Read Kok Borok LAM RWMA 15 Bible Online

LAM RWMA 15 - Kok Borok bible

LAM RWMA 15

¹Hakhe Musi bai Israilsarok, Subraiyungni thani o rwchapmungno rwchap lai kha; “Ang Subraiyungni thani rwchapnai, tamni hwn ba bo chẃngsacha khe kwplai wng kha; bo korairokno tei korai kanairokno twijlango khiklaiwi rw kha.

²Subraiyung se ani phan tei ani rwchapmung, tei bo ani mwthangnai wng kha; omono ani Kaitor tei ang bono’-no baikhenenai, ani aphani Kaitor, Bono’-no ang lobnai.

³Subraiyung wng kha choba khlainai; bini mung wng kha Subraiyung.”

⁴“Pharaoni malkhungrok bai bini sengkrakrokno bo twijlango khiklai rw kha; tei bini sengkrak bokhorokrok twijlang kwcharo kwlwk bai kha.

⁵Twi kotor bórokno kobol kha; holong kwlwk tẃi khe bórok kuthugo kwlwk kha.

⁶Subraiyung nini yagra yakni phan kirimasingcha, Subraiyung, nini yagra yak arirokno swbaiwi rw kha.

⁷Nini suar kwplai bai khe nwng nono kebengnairokno norwi rohor kha. Nwng nini jolimano rwui rohor khe abo bórokno chwkap hai khe sógwi pái-o.

⁸Nini bukungni hama bai khe twirok kuchugo rúngjagwi thumjago, twi kotor kuchugo khe thumjak kha; twijlang bokhrini twirok raksaui ma thángo;

⁹arirok hai hwnwi sa kha, ‘Ang riphrigwi bórokno romnai, ang segwi tubuma mairokno banta khlainai, ani muchung tẃi khe supungnai. Ang ani seng tikhlainai, ani yak baithang’-no bórokno sokomornai.’

¹⁰Nwng nini nokbar bai uáisa swprak khe’-no twijlang bórokno kobolwi pái kha; kirimasingcha twijlango bórok sorrok hai khe kwlwgwi pái kha.

¹¹“O Subraiyung mwtairokni bere nwng hai tei sabo tong? Sabo nwng hai chẃngsacha kwthar tong? Samungo uanamasingcha kwmamsingcha khe tangnai sabo tong?

¹²Nwng nini yagra yakno pholok kha, hakhe o ha bórokno monogwi pái kha.

¹³“Nwng kók narwgwi swmai rwma tẃi khe bórokno tẃither kha, nwng phiyókma borokno tẃither kha; nini phan bai khe tolwi nini ha kwtharo lama soui bórokno tlang kha.

¹⁴Lukurok khnaui kiriui kwlwi lai kha; Philistia-o tongnairok kirima chá kha.

¹⁵Idomni tẃiphangrok mok lai kha, Moabni tẃiphangrok kiriui kwlwibrajak; bebak Kanano tongnairok bwkha báijak bái kha.

¹⁶Bórokni uanama tei kirima hap kha; o Subraiyung, bórok nini yakni phan nuk kha, tei holong hai khe bórok raksa lai kha, nwng bai paijak nini bororok lái tháng bai ya sak o Subraiyung.

¹⁷Nwng bórokno bisingo tubunai tei nini hathái-o khe songchauinai, abo nwng nini nokni bagwi saiwi najak, o Subraiyung nwng sak baithang’-no o noktharno tang kha.

¹⁸Subraiyung mol brúmni bagwi bugra chánai.”

¹⁹Pharaoni korairok bini malkhungrok bai khe tei bini korai kanairok twijlango tháng phuru khe, Subraiyung twijlangni twirokno bórokni saka-o kiphil rwui tubu phi kha; tei Israil bororok khe twijlang kwchar tẃi hakung kwran khe lái tháng lai kha.

²⁰Aphuru khe Aronni bukhuk Miriam diyarijwk, kham bwsa yago na kha; hakhe bo bai baksa tei bebak bwrwirokbo kham bwsa khochaui bono rwktharwi tháng lai kha tei mwsa lai kha.

²¹Miriam bórokni thani hai hwnwi rwchap kha: “Subraiyungni thani rwchap di, tamni hwn khe bo chẃngsacha khe kwplai wng kha; korairok tei korai kanairoknobo twijlango khiklai rw bai kha.”

²²Aboni ulo khe Musi Israilrokno twijlang kwchakni swkangwi tẃi kha; hakhe bórok Surni hasing hapharo tlangwi tháng kha; bórok saltham hasing hapharo him lai kha hai phano twi nuk li ya.

²³Tei bórok Mara-o phai kha, a Marani twino bórok nungwi man li ya tamni hwn khe aroni twi belaino kwkha. Abo bai’-no abono “Mara”[11] hwnwi mung pharjago.

²⁴Hakhe Musino hai hwnwi hamya sa lai kha, “Chwng tamono nungnai?”

²⁵Hakhe bo Subraiyungni thani suri kha tei Subraiyung bono buphang phangsa phunuk kha hakhe bo abono twi-o khiklai rw kha hakhe a twi kwtẃi wng kha. Subraiyung aro bórokno raida kaisa tei dagimung tẃinani bagwi hai hwnwi sa kha,

²⁶“Norok sói-sói khe norokni Subraiyung Kaitorni kókno khna khe tei bo chajakma tẃi khlai khe tei bini dagimarokno bwkha rw khe tei bini bebak raidarokno tẃi khe, Ijipsarokno rwmani mungsa-o bemukrokno ang norokno rw glak, tamni hwn khe ang’-no wng kha Hamya ham rwnai Subraiyung[12].”

²⁷Hakhe bórok Elimo sók phai kha, aro chiknwi twibru tei phangsni tal buphang tongo; tei bórok a twi rukungo batham khlai lai kha.