, “Nini ha gwnangwini angkor brúmno pisa-piring khe nini ha-o lukurokni bisingo bui bai gwdal ya dopha kaisa tongo; bórokni raidarok buini raidarok bai gothok ya; tei bórok bugrani kerongno tẃi ya, nwng bórokni omo hairokno soima le kwbáng hamtha ya.

⁹Bubagra chajak kha hwn khe bórokno sokomorna bagwi dagijak thung, omo hai khlaijak khe ang nini samung tangnairokno rukphaini rang chisai rangkhógo tonna bagwi rwui rw anw.”

¹⁰Hakhe bugra bini yasitemno sokogwi Agagsa Hamedathani bwslano yapharwi rw kha, bo wng kha Judairokni kena ari.

¹¹Bubagra Hamanno hai hwnwi sa kha, “Nini yago rangbo rw kha bororoknobo yapharwi rw kha, nwng kaham hwnwi chong tẃi’-no bórokno khlai si di.”

¹²Ulo tal puilani sal chithamni salo bubagrani swinairokno ringjak kha; a salo Haman dagima hai kheno bubagrani chongjak angkorni tẃiphangrokno tei bebak bubagra kotoirokno tei bebak dophani tẃiphangrokni thani bebak angkorni swithái bai tei bebak dophani kók bai dagimung kóktun swijak kha tei aro bubagra Ahasuarasni mung swijak yasitem bai mari bu-ui rwjak kha.

¹³Kóktunrokno bugrani bebak angkoro kóktun tunnairokni yak tẃi khe rohorjak kha, bebak Judairokno chwrai okra bwrwirokno, kwlwirokno bebaknono sokomornani, ratharnani tei butharna bagwi sajak kha, Adar talni talchinwi talni salchitham salo omo tẃi khlaina bagwi omo tẃi khe dagijak kha.

¹⁴Raida snamwi a dagimungni swijakni kosol khlaiwi a salni bagwi bebakno tiyar tongnani hwnwi angkor thwgwi kóktun kangsa rohorwi saui man rwjak kha.

¹⁵Bubagrani dagimano tẃiwi a dagima auli Susa-obo sajak kha, bubagra bai Haman nung laina bagwi achuk lai kha, tamo khe Susani kamiyungo belaino uanajak bái kha.