Read Kok Borok ESTER 5 Bible Online

ESTER 5 - Kok Borok bible

ESTER 5

¹Salthamni salo khe Ester Isirini chummungno chum kha tei bubagrani noyungni khotolo thángwi bachaui kha, abo bubagrani nok kotorni baiching bwkhak. Bubagra khe bini achukthayung nok bisingo hapmani duglam bai naharjak;

²hakhe bubagra Isiri Esterno noksingo bachajak nuk kha, Isiri bubagrani mokolo kaham khe nukjak kha tei bo yago tongma a rangchakni raidango Esterni phaising tisa kha.

³Hakhe Ester swkangwi thángwi bono hai hwnwi sẃng kha, “Tamo Ester? Nwng tamo san? Nwng ani hani khaksa phano san khe ang nono abono rwnai.”

⁴Hakhe Ester hai hwnwi sa kha, “Bugra hamjak kha hwn khe, bugra tei Haman ang tini horo ang chámung panda khlaima-o phai thung.”

⁵Hakhe bubagra hai hwnwi sa kha, “Hamanno dakti’-no tubu-ui phai di chwng Ester naima tẃi’-no khlainai.” Hakhe bubagra tei Haman Ester tiyar khlaima chámung panda-o phai lai kha.

⁶Bórok chuak nung lai te nung lai te bubagra Esterno hai hwnwi sẃng kha. “Nwng tamo nai sa di? Nwng sanma tẃi’-no rwjaknai. Ani hani khaksa san phano ang nono rwnai.”

⁷Ester hai hwnwi sa kha, “Ani sanma tei ani koima wng kha ahai;

⁸bugra ano hamjagwi’-no tong khe, ani koimano bugra rwnano hwn khe, ani sanmano rwna hwn khe, Haman tei bubagra khwna ani thani phainani wng thung, ang chámung panda tiyar khlainai tei khwna bugra samano ang khlainai.”

⁹A salo Haman bwkha tongthokjagwi khatung-khaja khe phataro ongkhor kha, phiya ba aphuru noyungni duglamo Mordekaino nuk kha, bo bono nugwi bacha li ya tei bórombo khlai li ya, aphuru khe Haman Mordekaino belaino jolijak kha.

¹⁰Hai phano Haman thamchi holi rw kha tei sakni nogo kiphilwi bini kiching-kumasongrok bai bini bihik Jeresno ringhorwi tubu kha.

¹¹Tei Haman bórokni thani bini rang-rí chẃngsachani tei bwsa kwbángmani kók tei bugra bahai khe bono samungo kotor rw kha tei bubo hai khe bono samungni tẃiphang bai bugrani bebak selengrokni slái kaham kuk achukthai rw kha, abórok bebak bórokno saui khna rw kha.

¹²Haman teibo kók manju-ui hai hwnwi sa kha, “Isiri Ester bini chá kotor panda-o bugrani logi-o tei khoroksano phano tlang ya, ano simino tlango. Khnabo ang bugrani logi-o bini aro thángnani bagwi kwchárjak u kha.

¹³Phiya ba bugrani duglamo achugwi tongnai Judai Mordekaino nuk sak jora tẃi ani bebakni mungsa-o phano bwkha kochomma tong glak.”

¹⁴Aphuru bini bihik Jeres bai tei bebak bini kichingsong bono hai hwnwi sa kha, “Nwng muk-chiba kuchuk kaisa kotoksorphang snam rw di; tei Mordekaino aro kotok sorwnani bagwi khwna phung-aini bisingo’-no bugrani thani sa di, aboni ulo panda kotoro tháng di.” Aphuru Haman a kókbitino chajak kha tei a kotoksorphangno snam rw kha.