Read Kok Borok ESTER 8 Bible Online

ESTER 8 - Kok Borok bible

ESTER 8

¹A salo bugra Ahasuaras Isiri Esterno Judairokni kena ari Hamanni nok-hukno rwui rw kha. Tei Mordekai habugrani bwskango phai kha, tamni hwn ba Ester bo bini tamo klai abono sa kha;

²tei bugra Hamanni aroni yasitem khulogwi na phimano bo Mordekaino rwui rw kha. Tei Ester Mordekaino Hamanni nokno yaphar kha.

³Ester kap twtwi ahaino ahai habugrano sa phi kha; Agagsa Haman Judairokni bagwi hamya chapmarokno mwthakna bagwi habugrano koi kha.

⁴Aphuru khe habugra Esterni phaising rangchakni raidang chak kha tei bachaui habugrani bwskango bacha kha.

⁵“Bugra nwng bwkha phurjak khe tei nwng ano naiwi tong khe tei nwng chajak khe, Hamedathani bwslano Judairokno sokomorna bagwi Haman dagimung sakhlaimani a dagimung swijakno kasuna khlai ja di.

⁶Omo hai digi-sigi ani bororokni saka-o wng khe tei ani jaiti-masarok butharjakmano bahai khe nugwi tongwi mannai?”

⁷Hakhe bugra Ahasuaras Isiri Ester tei Judaisa Mordekaino hai hwnwi sa kha, “Nai di, ang Hamanni nokno Esterno rw kha tei bororok bono kotok soro rwui buthar kha.

⁸Tamo khe kasujak ya tẃi khe habugrani wngwi Judairokni bagwi nini muchungma tẃi khe swiwi bugrani yasitemni mari rwui rw di; tamni hwn khe habugrani mungwi dagimung swiwi yasitemni mari rwui rw di.”

⁹A jorani nokha taltham talo, abo khe Siban talni sal nwichitham salo habugrani swinairok ringjak kha. Mordekai dagi tẃi khe ha Barotni simi Ithiopia jora angkor kaisara nwichisnini Judairokno, angkorni tẃiphang tei tangphang okrarokni thani kóktun swihorjak kha. Aro angkor thwgwini swithái tei bosongni kóktháirok bai tei Judai kók tei swithái bai khe swijak kha.

¹⁰Bo Ahasuarasni mungwi kóktunrokno swiwi habugrani yasitem bai khe habugrani mungswi sil bu kha tei habugrani khabrumwi man kuknai korai bai khe tẃitunrokni bising tẃi abono tun rw hor kha.

¹¹Habugra o kóktun bai khe Adar talni abo khe tal nwichinwi talni sal chitham salo Ahasuarasni hani auli thwgwini Judairokno thansa khe kuthum laiwi sakno mwthangwi manna tẃi khe lama khlai rw kha.

¹²Kaisa swk dopharok eba bosongrok Judairokno tei bórokni bwrwi-chwrairokno choprok phai khe bórokbo uphilsaui swpragwi bórokno sokomornani kerong eba katswi pái rw súgwi khibinani bagwi, eba kebengnai arirokni manwi-khwnwirokno sekpronani kerongno bórokni yapha-o rwjak kha.

¹³Habugrani dagimungrok bebak angkor thwgwi tei dopha thwgwi Judairok a salo bórokni kebengnai arirokno yagul su phinani bagwi tiyar tongna bagwi hus khlaiwi sa khlaiwi rwjak kha.

¹⁴Habugrani korairogo kasaui tẃitunrok dodro-dodro habugra dagimano tlangwi ongkhorwi tháng lai kha.

¹⁵Susani nok kuchuk-kwragobo abono sajak kha. Mordekai habugrani somkhrang tei kuphur kanmung-chummung kanwi chumwi kaisa rangchakni kotorma motok thupjak khe habugrani bwskangni ongkhorwi phai kha. Auli Susani lukurok tongthogwi chirik lai kha.

¹⁶Judairok pohor, bórom tei tongthothok jorano man kha.

¹⁷Amchoi thwgwi habugrani dagimungno sakhlaijak khe aroni Judairok tongthogwi ter khlai lai kha. Kubun dophani bororokbo Judai wngwi tháng kha, tamni hwn ba bórok Judairokno kirijak kha.