Read Kok Borok ESTER 6 Bible Online

ESTER 6 - Kok Borok bible

ESTER 6

¹A horo habugra muktrwi thángjak li ya, bo bini hani láibuma bijapno tubuna dagi kha tei abono bono poriui khna rwjak kha.

²Abono pori kheno nuk kha, bahai khe habugrani duglam mwrwknai khoroknwi Bigthan bai Teres bubagrano butharna chap lai phuru Mordekai habugra Ahasuarasno o kókno tun phaimani.

³Habugra, “bubo tẃi tamo khe aboni bagwi Mordekaino bórom rwjak kha eba tei kisa samung kuchugo tisaui rwjak kha?” hwnwi sẃng kha. Hakhe habugrano monnairok hai hwnwi sa kha, “bini bagwi mungsa phano khlaijakma kwrwi kho.”

⁴“Noyungo ani khoroksa swk tangphangrok da tong?” hwnwi habugra sẃng kha. Aphuru Hamanbo nokhla-o hapdrop; bo Mordekaino kotok soro rwui butharnani bagwi kotoksorphang snamwi tongmani kókno sana hwnwi phaimani.

⁵Hakhe habugrani tẃiphangrok “Haman nwng bai malaina bagwi phataro naisingwi tongo” hwnwi sa kha. Hakhe habugra “Bono bisingo phai di hwn di” hwnwi sa kha.

⁶Hakhe Haman bisingo hap phai kha tei habugra bono hai hwnwi sa kha, “Borok khoroksano ang belai khe bórom rwna muchungo. Ang a borokno bubotẃi tamo khlainai sa di?” Aphuru khe Haman, “Ano karwi habugra sabono aswk bórom rwnai” hwnwi uansuk kha.

⁷Aboni bagwi Haman habugrano hai hwnwi sa kha, “Habugra bórom rwna muchungma

⁸a borokni bagwi habugrani chummung tubujak thung tei bubagrani motok thupjak a koraibo tubujak thung;

⁹abono khoroksa habugrani tẃiphangni yago rwjakna wng thung tei habugra bórom rwna hwnwi chongmani a borokno abono kan rwui chum rwui a korai-o kasa rwui aulini lampra-o tlangwi bini bwskang bwskang khe ‘Habugra bai bórom rwna naijaknairok omo hai khlaijaknai’ hwnwi sakhlai thung.”

¹⁰Hakhe habugra Hamanno hai hwnwi dagi kha, “Do di, rírok tei korai nahar di tei a Judai Mordekaino abo hai khe bórom rw di. Nwng bono noyungni hapma duglamo nugwi anw.”

¹¹Hakhe Haman rí-chum tei korai tubu-ui phai kha. Mordekai korai saka-o kasa kha tei Haman bono kamiyungni lahar kotor kotor tẃi khe tlang kha, bórok tháng lai tw tẃi lukurokni thani hai hwnwi sa klai kha, “Nai di habugra bórom khlaina hwnma borokno bahai khe bórom rw?”

¹²Hakhe Mordekai habugrani duglamo kiphil kha, yang Haman khe doui kap twtwi tei mwkhang kholobwi nogo tháng kha.

¹³Hamanni bihik Jeresno tei bini bikichingsongno bini tamo tamo wng kha abono saui khna rw kha. Hakhe bini siyan gwnang bororok tei bini bihik bono “Tumung nono a khiklaigranai Mordekai Judai hwn khe nwng bono pái glak, nwng me se mechenjaknai.”

¹⁴Bórok bo bai kók sa lai se tong kho, aphuru’-no habugrani gurma khoroksa phaiwi Hamanno Ester tiyar khlaima chámung panda-o, tlangwi tháng kha.