Read Kok Borok ESTER 4 Bible Online

ESTER 4 - Kok Borok bible

ESTER 4

¹A kókrokno khna kheno Mordekai bini rírokno chir kha tei rí kichik-kachak kan kha, sago thapla phul kha tei aulini kwcharo thángwi chirigwi swlwgwi kabwi kha;

²bo bubagrani duglamni gana jora tháng kha, tamni hwn ba khoroksa phano rí kichik kanwi bubagrani duglamo habwi man ya.

³Bubagrani dagima tei bini sakhlaima kók sógwi khe a angkorni Judairok belai kheno kap lai kha, mairok chá yaui kap lai kha, chiri-mokorok wng lai kha, bórokni bisingo kwbángma’-no rí kichik kan lai kha tei thapla-o khe goirogwi tong lai kha.

⁴Esterni naikini khlainaijwkrok tei bono mwrwknai gurma a kókno bono sa phai kheno, Isiri belai kheno bwkha-o nangjak kha; bo Mordekaino rí kichik kanmano khibi rwna bagwi kubun rí rwui rohor kha, hai phano bo abórokno yachak li ya.

⁵Ulo khe Ester Hatakno ring kha, bo wng kha bubagrani khoroksa gurma, Esterno naina bagwi chongjak, bo Mordekaini aro thángwi abo tamo bubo tẃi sẃngna bagwi rohor kha.

⁶Aphuru khe Hatak aulini duglamo thángwi Mordekai bai malai kha,

⁷hakhe Mordekai bono bini tamo wng kha bebakno sa bai kha tei Haman Judairokno sokomorna bagwi bubagrani rangkhógo rang rwna hwnmani a rangrokni kókbo bono sa kha.

⁸Mordekai bórokno sokomorna bagwi Susa-o swihorwi dagimano Esterno rw di hwnwi bo kangsa rwui rw kha tei abono swbai sana bagwibo dagina bagwi sa kha, bo bubagrani thani thángwi Mordekaini bagwi koinani tei bini borokni bagwi dagi kha.

⁹Hakhe Hatak Mordekai samani kókno Esterno thángwi saui kha.

¹⁰Tei Mordekaino hai hwnwi kók kwchar kha,

¹¹“Bebak bubagrani tẃiphangrok tei bini angkorni bororok sauimano khoroksa chwla phano wng thung eba bwrwi phano wng thung bubagra bai ringjak yaui bubagrani nok bisingo tháng khe, raida tongo abo khe butharjakna nangmani, phiya habugra bini rangchakni raidang bai yachak sok khele bo thangnai, tamo khe ang nuk kha o nokha sal thamchi-o tabukbo ang bubagra bai ringjak ya kho.”

¹²Mordekaino Ester samani bebak kókno saui khna rwjak kha.

¹³Hakhe Mordekai bórokno Esterno hai hwnwi sa phi di hwnwi sa kha, “Habugrani noyungo tongo hwnwi tei kubun Judairokni bisingo nwng simi yók anw hwnwi ta uansuk di.

¹⁴Tamni hwn ba nwng omo hai jora-o siring siring tong khe tei kubun lama tẃi Judairok yók anw tei mwthangjak anw hwnwi ta kha ka di, hakhe nwng nini nwphani bosong bai baksano komornai. Sabo si nwng omo hai jorani bagwi da Isiri ma chá-múchú kha?”

¹⁵Hakhe Ester Mordekaino hai hwnwi sa di hwnwi sa kha,

¹⁶“Tháng di Susa-o bebak Judai tongnairokno thumwi di tei ani wngwi chá ya-nung ya khe tong lai di, hakhe saltham jora horo phano salo phano tabo ta chá lai di tabo ta nung lai di. Ang tei ani selengjwkrokbo abo hai khe tong lainai. Omo raidano ke phano kebengjak thung aboni ulo khe ang habugrani thani thángnai; ang thwina nang khe ma phano ma thwi thung.”

¹⁷Hakhe Mordekai thángwi Ester bono dagima tẃi’-no bebakno khlai kha.