Read Kok Borok LAM RWMA 13 Bible Online

LAM RWMA 13 - Kok Borok bible

LAM RWMA 13

¹Subraiyung Musino sa kha,

²“Bebak chwla bwsa sakrano ani thani yaphar di. Tamni hwn ba bebak chwla sakra tei mal mataroknibo bebak chwlarok khe abo ani se.”

³Hakhe Musi bororokno hai hwnwi sa kha, “O salno muitu khlai di. Norok ha Ijipni ongkhormani sal, aro norok seleng wng lai ma tongmani. Subraiyung a salo’-no bini phankrak yak bai khe norokno phiyógwi tubu-o, mungsa buljak auang norok ma chá glak.

⁴O salo’-no norok bwskang ma swkangnai, Abibni o talo.

⁵“Subraiyung nini chuchusongrokni thani kwrak khe norokno a piya bwtwi bai dut yorjak Kanansasongni ha, Hitisarokni hano, Amorsarokni, Hibisarokni tei Jebussarokni hano rwna hwnwi swmai tangmani, aphuru norok bisi brúmno o talo o terno khlai lai di.

⁶Salsni jora norok auang bángla ma chá lainai, salsnini salo khe Subraiyungni mungwi chámung ter ma khlainai.

⁷Salsni norok mungsa bul yaui auang ma chá lainai, nini ha gwnangwi aro mungsa auano bulma manwi ma ton glak.

⁸Tei a salo norok bwsa chwlarokno saui ma khna rwnai, ‘Ha Ijipni nongkhorwi phai phuru Subraiyung ani bagwi tamo samung khlai kha abo se,’

⁹tei, omo nini thani nini yago tei talikha bai mokol kwcharo khe khajak mari hai wngnai tei Subraiyungni kerong nini khugo tongna nangnai; tamni hwn khe Subraiyung nono yak kwrak bai ha Ijipni tikhlaiwi tubu kha.

¹⁰Norok o dagimano bini chongjak jora-o bisi brúm brúmno ma tẃi lainai.

¹¹“Tei Bo nono tei nini chuchusongni thani rwna hwnwi kók rwma Kanansarokni ha-o Subraiyung norokno tubu-ui phai khe tei norokni yago rw phuru khe.

¹²Norok bebak swkang achaima sakrano Subraiyungni bagwi khagwi ton di. Norokni bebak mal matarokni sakrarokbo Subraiyungni wngnai.

¹³Tamo khe Korai chirka chwla bwsa sakrano khe aboni sak slái-o mera bwsa rwi kiphilwi ma nanai. Phiya nwng a korai chirkano paiwi kiphilwi na ya hwn khe aboni gwdnano mukhrubwi rw di. Tei norokni chwla sakrano norok ma phiyóknai.

¹⁴Tei ulo norokni bwsarok jora-o norokno ‘Omoni gujok tamo?’ hwnwi sẃng khe norok bono hai hwnwi ma sanai, ‘Subraiyung bini phankrak bai khe chwngno seleng khatiui ma tongma ha Ijipni phiyógwi tubu-ui phai kha.

¹⁵Tamni hwn khe Pharao kók khna ya wngwi chwngno phiyókna soi ya wng khe, Subraiyung ha Ijipni bebak chwla bwsa sakrano buthar kha bororokni sakrano tei mal matarokni sakranobo buthar kha. Abo bai’-no bebakni sakrano ang Subraiyungni thani ratharo; tamo khe ani chwla bwsa sakrarokno khe ang phiyógwi na-o.’

¹⁶Omo nini bagwi nini yago tei talikha-o, mokolni kwcharo mari hai khe ma khanai, tamni hwn khe Subraiyung phankrak bai khe ha Ijipni tikhlai tubu kha.”

¹⁷Ha Ijipni habugra bororokno phiyógwi rohor phuru a lama sampha phano Kaitor bórokno ha Philistia-o thángma lama tẃi tlang rw li ya; tamni hwn khe Kaitor sa kha, “Bórok choba khlaina nangmano nuk khe, khá kiphilwi ha Ijibo kiphilwi thángnai se.”

¹⁸Tamo khe Kaitor bórokno lama khon rwui hasing haphar tẃi khe Twijlang Kwchak[9] phaising tlangwi tháng kha. Tei Israilrok ha Ijipni tháng phuru-o chobani bagwi manwirok khati laiwi’-no tiyar khe thángjak.

¹⁹Hakhe Musi Josepni bekrengno bo bai baksano tlang kha; tamni hwn khe Josep Israilrokno hai hwnwi kwrak khe sajak, “Kaitor norok bai malai phainai; aphuru khe norok ani bekrengno oroni norok bai baksa ma tlangnai.”

²⁰Tei bórok Sukotni nongkhorwi thángwi hasing hapharni páithak Ethamo thángwi batham khlai lai kha.

²¹Tei Subraiyung salo khe chumui budul wngwi bórokni bwskang bwskang thángwi lama soui tlang kha tei horo khe hórni budul wngwi pohor rwi tlang kha.

²²Salo khe chumui budul horo khe hórni budul khe bórokni bwskangni kutul yaui’-no tong kha.