Read Kok Borok LAM RWMA 1 Bible Online

LAM RWMA 1 - Kok Borok bible

LAM RWMA 1

¹Omorokno Jakobni bwsarok; bórokno bo bai baksa ha Ijibo thángnai núkhungrok;

²Ruben, Simion, Lebi tei Juda,

³Isakar, Jebulun tei Benjamin,

⁴Dan, Naptali, Gad tei Aser.

⁵Jakobni bwsarok bebagwi khoroksnichi[1] ká-o. Bwsla Josep swkang’-no Ijibo sógwijak.

⁶Hakhe Josep tei bini bebak takhukrokbo thwi bai kha tei bosongrokbo thwi bai kha.

⁷Israilni bosongrok doui er lai kha tei phan gwnang wngwi hamchaui ragwi bacha kha; hakhe a ha-o bórok máng kupulung wng kha.

⁸Tabuk Josepno sini ya borok khoroksa ha Ijipni bugra chá kha.

⁹Tei bini bororokno hai hwnwi sa kha, “Nai di, Israilsarok chini slái belaino kwbáng, nang lai khe chini kebengnai arirok bai kwtha laiwi chwng bai choba khlainai tei chini hani yógwi thángnai.

¹⁰Chwng bórokno siyan khe ma tẃi lainai, bórokno er ya khlai tonna nangnai, erwi teibo báng khe chobarok nang lai khe chini arirok bai kwtha laiwi chwng bai choba khlainai tei chini hani yógwi thángnai.”[2]

¹¹Abo bai’-no samung tang rwnairok bórokno samung kwrak kwrak khlai rwui sátok kha tei bórokni yak tẃi khe Pharaoni bagwi manwi rúngjaknai kamiyung kainwi Pithon bai Ramaseno tisa kha.

¹²Tamo khe bórok, bórokno sukhrup rw rwk wng kha, yang khe bórok teibo se er rw rwgo tei yang yang pírjak rw rwgo.

¹³Ijipni bororok bórokno kirijak lai kha. Hakhe bórok teibo khairok yaui Israilsarokno samung tang rw kha.

¹⁴Samung kwrak kwrak tang rwui bórokno tong kesebo khe ton kha, holong, ha kwrak bokhok rw kha bórokni haba-o mula tang rw kha. Bebak samungo’-no kisabo khairok yaui tang rw kha.

¹⁵Ijipni habugra Hibru lomojwk-kumajwk khoroknwi Sipra tei Puano hai hwnwi sa kha,

¹⁶“Norok Hibru bwrwirokno bá rw khe nai di tei abo bwsa chwla hwn khe achai kheno báma nogo’-no butharwi pái di tei bwrwi achai khe le narwk di.”

¹⁷Tamo khe lomojwk-kumajwkrok Kaitorno kirijagwi Ijipni habugra dagima hai khlai li ya, chwla bwsarokno kwthang narwk kha.

¹⁸Hakhe Ijipni habugra a lomojwk-kumajwkrokno ringwi hai hwnwi sa kha, “Tamo norok omo hai ma khlai lang tamo chwla bwsarokno kwthang narwk lai lang?”

¹⁹A lomojwk-kumajwkrok Pharaono hai hwnwi sa kha, “Hibru bwrwirok Ijipni bwrwirok hai ya bórok kwrak gwja, lomojwk-kumajwkrok sógwi ya sini’-no bórok báui pái-o.”

²⁰Kaitor a lomojwk-kumajwkrokni saka yak tonjak. Hakhe bororok er kha tei teibo kwrak khe bacha kha.

²¹A lomojwk-kumajwkrok Kaitorno kirimani bai Kaitor bórokno sakni núkhung rw kha.

²²Hakhe Pharao bini bebak bororokno hai hwnwi dagi kha, “Hibrurokni núkhung mathenino chwla bwsa achai kheno norok Nil twima-o khiklaiwi rw di, tamo khe bwrwi bwsa achai khe le kwthang narwgwi ton di.”