Read Kok Borok LAM RWMA 10 Bible Online

LAM RWMA 10 - Kok Borok bible

LAM RWMA 10

¹Hakhe Subraiyung Musino hai hwnwi sa kha, “Pharaoni thani tháng di, ‘Ang bórokni thani kwmamsingcha samung khlai phunukna bagwi se bini bwkhano tei bini bororokni bwkhano rak rw kha.’

²Ano Subraiyung hwnwi norok saui manna bagwi norokni nwsarokno tei nusuksongno ang bahai khe Ijipsarokno thung kha tei kwmamsingcha samungrok khlai kha, saui khna rw thung hwnwi se omorok khlai-o.”

³Musi bai Aron Pharaoni thani thángwi hai hwnwi saui lai kha, “Hibrurokni Subraiyung Kaitor hai hwnwi sa-o, ‘Nwng tei bwswk ani thani bom yaui tong sinai? Ano surina bagwi ani bororokno yakarwi rwi rohor si di.

⁴Tumungno nwng ani bororokno thángnani rw ya hwn khe nai di, ang khwnano nini ha saka-o kúkthorano tubunai.

⁵Abórok ha nukjak ya khe, ha gwnangwi’-no kobolnai kothorni yagulo tong rwkmarokno bórok cháui páinai tei hapharo wngma bebak norokni buphangrokno cháui páinai.

⁶Tei norokni noksing kupulung khe hap phainai norokni selengrokni nogo kupulung wngnai tei Ijipni bebak bororokni nogo kupulung wngnai; nwphasong eba nuchusong abo hai uáisabo achai phuruni simi tabukbo nuk ya kho.’ ” Hakhe bo uphilwi Pharaoni aroni tháng kha.

⁷Pharaoni selengrok bono hai hwnwi sẃng kha, “O borok tei bwswk chini bagwi busu hai wngwi tongnai? Bororokno bórokni Subraiyung Kaitorno surina bagwi rwi rohor si di; ha Ijip Komorwi tongmani nwng tamo saui man ya da?”

⁸Hakhe Musi bai Aronno Pharaoni thani tubu lai kha; Pharao bórokno hai hwnwi sa kha, “Tháng di norokni Subraiyung Kaitorno suriui di; tamo khe sabo sabo tháng lainai?”

⁹Musi hai hwnwi sa kha, “Chwng chini okra chwrai bebakno tháng lainai tei mal matarok bebak tlangwi thángnai. Chwng Subraiyungni panda manjakna nangnai.”

¹⁰Tei bo bórokno hai hwnwi sa kha, “Subraiyungni mungwi sa-o, ang norokni bwrwirok bai chwrairokno le norok bai baksa rwi rohor ya. Omo hai khe ba norok mungsa swk ani bagwi hamya se chapma klai bla?

¹¹Tei norok chwlarok simi thángwi Subraiyungno suri lai di, norokbo haino nai lai di ta.” Ulo khe bórok Pharaoni aroni rwi rohorjak kha.

¹²Aphuru khe Subraiyung Musino hai hwnwi sa kha, “Ijip ha gwnangwi, kúkthora phaiwi, kothor klai rwi klangma bebak mai khul jabrarok buphangrok chá phaina bagwi nwng nini yakno pholok di.”

¹³Hakhe Musi ha Ijip phaising bini raidangno pholok kha, hakhe Subraiyung hor sal a ha saka-o salkabaini nokbar sipcha rw kha; hai khe salkabaini nokbar kúkthora tubu-ui phai kha.

¹⁴Ijip ha gwnangwi kúkthora phaiwi sók phai kha tei Ijipni ha gwnangwi’-no tong phai kha, abo hai kúkthora bodol uáisabo aro sók phai ya kho, sobo sók phai glak.

¹⁵Bórok ha gwnangwi’-no kobol kha. Ha se ma mwnak si-o tei ha gwnangwini jabra-bobra, buphang uáphang tei kothor bwtháirok karwi klangmano bebakno cháui pái kha, kwkhrang hwn khe mungsa se kwrwi kha, Ijip hani tamo sam tamo hapharni buphangrok mungsabo kwrwi kha.

¹⁶Hakhe Pharao Musi bai Aronno doui ring rw horwi hai hwnwi sa kha, “Ang norokni Subraiyung Kaitorni thani tei nini thani sumsok khlai kha.

¹⁷Abo bai’-no ano tabuk uáisa ani sumsok nakar ja di, ang nono koi ja-o tei nini Subraiyung Kaitorno, ani oroni o butharnaino rosaui tlang ja di hwnwi koi ja di.”

¹⁸Musi Pharaoni aroni nongkhorwi thángwi Subraiyungni thani koiwi suri kha.

¹⁹Hakhe Subraiyung salthángbaini belai khe nokbar sipcha rw kha, abo kúkthorarokno rosaui twijlang kwchago tlangwi tháng kha; kúkthora masa phano ha Ijibo tong rwk li ya.

²⁰Tamo khe Pharaoni bwkhano rak rw kha tei Israil bororokno thángna rw li ya.

²¹Aphuru khe Subraiyung Musino hai hwnwi sa kha, “Ijip ha gwnangwi mwnak rwna bagwi nini yakno nokha phaising pholok di.”

²²Hakhe Musi bini yakno nokha phaising pholok kha, saltham jora ha Ijip gwnangwi belai khe mwnagwi tong kha.

²³Bórok khoroksa bai tei khoroksa nuk lai li ya, khoroksa phano sak sakni tongthaini saltham jora kutul lai li ya, tamo khe Israil ha gwnangwini bororok bórokni tongthai-o chati mwchẃng laiwi tong lai kha.

²⁴Aphuru khe Pharao Musino ringwi hai hwnwi sa kha, “Tháng di Subraiyungno suriui di; norokni bwrwi bwsa tei chwrairokbo norok bai baksa tháng si thung; tamo khe norokni mal-matarok, pun tokrok simi klangwi tháng si di.”

²⁵Tamo khe Musi hai hwnwi sa kha, “Nwng chwngno ratharwi chini Subraiyung Kaitorno yapharma tei sógwi yapharmanobo ma khlai rwnai.

²⁶Chini mal-mata, pun tokrokbo chwng bai baksano ma tlangwi thángnai; mal-mata masa phano chwng karwi klangwi man ya, tamni hwn ba chwng abórokno tlangwi’-no chini Subraiyung Kaitorno ma khulumuinai, tamo bai khe Subraiyungno ma surinai aro sógwi ya sak saui man ya kho.”

²⁷Tamo khe Subraiyung Pharaoni bwkhano rak rw kha tei bórokno thángna rw li ya.

²⁸Hakhe Pharao bono hai hwnwi sa kha, “Ani oroni tháng di, nwng hus wng di tei ang bai tei ta malai phai di wng ya khe nwng ma thwinai.”

²⁹Musi hai hwnwi sa kha, “Nwng samani tẃi’-no wng si thung, ang nwng bai tei malai li ya.”