Read Kok Borok ESTER 7 Bible Online

ESTER 7 - Kok Borok bible

ESTER 7

¹Omo hai kheno habugra tei Haman Isiri Esterni chámung panda-o tei uáisa thángo.

²Aphuru bórok chuak nung lai tong phuru khe habugra haino hai sa kha, “Isiri Ester, nwng tamo nai? Abono nono rwjaknai. Nwng tamono san? Ani hani khaksano phano wng thung ang nono abono rwnai.”

³Hakhe Isiri Ester hai hwnwi sa kha, “Ang nini mokolo chajak kha hwn khe tei tumungno bugra lon khe, ang tei ani langmano mwthang ja di hwnwi ang koija-o,

⁴tamni hwnma le sokomor rwjakna bagwi eba butharwi sokomorwi pái rw suknani bagwi se ani dopharokno phalwi rwjak kha. Tumung chwngno seleng selengjwk simi khlaiwi tonna bagwi simi wngma te ang siring siring khe tong kha mun tei omo tẃi birmanni kókno bubagranobo ma sa glak kha mun.”

⁵Aphuru khe habugra Ahasuaras Isiri Esterno hai hwnwi sa kha, “A borok sabo? Bo buroni? Omo hai aswk sabo khlai rak kha de?”

⁶Hakhe Ester hai hwnwi sa kha, “A kena arisa hwn khe o borok hamya Haman se”

⁷Aphuru khe Haman habugra tei Isirini bwskango belaino kirijak kha. Bugra jolijagwi chuak khuri beraui bacha kha tei nokni ongkhorwi noyungni khumulwngo tháng kha. Haman habugra bono tamo khlainai khlai ya chongwi pái kha hwnwi saui manwi bo nok bisingo tongrwgwi Isiri Esterni thani bini langmano mwthang ja di hwnwi koina bagwi tong rwk kha

⁸Habugra noyungni khumulwngni a chá laithani kiphilwi phai phi khe Isiri Ester maicha-o swndarwi achugwi tong thani Hamanno klaijak khe nuk phai kheno, habugra khorang kotor khe “O borok da ani Isirini bumkhang sóknai?” hwnwi sa kha. Habugra khúk thak ya sini’-no gurmarok phaiwi Hamanni bumkhang thuklubwi rw phai kha.

⁹Aphuru khe Harbona hwnjaknai habugrano monnaisa hai hwnwi sa kha, “Hamanni nokskango mukbachi kuchuk khe kotok soro rwna bagwi kotor sorphang snamjak tongo. Habugrano mwthangna bagwi kók tun phainai Mordekaini banta se Haman abono snamo.”

¹⁰“Bono aro’-no kotok sor rw di,” hwnwi habugra sa kha. Hakhe Mordekaino kotok soro rwui butharna hwnwi snammani arono Hamanno kotok soro rw kha. Aphuru khe habugrani thamchi holi kha.