Read Kok Borok ESTER 9 Bible Online

ESTER 9 - Kok Borok bible

ESTER 9

¹Adar talni sal chithamni sal sók phai kheno, bugrani sakhlaimungni a salo nangnani sal, Judaini kena arirok bórokno bórokni yago chopna khatung lai tong lai-o. Tamo khe Judairok se bórokno mechen si-o.

²Ahasuarasni ha-o tongnai bebak kamiyungni Judai borok kuthumui chap lai kha, bórokno hamya khlaina nainairokno bórok swprak lai kha. Bororok bórokno bebago’-no kiri lai tong kha tei khoroksa phano bórokni bwskango bachaui mannai kwrwi kha.

³Bebak amchoini bokhorokrok, gobornorrok, tangphangrok tei bugrani bororok Mordekaino kirima bagwi bórokno se chuba si-o.

⁴Mordekai noyungni suar gwnang borok wngsaui phai khe; tei ha angkor gwnangwi bini bumung sinijak kha tei bini phan bai suar báng sa kha.

⁵Judairok aphuru khe bórokno naislernai kena arirokno bórok naima tẃi’-no khlai lai kha. Hakhe bórok bórokni kena arirokno butharwi katswi pái rw súgwi khibina cheng lai kha.

⁶Kamiyung Susa-o simi se Judairok borok khorok 500 buthar kha.

⁷Bórok Judairokni kebengnai ari Hammadatsa Hamanni bwslasong khorokchino buthar kha. Bórokni mungrok khe; Aspatha

⁸tei Poratha tei Adalia tei

⁹Aridatha tei Parmasta tei Arisai,

¹⁰tei Aridai tei Baijathasong; tamo khe Judairok bórok bórokni manwirokno le yak rw li ya.

¹¹A salo Susa-o khorok bwswk borok butharjak kha abono habugrano sajak kha.

¹²Aphuru khe bo Isiri Esterno hai hwnwi sa kha, “Susani nok-kwrago Judairok Hamanni bwsla khorokchino tei bini khorok 500 bororokno buthar kha tei kubun nok kwrakrogoba tamo khlai kha abo si ya. Tabuk nwng tei tamo nai? Tamo khlai di hwn, abono khlaijaknai.”

¹³Hakhe Ester hai hwnwi sa kha, “Nwng chajak kha hwn khe, tini Judairok khlaima hai Susa-o khwna tei salsa khlaina rwjak thung; Hamanni bwsla khorokchini mangno kotok soro rwjak thung.”

¹⁴Hakhe habugra abo hai’-no khlaina bagwi dagiui rw kha tei Susa-o kók sakhlai rwjak kha. Bororokni nukphlango Hamanni bwsarok khorokchino kotok soro rw kha.

¹⁵Adar talni Nokha sal chibrwini salo Judairok Susa-o kuthum lai kha tei borok khorok 300-no buthar phi kha, tamo khe bórok mungsa manwirogo yak rw lai li ya.

¹⁶Abono karwi habugrani tei kubun amchoirogo Judairok bórokni kena arirokni yakni yóknani tei sakni langmano mwthangna bagwi kwrẃngsa khe kuthum lai kha. Bórok bórokni kena ari khorok snichibasaino buthar lai kha, tamo khe bórok manwirogo yak rw li ya.

¹⁷Adar talni sal chithamni salo abo pati-o tei sal chibrwi-o khe bórok lengla lai kha, a salo bórok tongthokni chámung panda khlai lai kha.

¹⁸Tamo khe Susani Judairok khe sal chitham tei sal chibrwini salo pal khe kuthum lai kha tei sal chibani salo khe bórok lengla lai kha tei a salo tongthothok khe chámungni ter khlai lai kha.

¹⁹Aboni bagwi kami-o tongnai Judairok, abo khe; chokdeual kwrwi-o tongnairok khe Adar talni sal chibrwini salo chá lai nung lai khlaiwi tongthokni ter khlai lai-o tei khoroksa tei khoroksano chámung rohorjaknai sal hwnwi khlai lai-o.

²⁰Mordekai o wngmarok bebakno swiwi narwk bái kha tei habugra Ahasuarasni ha gwnangwi, hakchal-sampha-o tongnai bebak Judairokni thani kóktun swi hor kha.

²¹Bo bórokno Adar talni sal chibrwi tei sal chibano bisi brúmno ter khlaina bagwi dagiui sa kha.

²²Tamni hwn ba a salnwi-o Judairok bórokni kebengnai kena arirokni yakni yógo tei a talo bórokni dukhu tei bwkha khammani sláijagwi terni sal wngwi thángo. A salrogo chámung tei tongthokni ter khlainani tei chámung rohor lainani tei bigrarokno hili rwjaknai sal hwnwi khlaina bagwi daui swi kha.

²³Aboni bagwi Judairok chengsagrama hai khe tei Mordekai bórokno swihorma hai khe khlaina bagwi bórok lon lai kha.

²⁴Abo khe; bebak Judairokni kena ari Agagsa Hamedathani bwsla Haman Judairokno sokomorna bagwi, katswi sokomorwi khibina lama snamna bagwi se o Pur eba pat ka rwjago.

²⁵Tamo khe Hamanni o hamya chapmani kókno habugra khna khe bo Haman Judairokno kebengwi chapmung chapmano bini saka’-ono klai rwna bagwi tei bwsarokno kotok sorphango kotok soro rwna bagwi dagimung swi kha.

²⁶Aboni bagwi o “Pur” kóktháini bagwi se o salrokno “Purim” hwnjago.

²⁷A kóktunno swijak tongma tẃi’-no bórokni bebakno wng kha, aboni bagwi Judairok raida kaisa khlaina chap lai kha; abo wng kha: bórok tei bórokni ulni bosongrok tei Judai wngwi thángnairok bebakno a kóktunno dagijakma hai bisi brúm brúm a salno terni sal hwnwi ma se ma khlainai.

²⁸Ha angkor, auli tei núkhung thwgwi kusung kusung a salno muitu khlaiwi ter ma khlainai. Hakhe Judairokni bisingo Purimni a salnwi salno khlaina páiwi pái glak tei bórokni kusung kusung bosongni aroni bwkhani hu-ui páijak glak.

²⁹Hakhe Abihailni bwsajwk Isiri Ester tei Judaisa Mordekai o raidano ton phlai súkna bagwi tei kangsa kwrak khe dagima khe swi kha.

³⁰Ahasuarasni hani kai 127 angkoro Judairokni thani Mordekai tong kwchang tei katimung kók swijak a kóktunno tun rw hor kha.

³¹Sakni bororokni bagwi ubas tongmani tei kapnani sal chong tẃi khe Isiri Ester tei Mordekai dagi tẃi sói jora-o Purimni a salnwi salno khlai manna bagwi a kóktunrokno rohorjak kha.

³²Ester dagima bai Purimni a raidarokno chongjak kha tei swiwi narwkjak kha.