Read Kok Borok LAM RWMA 12 Bible Online

LAM RWMA 12 - Kok Borok bible

LAM RWMA 12

¹Ha Ijibo Subraiyung Musi bai Aronno hai hwnwi sa kha,

²“O talrok nini bagwi chengmani tal wngnai, o tal nini bagwi bisini tal yaphang wngnai.

³Bebak Israilrokno sa di, o talni salchini salo khe bebak núkhung thwgwino bórokni núkhungni borok bángmano naiwi mera bwsa masa na thung;

⁴tumungno kaisa núkhung belai kisa wngma bai mera bwsa masa cháui pái man ya wng khe a borok bini nok samni tei kaisa núkhungni bororok bai borok thwgwi banta khe naui cháui pái manna tẃi khe na di. Khoroksa khoroksa cháui manma tẃi’-no mera bwsano thwgwi ma nanai.

⁵Nini mera mungsa khait kwrwi wngna nangnai tei bisi kaisa umorni wngna nangnai; nwng abo mera bodolni eba pun bodolni naui mano;

⁶norok abono o talni sal chibrwi sal jora ma tonnai, aphuru khe Israilni bodolni bebak bororok sanja-o khe mera bwsano ma rathar lainai.

⁷Hakhe bórok kisa thẃi naui duglamni babainwi thongla-o tei duglamni bokhorogo phulwi ma rw lainai tei a nogo’-no muihanrok ma chá lainai.

⁸A horono a muihanrokno ma hang lainai tei sam kwkha bai khe bului auang bángla bai khe ma chá lainai.

⁹Abórokno kwthwng khe eba rugwibo ta chá di, tamo khe abono hóro hang di, bokhorok tei yathekrokno tei bubuk-bwkharokno hóro hang di.

¹⁰Norok phung aimani jora abono mungsabo ta narwk di; mungsa swk karjagwi tong khe sógwi khibi di.

¹¹Norok abono omo tẃi kheno chá di: Norok kamchwlwi lolang chumwi chango rísa khaui, yakungo yaklap ma kánai, yago raidang tẃijak khe; norok abono doui ma chánai. Omo Subraiyungni phiyókma salni panda.

¹²Tamni hwn khe ang a horo ha Ijip saka tẃi lái thángnai tei ang ha Ijipni bebak borok tei mal-matarokni sakrarokno butharnai tei ha Ijipni bebak mwtairokno buj thumnai tei majra rwnai; ang’-no Subraiyung.

¹³Ha Ijipni borokno buthar phuru norok tongmani nokni a thẃirok khe norokni bagwi mari wngnai; ang thẃino nuk khe norokno láiwi thángnai tei ang ha Ijipno swprak phuru mungsa deramungrok norokni thani phai glak.

¹⁴“O sal norokni bagwi muituni sal wngnai tei norok o salno Subraiyungni mungwi ter khlai di; norokni bosong mareui kusung kusungno omo norokni bagwi kerong wngnai.”

¹⁵“Norok salsni auang bángla ma chánai; puilani salo norokni nokni chuanrok ma khibinai; tamni hwn ba khoroksa swk chuan buljak auangno puilani salni simi salsnini sal jora chá khe bo Israil bodolni khagwi rwjaknai.

¹⁶Puilani salo norok kwthar kuthum laimung kuthum lai di; tei salsni salo khe kwthar kuthum laimungni sal; a salrogo samungrok tangwi man glak; nwng chána bagwi sóngmarokno simi se khlai mannai.

¹⁷Norok auang bángla chámung ter ma khlainai, tamni hwn ba ang a salo’-no Israil bodolno ha Ijipni phiyógwi tubu-o: Aboni bagwi mol brúm brúmno norokni bosong mareui a salno muitu ma khlainai.

¹⁸Puilani talni sal chibrwini salni sanja-o khe norok auang bángla ma chá lainai, a talni sal nwichisani sanja jora ma chá lainai.

¹⁹Salsni jora norokni nokrogo auano buljaknai tonwi man glak; khoroksa swk phano auano buljaknai bai buljak auang chá khe a borok Israil bodolni khagwi rwjaknai. Bo hani borok phano eba phatarni borok phano wng thung yók glak.

²⁰Norok mungsa phano buljak manwi cháui man glak. Norokni bebak núkhungo’-no auang bángla se ma chá lainai.”

²¹Hakhe Musi Israilni okrarokno ringwi hai hwnwi sa kha, “Norok sak sakni núkhungni bororokno naiwi mera bwsa saiwi na di tei yókma salni mera bwsa rathar di.

²²Hisop jabra chopsa naui thẃi tonma a dangai-o abono chomsa di, hakhe a dangaini thẃino duglam sakani thongo phulwi rw di tei yang yangni kainwi duglamni thongla’-obo phulwi rw di, phiya sak sak norok khoroksa phano phataro ongkhorwi man glak.

²³Subraiyung Ijipsarokno butharna bagwi ha Ijip tẃi lái thángnai; duglam saka-o tei duglamni kainwi thongla-o thẃi nuk khe Subraiyung a duglamno haino lái thángnai tei butharnaino norokni nogo hapna rw glak.

²⁴Nwng o samungno dagimung hwnwi ma tẃinai tei nini nwsarokbo mol brúm brúmno ma tẃinai.

²⁵Subraiyung norokno rwna hwnwi swmai tangma tẃi’-no a ha-o nwng sók phai phuru khe nwng o samungno ma tẃinai.

²⁶Norokni bwsarok norokno ‘O samung tamoni bagwi?’ hwnwi sẃng khe,

²⁷norok hai hwnwi ma sanai, “Omo wng kha Subraiyungni, yókmani rathar mung, tamni hwn khe Subraiyung, ha Ijip tẃi lái tháng phuru Israilrokni nokno haino lái tháng kha; ‘Bo Ijiprokno khe buthar kha, Chwngno khe haino karwi klang kha.’ ” Israilrok bórokni khorok bomwi khulum lai kha.

²⁸Hakhe Israil bororok thángwi haino khlai lai kha; Subraiyung Musi bai Aronno dagima tẃi’-no bórok khlai kha.

²⁹Hor kuthugo kheno Subraiyung ha Ijipni bebak chwla bwsa sakrano buthar kha. Achukthayungo achukjak Pharaoni simi chengwi, romwi tubu-ui alongo chopjagwi tongnaini bwslabo thwi kha tei mal-mataroknibo swkang sakrarok butharjak bai kha.

³⁰Pharao hor kuthugono bacha kha, bini selengrokbo tei bebak Ijipsarokbo bacha kha; aro ha Ijip gwnangwi bebago’-no chirigwi kap laijak máng, tamni hwn khe núkhung khungsa-o phano thwi lai ya kwrwi kha.

³¹A horo’-no Pharao, Musi bai Aronno ring rw horwi hai hwnwi sa kha, “Bacha lang bai si di, ani bororokni oroni tháng si di, nwng tei nini bebak Israil bororok ongkhorwi tháng si di, phiya nwng sama hai kheno Subraiyungno khulumui lai si di.

³²Nwng sama hai’-no norok mal-matarok, musuk-merarok tlangwi ongkhorwi tháng si di tei anibo hamari san si di!”

³³Ijipsarok o bororokno ha Ijipni tikhlai rohor laina bagwi do lai súkjak; hakhe bórok “Chwng bebakno kwthwi máng se” hwnwi sa kha.

³⁴Bororok bórokni auang khlaima karaino moida bángla bai supung lai kha hakhe rí bai dul lai kha tei bangora boksaui tlang lai kha.

³⁵Musi sama hai kheno Israilsarok khlai lai kha tei Ijipsarokni thani rangchak tei rukphaini kanmungrok tei rírok san lai kha.

³⁶Tei Subraiyung Ijipsarokno Israilrokni bagwi khá phur rw kha, hakhe bórok sanma tẃi’-no Israilrokno rw lai kha. Abo hai kheno Israilrok Ijiipsarokni rangchak-ríchakrok tlangwi tháng kha.

³⁷Israilrok Ramaseni lam rwui Sukot phaising lam rw lai kha. Aro bwrwirok bai chwrairokno karwi chwlarok simi khorok dok-rasai ká anw.

³⁸Tei daljak kubun bororokbo kwbángma bórok bai baksa tháng lai kha. Tei kwbángma merarok, punrok mal-matarok bórok bai baksa lam rw lai kha.

³⁹Bórok ha Ijipni tubuma moida bánglano auang ser lai kha. Bórok achomsa se ha Ijipni ma ongkhor ma ba bórok auanrok tiyar khlai tubu-ui man li ya, eba auano buljaknobo bului tubu-ui man li ya; tamni hwn khe bórok sak sakno se tiyar wng lai man lai li ya.

⁴⁰Israilrok nokha bisi brwi-ra tei thamchi ha Ijibo tong lai kha,

⁴¹tei nokha bisi brwira-thamchi páimani salo Subraiyungni bebak bororok ha Ijipni ongkhorwi tháng lai kha.

⁴²Subraiyung a horo se bórokno naikini khlaiwi ha Ijipni tikhlai-o. Hakhe a horono mol brúmni bagwi bebak Israil bororok, Subraiyungno bórokni naikinini bagwi yapharo.

⁴³Hakhe Subraiyung, Musi bai Aronno hai hwnwi sa kha, “Omorokno yókma salno tẃimani raidarok; khoroksa phatarsa phano abono ma chá glak;

⁴⁴Tamo khe norok rang bai paimani bebak selengrok le bórokni sakur rajak hwn khe cháui mannai.

⁴⁵Khoroksa mula khe chánairok eba haino srapsani bagwi phai tong phainairok le ma chá glak.

⁴⁶Nok khungsa-o tiyar khlaijakma abo núkhung kaisa’-ono cháui ma páinai; aroni muihanno a nokni phataro tlangwi man glak. Norok a muini bekrengrokno ma swbai glak.

⁴⁷Bebak Israil bororok abono ma tẃinai.

⁴⁸Tumungno khoroksa swk phatarsa norokni bisingo kami kha phai khe tei norokni Subraiyungno bórina bagwi yókmani salno tẃina muchung khe norok bórokni núkhungni bebak chwlarokno sakur ma ra granai. Hakhe bono Israil ha-ono achainai Israilsa hai khe romwi mano tei yókma salni panda-o habwi mano. Tamo khe sakur rajak ya borok khoroksa phano abono cháui man glak.

⁴⁹Tei ha-o achainai Israilrokbo haino ma khlainai tei buini hani kubun borok norokni aro kami kha phainairokbo haino ma khlainai.”

⁵⁰Bebak Israilrokno Musi bai Aron dagima haino khlai lai kha.

⁵¹A salo’-no Subraiyung Israil bororokno tei bórokni bodolrok bai khe ha Ijipni phiyógwi tikhlai tubu kha.