Read Kok Borok LAM RWMA 14 Bible Online

LAM RWMA 14 - Kok Borok bible

LAM RWMA 14

¹Hakhe Subraiyung Musino sa kha,

²“Israil bororokno sa di, kiphilwi phaiwi Bal-Jephoni Migdol bai twijlang kwchar Pihahirotni bwskango batham khlai di. Nwng abono naharwi twijlang rukungo khe batham khlai di.

³Tamni hwn ba Pharao, Israil bororokno hai hwnwi sanai, bórok a ha-o hai’-no kwcha rwjak kha; hasing haphar bai lama kasujak kha.

⁴Ang Pharaoni bwkhano rak rwnai tei bo bórokno riphriknai tei habugra bai bini sengkrakrokni saka-o ang chẃngsacha wngnai. Hakhe Ijipsarok ano Subraiyung hwnwi sinai.” Israilrok bórok sajakma haino khlai lai kha.

⁵Hakhe Ijipni habugrano Israilrok khárwi tháng bai kha hwnwi sajak khe, Pharao bai bini tẃiphangrokni bwkha a borokrokni bagwi sláijak kha tei bórok sa lai kha, “Chwng tamo khlaijak lang, chwngno monwi tongnairokno bahai khe phiyógwi rwjak lang?”

⁶Hakhe bo bini korai malkhungrokno tiyar khlai kha tei bo bai baksa bini sengkrakrokno tẃi kha.

⁷Tei saradok korai malkhungrokno tei kubun malkhungrokno naui tei bokhorokno tẃiwi tháng kha.

⁸Tei Subraiyung ha Ijipni habugra Pharaoni bwkhano rak rw kha tei bo kwplai khe ongkhorwi Israilrokno riphrigwi tháng kha.

⁹Ijipsarokni sengkrakrok bebak korai tei korai malkhungrok tei malkhung mal rwnairok, sengkrakrok, bórokno riphrigwi tháng kha tei bórok batham khlaima twijlang rukungni Pihahirotni gana Bal-jephono malai kha.

¹⁰Pharao samo sók phai khe; Israilsarok nuk kha Ijipsarok bórokno riphrigwi phai lai tong kha; hakhe bórok bebakno belai khe kirijak lai kha. Hakhe Israilsarok Subraiyungni thani chubachuni bagwi kap lai kha.

¹¹Tei bórok Musino hwn lai kha, ha Ijibo chini bagwi mangkhor kwrwini bagwi da nwng chwngno o hasing hapharo thwina bagwi tubu-ui phai?

¹²Chwng nono ha Ijibo hai hwnwi sa lai ya da, “Chwngno orono klangwi tháng di, chwng haino Ijipsarokni seleng wngwi monwi máng thángnai. O hasing hapharo thwimani slái aro seleng wngwi Ijipsarokno monwi tongma phano ham kuk kha mun.”

¹³Musi bororokno sa kha, “Ta kiri di, kwrak khe bacha di, norok nuknai, Subraiyung norokno mwthangna bagwi tini tamo samung khlai; norok tini nukma o Ijipsakrokno tei nuk phi glak.

¹⁴Subraiyung norokni wngwi choba khlainai tei norok kwrak khe simi tongna nangnai.”

¹⁵Subraiyung Musino sa kha, “Norok tamo chubachuni bagwi ani thani kap lai? Israil bororokno yapri swkangwi tháng di hwnwi sa di.

¹⁶Nini Israilrok twijlang kwchar tẃi hakung kwran khe lái manna tẃi khe nini raidangno tisa di tei nini yakno twijlang phaising phologwi abono khaknwi khe khak di.

¹⁷Tei ang Ijipsarokno bwkha rak rwnai, hakhe bórok Israil borokni uklogo rwktharnai, tamo khe, ang bugra Pharaoni thani, bebak bini sengkrakrokni thani, bini malkhungrokni thani tei bini korai kanairokni thani mwkhang mannai.

¹⁸Hakhe ang Pharaoni thani, bini korai malkhungrokni thani tei bini korai kanairokni thani mwkhang man ma nuk khe, Ijipsarok ang’-no Subraiyung hwnwi saui mannai.”

¹⁹Hakhe Israilrokni bwskango khe tongnai Kaitorni suari konor yaui bórokni uklogo phai bacha phai kha; tei chumui budulbo haino konorwi phaiwi uklogo bathak phai kha.

²⁰Ijipsarokni kwchar bai Israilrokni kwcharo phaiwi bacha phai kha. Aro Chumui mwnak kobol kha tei hopung’-no khoroksa tei khoroksa bai sederjak phano nuk lai li ya kheno hor ai kha.[10]

²¹Hakhe Musi bini yakno twijlang phaising phologwi tisa kha; Subraiyung hopungno salkabaini nokbar sibcha rwui twijlangni twino saka phaising kasa rw kha, twijlangno hakung kwran khlai kha tei twirokno khaknwi khe khak kha.

²²Israil bororok twijlang kwchar tẃi hakung kwran khe láiwi tháng lai kha, twirok bórokni yaksi yagra-o hapung hai se wng si-o.

²³Ijipsarok bórokno riphrigwi thángwi twijlang bisingo habwi tháng lai kha. Ijipni habugrani bebak korairok, korai malkhungrok bebakno kwlwk bai kha.

²⁴Tei phung aisirisiri, Subraiyung hórni budulo tong twtwi tei chumui budulo tongwi Ijipsarokni sengkrakrokno naikhlai kha tei Ijipsarokno bejua-o khiklai kha.

²⁵Bo bórokni malkhungni gorgorirokno harpego kwlwk rw kha, abo bai bórok belai khe phan rwui béng lai kha; hakhe Ijipsarok sa lai kha, “Phai di chwng Israilrokni oroni khár lai sinai; tamni hwn khe Subraiyung se bórokni wngwi Ijipsarok bai choba khlai lai-o.”

²⁶Hakhe Subraiyung Musino sa kha, “Nwng twijlang bwkhak nini yak tisaui pholok di. Hakhe Ijipsarokni saka-o, bórokni malkhungrokno tei malkhung tẃinairokni saka-o twi kiphilwi phaiwi lomwi rw phai kha.”

²⁷Hakhe Musi twijlang bwkhak yak pholok kha, ai khe twi haino hai swkangni haino wng phi khua; Ijipsarok a twini yókna bagwi belai khe’-no chaitok lai kha, tamo khe Subraiyung bórokno twijlango swklwgwi rw kha.

²⁸Twi kiphilwi phaiwi malkhungrokno kobolwi pái kha, Israilrokno riphrigwi thángnai malkhung tẃinairok tei Ijipni sengkrakrok twijlango kwlwk bai kha, khoroksa phano yók li ya.

²⁹Tamo khe twirok yagra yaksi hapung hai wng kha hakhe Israilrok twijlang kwchar tẃi khe hakung kwran hai khe lái tháng lai kha.

³⁰Hakhe a salo Subraiyung Israilrokno Ijipsarokni yakni mwthang kha tei Israilrok bórokno twijlang rukungo kwthwi mang klaijak nuk kha.

³¹Subraiyung bini phankrak bai khe Ijipsarokno mechenma nuk khe Subraiyungno kirijak lai kha hakhe bórok Subraiyung bai bini seleng Musino poito khlai lai kha.